މުޒާހަރާއެއް އޮތް ކަން ވެސް އެނގުނީ ފުލުހަށް ހާޒިރު ކުރުމުން: އިދިކޮޅު
12 ސެޕްޓެމްބަރު 2020 | ހޮނިހިރު 16:44މި މުޒާހަރާގައި 41 މީހަކު ހައްޔަރުކޮށްފައިވޭ
އިދިކޮޅުން ބޭއްވި މުޒާހަރާގެ ތެރެއިން
ހޮނިހިރު ދުވަހު މާލޭގައި މުޒާހަރާއެއް ބާއްވަން އުޅޭ ކަމުގެ މައުލޫމާތު ލިބިވަޑައިގަތީ ފުލުހަށް ހާޒިރު ކުރުމުން ކަމަށް ވިދާޅުވެ މުޒާހަރާ ރޭވީ އިދިކޮޅުން ކަމަށް ދެކެވޭ ވާހަކަތައް އިދިކޮޅު ޕީޕީއެމްގެ ނައިބު ރައީސް އަހުމަދު ޝިޔާމް ދޮގު ކުރައްވައިފިއެވެ.
ހޮނިހިރު ދުވަހު ބޭއްވި މުޒާހަރާ އާއި ގުޅިގެން 'ރާއްޖެއެމްވީ' އަށް ދެއްވި އިންޓަރވިއުއެއްގައި ނައިފަރު ދާއިރާގެ މެމްބަރު ވިދާޅުވީ މިއީ އިދިކޮޅުން ރޭވި ހަރަަކާތެއް ނޫން ކަމަށެވެ. މި ހަރަކާތް ރޭވުމުގައި އިދިކޮޅުގެ އަތެއް ނެތްކަން ފާހަގަކުރައްވާ އޭނާ ވިދާޅުވީ ދިވެހި ހުރިހާ ރައްޔިތުންނަކީ އިދިކޮޅު ޕާޓީތަކަށް ނިސްބަތްވާ ފަރާތްތަކެއް ނޫން ކަމަށެވެ.
ޝިޔާމް އިތުރަށް ވިދާޅުވީ މި ހަރަކާތް އޮންނަ ކަމުގެ މައުލޫމާތު ވެސް ލިބިވަޑައިގަތީ ފުލުހަށް ހާޒިރުކޮށް، އެކަމާއި ގުޅޭގޮތުން ސުވާލު ކުރުމުން ކަމަށެވެ. އަދި މި ހަރަކާތުގެ މައުލުމާތު އިދިކޮޅު ޕާޓީތަކުގެ ލީޑަރޝިޕް އަށް ލިބުނީ އެ ޕާޓީގެ ޒުވާނުންގެ ފަރާތުން ކަމަށެވެ. އޭނާ ވިދާޅުވީ އިދިކޮޅު ކޯލިޝަނުން މި ހަރަކާތުގައި ބައިވެރިވުމަށް ނިންމީ މިއީ ގައުމީ ހަރަކާތަކަށް ވުމުން ކަމަށެވެ.
ޝިޔާމް މިހެން ވިދާޅުވި ނަމަވެސް ހޮނިހިރު ދުވަހު ބޭއްވި މުޒާހަރާ އަކީ އިދިކޮޅުން އަޑީގައި ތިބެގެން ބޭއްވި ހަރާކާތެއް ކަން ރާއްޖެއެމްވީ އަށް ވަނީ ކަށަވަރުވެފައެވެ.
ކޮވިޑް-19 ގެ ބަލިމަޑުކަން ރާއްޖޭގައި ފެތުރި، އެކަމުގެ އަސަރު ރައްޔިތުންނަށް އިންތިހާއަށް ކުރަމުންދާއިރު، މިއީ ޕެންޑެމިކް ތެރޭގައި އިދިކޮޅުން މިގޮތަށް ބާއްވާފައިވާ 3 ވަނަ އެއްވުމެވެ. މި މުޒާހަރާ އިން ވެސް އެޗްޕީއޭގެ ގައިޑްލައިންތަކާއި ޚިލާފުވި 41 މީހަކު ހައްޔަރު ކޮށްފައިވެއެވެ. އިދިކޮޅުން ވަނީ އެ ފަރާތްތަކަށް ގާނޫނީ އެހީތެރިކަން ފޯރުކޮށްދިނުމަށް ނިންމާފައެވެ.
މިއީ އިދިކޮޅުން ރާވައިގެން ކުރިއަށް ގެންދިޔަ ހަރަކާތެއް ނޫން ކަމަށް ތަކުރާރުކޮށް ބުނަމުން ގެންދިޔަ ނަމަވެސް، މި މުޒާހަރާގެ ތެރެއިން ކުރީގެ ރައީސް އަބްދުﷲ ޔާމީން މިނިވަން ކުރުމަށް ގޮވާލާފައިވެއެވެ.
