ކުޅުދުއްފުށި ރީޖަނަލް ހޮސްޕިޓަލް މަޝްރޫޢުއާއެކު އެރަށު ރައްޔިތުންގެ އުއްމީދު އާވެއްޖެ
މި މަޝްރޫޢުގެ މަސައްކަތުގެ 18 އިންސައްތަ ވަނީ ނިމިފަ
ކުޅުދުއްފުށި ރީޖަނަލް ހޮސްޕިޓަލް މަރާމާތު ކުރުމުގެ ތެރެއިން
ހދ. ކުޅުދުއްފުށި ރީޖަނަލް ހޮސްޕިޓަލް މަރާމާތު ކުރުމުގެ މަޝްރޫޢުއާއެކު އެރަށު ރައްޔިތުންގެ އުއްމީދު އާވެއްޖެ ކަމަށް އެރަށުގެ ކައުންސިލްގެ ރައީސް އަބްދުއްލަތީފް ހަސަން ވިދާޅުވެއްޖެއެވެ.
މި މަޝްރޫޢުގެ މަސައްކަތުގެ 18 އިންސައްތަ ނިމިފައިވާއިރު މި މަޝްރޫޢުގެ ދަށުން، ފުރަތަމަ ފަންގިފިލާގެ ލިފްޓުގެ ފާރު ކާސްޓް ކުރުމުގެ މަސައްކަތް މިހާރު ވަނީ ނިމިފައިކަމަށް އެމް.ޓީ.ސީ.ސީ އިން މައުލޫމާތު ދެއެވެ.
ރާއްޖެއެމްވީ އަށް މައުލޫމާތު ދެމުން އަބްދުއްލަތީފް ހަސަން ވިދާޅުވީ އެ ރަށުގެ ރީޖަނަލް ހޮސްޕިޓަލް ގައި ޖާގައިގެ ދަތިކަމަކީ ދިމާވެފައިވާ ވަރަށް ބޮޑު މައްސަލައެއް ކަމަށާ އެންމެ ފުރަތަމަ ހޮސްޕިޓަލްގެ ވޯޑުގައި ހެދުނީ 50 އެނދު ކަމަށް ހަސަން ވިދާޅުވިއެވެ.
އަދި ފަހުން 30 އެނދަށް ބަދަލުވެ އެޑްމިޓްވާން އަންނަ މީހުންނަށް އެންދު ނުލިބުން ފަދަ މައްސަލަތައް ދިމާވާކަމަށްވެސް އޭނާ ފާހަގަ ކުރެއްވިއެވެ.
ނަމަވެސް މި މަޝްރޫއު އާއެކު ރައްޔިތުންގެ އުއްމީދު އާވެއްޖެ ކަމަށާ ކޮންމެ ރަށެއްގެ ރައްޔިތުންގެ ވެސް އެންމެ ބޮޑު އެއް އެދުމަކަށް ވާނީ ސިއްހީ ދާއިރާ ކުރި އަރައިގެން ދިޔުން ކަމަށް އަބްދުއްލަތީފް ހަސަން ވިދާޅުވިއެވެ.
އިތުރަށް މައުލޫމާތު ދެއްވަމުން އޭނާ ވިދާޅުވީ މި މަޝްރޫއު ނިމިގެން ދާއިރު ހިދުމަތްތައް ރަނގަޅުވެގެން ދާނެ ކަމަށް ބެލެވޭ ކަމަށާ ރައްޔިތުން ތިބީ މިކަމާމެދު ހިންހަމަ ޖެހި އުފާ ވެފައިކަމަށެވެ.
އަދި މިއީ ކޮންމެ ސަރުކާރަކުންވެސް ވެރިކަމަށް އެރުމުގެ ކުރިން ވާ ވައުދެއް ކަމަށާ މި ވައުދު ފުރިހަމަ ވެގެން ގޮސއފައި ނުވާކަމަށްވެސް އޭނާ ވިދާޅުވިއެވެ. ނަމަވެސް މި ސަރުކާރުން މި މަޝްރޫއު ފެށުމުގެ ސަބަބުން ރައްޔިތުންގެ އުއްމީދުތައް އާވެގެން ހިނގައްޖެކަމަށްވެސް އޭނާ ވިދާޅުވިއެވެ.
މި މަޝްރޫޢު މޮބިލައިޒް ކުރެވިފައިވަނީ 17 މެއި 2020 ގައެވެ.
