އިދިކޮޅު މުޒާހަރާގައި ހައްޔަރު ކުރި 41 މީހުން ޖޫރިމަނާކޮށް، އިންޒާރު ދިން އެކަކު ފުލުހުންގެ ހައްޔަރަށް

ހޮނިހިރު ދުވަހު އިދިކޮޅު، ޕީޕީއެމް/ޕީއެންސީ ކޯލިޝަނުން ބޭއްވި މުޒާހަރާގެ ތެރެއިން ހައްޔަރު ކުރި، 41 މީހުން ޖޫރިމަނާ ކުރުމަށްފަހު، އޭގެ ތެރެއިން އެކަކު ފިޔަވާ އެންމެން ދޫކޮށްލައިފިއެވެ.

ފުލުހުންގެ މީޑިއާ އިން ބުނީ، ހޮނިހިރު ދުވަހު ބޭއްވި މުޒާހަރާގެ ތެރެއިން ފުލުހުންގެ ބެލުމުގެ ދަށަށް ގެނެވުނު، 41 މީހުން، ކޮންމެ މީހަކު 1000ރ އިން ޖޫރިމަނާ ކޮށްފައިވާ ކަމަށެވެ. އަދި އޭގެ ތެރެއިން 40 މީހަކު ދޫކޮށްލާފައިވާ ކަމަށާއި، އެކަކު ހައްޔަރު ކޮށްފައިވާ ކަމަށެވެ.

އޭނާ ހައްޔަރު ކުރީ، ފުލުހުންނަށް އިންޒާރު ދިން މައްސަލައެއްގައި ކަމަށް ވެސް ފުލުހުންގެ މީޑިއާ އޮފިޝަލް ވިދާޅުވި އެވެ.

އިދިކޮޅު ކޯލިޝަނުން ރާވައިގެން ޒުވާނުން ބައިވެރިވި އެއްވުމުގައި 41 މީހަކު ފުލުހުންގެ ބެލުމުގެ ދަށަށް ގެންގޮސްފައިވަނީ އެޗްޕީއޭގެ ގައިޑްލައިންތަކާއި ހިލާފުވުމުގެ ސަބަބުންނެވެ. މިކަމާއި ގުޅިގެން ފުލުހުން ބުނެފައިވަނީ އާންމު ސިއްހަތުގެ ކުއްލި ނުރައްކަލުގެ ހާލަތުގައި ރައްޔިތުން ނުރައްކަލެއްގެ ތެރެއަށް ހުށަހެޅޭ ގޮތަށް އެޗްޕީއޭގެ ގައިޑްލައިންތަކާއި ހިލާފަށް އެއްވުމާއި ގުޅިގެން 41 މީހަކު ފުލުހުންގެ ބެލުމުގެ ދަށަށް ގެނެސްފައިވާ ކަމަށެވެ. އަދި ރައްޔިތުންގެ ސަލާމަތާއި ރައްކާތެރިކަން އިސް ކުރުމަށް ފުލުހުން ވަނީ އިލްތިމާސް ކޮށްފައި ވެއެވެ.

އިދިކޮޅު ކޯލިޝަނުން އެއެއްވުން ބޭއްވުމުގެ ކުރިން ވެސް ފުލުހުން ވަނީ އެޗްޕީއޭގެ ގައިޑްލައިންތަކާ ހިލާފަށް އެއްވުން ބާއްވާނަމަ ފިޔަވަޅު އަޅާނެކަމުގެ އިންޒާރު ދީފައެވެ.

ފުލުހުން ބުނީ، ހޮނިހިރު ދުވަހުގެ އެއްވުމާ ގުޅިގެން އެއް ވެހިކަލް ޓޯވ ކުރެވިފައިވާ ކަމަށާއި އެ ވެހިކަލް ޓޯވ ކުރީ ރެޖިސްޓްރީ ދިމާނުވާތީ ކަމަށެވެ. ދެން ހުރި ވެހިކަލްތައް ވެރިފަރާތުން ގުޅުމުން އެ ވެހިކަލްތައް ހުރި ސަރަހައްދު ބުނެދޭނެ ކަމަށް ވެސް ފުލުހުން ބުނެއެވެ.

އެޗްޕީއޭގެ ގައިޑްލައިނާ ހިލާފަށް މާލޭގަ އާއި ކަނޑުމަތީ ގައިވެސް އިދިކޮޅު ކޯލިޝަނުން މުޒާހަރާ ކޮށްފައިވެއެވެ. އެޗްޕީއޭގެ ގައިޑްލައިންއާ ހިލާފަށް އެއްވުން ބޭއްވުމާ ގުޅިގެން ޕީޕީއެމް 75،000ރ އިން ވަނީ ޖޫރިމަނާ ކޮށްފަ އެވެ. އަދި އެއްވުމުގައި ބައިވެރިވި އިދިކޮޅު ކޯލިޝަނުގެ އިސް ބައެއް ބޭފުޅުން ވެސް 1000ރ އިން ޖޫރިމަނާ ކޮށްފައި ވެއެވެ.