ޗެނަލް13ގެ ވަޒީފާއިން ޒައިދު ވަކި ކުރީ ގާނޫނާ ހިލާފަށް ކަމަށް ހައިކޯޓުން ނިންމައިފި
ޗެނަލް13ގެ ކެމެރާމަންގެ ވަޒީފާއި ޒައިދު ވަކިކުރުމުން އޭނާ ވަނީ ރާއްޖެޓީވީއަށް، މިއަދާ ހަމައަށް އޭނާ ހުރީ ރާއްޖެޓީވީގެ ކެމެރާމަނެއްގެ ވަޒީފާގައި
ޗެނަލް13ގެ ވަޒީފާއިން ޒައިދު ވަކިކުރި މައްސަލާއި ހައިކޯޓުގައި ހުކުމް ކުރުމަށް ބޭއްވި ޝަރީއަތުގެ އަޑުއެހުމުގެ ސްކްރީން ފޮޓޯއެއް
މީޑިއާ ރިންގް ޕްރައިވެޓް ލިމިޓެޑުން ހިންގަމުންދާ ޓީވީ ޗެނަލެއް ކަމަށްވާ ޗެނަލް13 ގެ ކެމަރާމަނެއްގެ ވަޒީފާގައި ހުއްޓައި، ޒައިދު އަބްދުﷲ ވަޒީފާއިން ވަކިކޮށްފައި ވަނީ ވަޒީފާގެ އެއްބަސްވުމާއި ހިލާފަށް އަދި ވަޒީފާއާބެހޭ ގާނޫނާ ހިލާފަށް ކަމަށް ވަޒީފާއާބެހޭ ޓްރައިބިއުނަލް އިން ނިންމި ނިންމުމަށް ހައިކޯޓުން ވެސް ތާއީދު ކޮށްފިއެވެ.
ހައިކޯޓުން މިދިޔަ ބުރާސްފަތި ދުވަހު ނިންމާފައިވާ ނިންމުމުގައި ވަނީ، ޗެނަލް13 ހިންގަމުންދާ މީޑިއާ ރިންގް ކުންފުނިން ހައިކޯޓުގައި އިސްތިއުނާފް ކޮށްފައިވާ މައްސަލާގައި، ވަޒީފާއާބެހޭ ޓްރައިބިއުނަލުން ނިންމާފައިވާ ނިންމުންމަށް ބަދަލު ގެންނަން ޖެހޭ ޝަރުއީ އަދި ގާނޫނީ ސަބަބެއް ނެތް ކަމަށް ކަނޑައަޅައި އެ މައްސަލަ ބެއްލެވި ހައިކޯޓުގެ ފަނޑިޔާރުންގެ އިއްތިފާގުން ނިންމާ ކަމަށެވެ.
ޗެނަލް13ގެ ވަޒީފާ އިން ޒައިދު ކަނޑާލުމުން އޭނާ ވަނީ ވަޒީފާއާބެހޭ ޓްރައިބިއުނަލަށް 20 ޑިސެމްބަރު 2018ގައި އެ މައްސަލަ ހުށަހަޅާފައެވެ. އަދި ވަޒީފާއާބެހޭ ޓްރައިބިއުނަލުން މި މައްސަލަ ނިންމާފައިވަނީ 19 ސެޕްޓެމްބަރު 2019 ގައެވެ.
ޒައިދު ވަޒީފާ އިން ވަކިކޮށްފައިވަނީ، 2018ގައި ބޭއްވި ރިޔާސީ އިންތިހާބުގައި ކުރީގެ ރައީސް އަބްދުﷲ ޔާމީން ފެއިލް ވެވަޑައިގެން، އެމަނިކުފާނުގެ ވެރިކަމުގައި ޗެނަލް13އަށް ލިބެމުންދިޔަ ސްޕޮންސަރތައް ހުއްޓުމަކަށް އައިސްފައިވާ ކަމަށް ބުނެ، މާލީ ގޮތުން ލިބިފައިވާ ދަތިތައް ފޫބެއްދުމަށްޓަކައި އޭރު ވަޒީފާގައި ތިބި މީހުންގެ އަދަދު މަދު ކުރުމުގެ ގޮތުން ކުންފުނީގެ ބޯޑުން ނިންމާފައިވާ ނިންމުމުގެ ދަށުން، 25 އޮކްޓޯބަރ 2018 ގައެވެ.
ޗެނަލް13ގެ ކެމަރާމަނުގެ ވަޒީފާ އިން ޒައިދު ވަކި ކުރުމުން އޭނާ ފަހުން ވަނީ ރާއްޖެޓީވީގެ ކެމެރާމަންގެ ވަޒީފާއަށެވެ. އަދި މިއަދާ ހަމައަށް އޭނާ ހުރީ ރާއްޖެޓީވީގެ ވަޒީފާ ގައެވެ.
ވަޒީފާއާބޭހޭ ޓްރައިބިއުނަލުން ނިންމާފައިވާ ނިންމުގައިވަނީ، ޗެނަލް13 ހިންގާ މީޑިއާ ރިންގްގެ ފަރާތުން، އެސްޓީއޯ އަދި ފެނަކަ ކޯޕަރޭޝަނާއެކު ސޮއި ކޮށްފައިވާ އެއްބަސްވުންތައް، އެ ކުންފުނިތަނުގެ ފަރާތުން ނިމުމަކަށް ގެނެސްފައިވަނީ، ޒައިދު ވަޒީފާއިން ވަކި ކުރި ފަހުންކަން ހުށަހެޅިފައިވާ ލިޔުންތަކުން އެނގޭ ކަމަށެވެ.
ޓްރައިބިއުނަލުން ނިންމާފައިވާ ނިންމުމުގައި އިތުރަށް ބުނެފައިވަނީ، ޒައިދު ޗެނަލް13ގެ ވަޒީ =ފާއިން ވަކިކުރުމުގައި ދީފައިވާ ނޯޓިހުގެ ބަދަލުގައި ދީފައިވާ 10،000ރ އާއި ޒައިދު މިހާރު އަދާކުރަމުންދާ ރާއްޖެޓީވީގެ ވަޒީފާ ހަމަޖެހުނު ތާރީހުން ފެށިގެން، ޗެނަލް13ގެ ވަޒީފާގައި ޒައިދު ހުރިނަމަ، ޒައިދުއަށް ކޮންމެ މަހަކު އުޖޫރައިގެ ގޮތުގައި ހައްގުވާ 10،000ރ އިން ޒައިދު މިހާރު ވަޒީފާ އަދާކުރަމުންދާ ވަޒީފާގެ މަހު އުޖޫރައަށްވާ 8،000ރ އުނިކުރުމަށް ކަނޑައަޅައި، ޒައިދު އަދާކުރަމުން ދިޔަ މަގާމު ޒައިދު އަނބުރާ ރުޖޫއަ ކުރުމުގެ ކުރިން ޒައިދު މިހާރު އަދާކުރަމުންދާ ވަޒީފާއިން ވަކިވެއްޖެނަމަ ނުވަތަ ވަކިކޮށްފިނަމަ، އެވަޒީފާއިން ވަކިވި ނުވަތަ ވަކިކުރި ތާރީހުން ފެށިގެން ޒައިދު އަދާކުރަމުންދިޔަ މަގާމަށް އެފަރާތުން އަނބުރާ ރުޖޫއުކުރުމާ ހަމައަށް ޗެނަލް13ގެ ވަޒީފާގައި ޒައިދު ހުރިނަމަ ޒައިދުއަށް ކޮންމެ މަހަކު އުޖޫރައިގެ ގޮތުގައި ހައްގުވާ 10،000ރ އިން އެއްވެސް ބައެއް އުނިކުރުމުގެ ހައްގު ޗެނަލް13 ހިންގާ މީޑިއާ ރިންގަށް ލިބިގެން ނުވާ ކަމަށެވެ.
ޓްރައިބިއުނަލްގެ ނިންމުމުގައި ވަނީ ޗެނަލް13 ހިންގާ މީޑިއާ ރިންގް ފަރާތުން ޒައިދުއަށް 19 ސެޕްޓެމްބަރ 2019 ވަނަ ދުވަހުން ފެށިގެން ރަސްމީ ބަންދު ނޫން 15 ދުވަހުގެ ތެރޭގައި ޓްރައިބިއުނަލުން މި މައްސަލާގައި ނިންމާފައިވާ އެންމެހާ ނިންމުންތައް ތަންފީޒު ކުރުމަށްފަހު، ރަސްމީ ބަންދު ނޫން ތިން ދުވަހުގެ ތެރޭގައި ޓްރައިބިއުނަލަށް ލިޔުމުން އެންގުމަށެވެ.
