ހޯނޑެއްދޫން ކޮވިޑް-19 އަށް ޕޮޒިޓިވްވި މީހުންގެ އަދަދު 38ށް އަރައިފި
ހޯނޑެއްދޫއިން ހުކުރު ދުވަހު ދެ މީހުންނަށް ކޮވިޑް-19 ޖެހިފައިވޭ
ގދ ހޯނޑެއްދޫ
ގދ. ހޯނޑެއްދޫއިން އިތުރު ދެ މީހަކު ކޮވިޑް19 އަށް ޕޮޒިޓިވްވެ އެރަށުން ޕޮޒިޓިވްވި މީހުންގެ އަދަދު 38ށް އަރައިފިއެވެ.
މާލެ ފިޔަވައި އެންމެ ގިނަ އަދަދެއްގެ މީހުންނަށް ކޮވިޑް-19 ޖެހިގެން ރިޕޯޓްކުރަމުން އަންނަ ހޯނޑެއްދޫއިން ހުކުރު ދުވަހު ދެ މީހުންނަށް ކޮވިޑް-19 ޖެހިފައިވާ ކަމަށް އެޗްއީއޯސީން ވަނީ ބުނެފައެވެ. އޭގެތެރޭގައި ކޮންޓެކްޓުންގެ ތެރޭގައި ހިމެނޭ މީހަކު ވެސް ހިމެނެއެވެ.
ހޯނޑެއްދޫއިން އެންމެ ފުރަތަމަ ކޮވިޑް-19 އަށް މީހުން ޕޮޒިޓިވްވެގެން ރިޕޯޓްކޮށްފައިވަނީ މި މަހުގެ ތިން ވަނަ ދުވަހު އެވެ. އެ ދުވަހު ޕޮޒިޓިވްވެފައިވަނީ ކަރަންޓީނުގައި ތިބި ހަތަރު މީހެކެވެ. އަދި ހަމަ އެދުވަހު އެމީހުންނާ ލިންކެއް ނެތް ދެ މީހެއްގެ ގައިން އަލާމާތްތައް ފެނިގެން އިތުރު ދެމީހެއްގެ ގައިން ނެގުނު ސާމްޕަލްތައް ވަނީ ޕޮޒިޓިވްވެފައެވެ. އެ ދެ ކޭސްއާ ގުޅުން ހުރި 19 ކޭސް އެއް އޭގެ ފަހުން ސެޕްޓެމްބަރު ފަސް ވަނަ ދުވަހު ވެސް ވަނީ ފެނިފައެވެ. އެމީހުންގެ ކޮންޓެކްޓުންގެ ގޮތުގައި 111 މީހުން ފާހަގަ ކުރެވުނުއިރު އޭގެ ތެރެއިން 63 މީހުންގެ އަލާމާތްތައް ހުރި ކަމަށް އެޗްއީއޯސީން ވަނީ ބުނެފައެވެ.
ހޯނޑެއްދޫ އަށް ބަލި ފެތުރުނު ގޮތުގެ ތަހުގީގެއް އެޗްއީއޯސީން ކުރަމުން އަންނަ ކަމަށް ވަނީ ބުނެފައެވެ.
ހޯނޑެއްދޫން ޕޮޒިޓިވް ކޭސްތައް ފެނުމާއެކު އެ ރަށާއި ކޯސްވޭއަކުން ގުޅިފައިވާ މަޑަވެލި ވެސް ވަނީ މޮނިޓަރިންގ އަށް ގެނެސްފައެވެ.
ރާއްޖެއިން މިހާރު 8990 މީހަކު ކޮވިޑް-19 ޖެހިފައިވާއިރު މިވަގުތުވެސް އަތޮޅު ތެރެއިން 100 މީހަކަށް ވަނީ ކޮވިޑް-19 ޖެހިފައެވެ.
