ނިއު ޑައިމަންޑް ތެޔޮ ޓޭންކަރުގައި ހިނގި އަލިފާނުގެ ހާދިޘާގެ ސަބަބުން ގިނަ އަދަދެއްގެ ތެޔޮ ކަނޑަށް ލީކުވެއްޖެއެވެ.
ކުވެއިތުގެ ބަނދަރުން 2 މިލިއަން ފީފާ ތެޔޮ ބަރުކޮށްގެން އިންޑިއާގެ ޕްރަދީޕް ބަނދަރާ ދިމާއަށް މިސްރާބު ޖަހާފައިވާ ނިއު ޑައިމަންޑް ނަމަކަށް ކިޔާ ތެޔޮ ޓޭންކަރުގައި އަލިފާން ހިފާފައިވަނީ އިންޑިއާ ކަނޑު ތެރެއަށް ޓޭންކަރު ވަދެ، ސްރިލަންކާގެ އިރުމަތިން 20 ނޯޓިކަލް މޭލު ދުރުން ދަތުރު ކޮށްފައި އަންނަނިކޮށެވެ.
ލަންކާގެ އަސްކަރިއްޔާއިން ވަނީ މި ޙާދިސާގެ ސަބަބުން ކަނޑަށް ތެޔޮ ލީކުވުމުގެ ފުރުސަތު ބޮޑު ކަމަށް ލަފާކޮށް ތެޔޮ ލީކުވުން ހުއްޓުވުމަށް ކުރީބައިގައި ފިޔަވަޅުތަކެއްވެސް އަޅާފައެވެ.
އެހެން ނަމަވެސް ގިނަ އަދަދެއްގެ ތެޔޮ މިހާރު ވަނީ ކަނޑަށް ލީކުވެފައެވެ. ރިޕޯޓުތައް ދައްކާގޮތުން މީގެ ސަބަބުން ވަރަށްގިނަ ގެއްލުން ތަކާވެސް ކުރިމަތި ވާނެއެވެ.
މި ހާދިޘާ އާ ގުޅިގެން ކޯސްޓް ގާޑް އާއި އެންވަޔަރަމެންޓް މިނިސްޓްރީ އަދި މޯލްޑިވްސް މިޓިއަރޮލޮޖިކަލް ސާވީސް ގުޅިގެން ވަނީ ހުކުރު ދުވަހު ޕްރެސް ކޮންފަރެންސެއް ބާއްވާފައެވެ. އެ ޕްރެސް ކޮންފަރެންސްގައި ވާހަކަ ދައްކަވަމުން ކޯސްޓްގާޑްގެ ކޮމާންޑަންޓް ކާނަލް މުހައްމަދު ސަލީމް ވިދާޅުވީ، ޓޭންކަރުގައި އަލިފާނުގެ ހާދިސާ ހިނގުމާއި އެކު ސްރީލަންކާގެ މެރިޓައިމް ރެސްކިޔު ކޯޑިނޭޓަރުން އެ މައުލޫމާތު ރާއްޖޭގެ ކޯސްޓް ގާޑާއި ހިއްސާ ކޮށްފައިވާ ކަމަށެވެ.
އަދި މި ޕްރެސްގައި މިހާތަނަށް އެކަމުގެ ނުރައްކަލެއް ރާއްޖެއަށް އޮތް ކަމަށް ލަފާ ނުކުރެވޭ ކަމަށް ވިދާޅުވެފައި ވެއެވެ.
