ރައީސް ނަޝީދު އެދިވަޑައިގެންފައިވާ ކަންކަމަކީ، ވަޒީރުންގެ މަޖިލީހުގެ މެންބަރުންނަށް ނުފޫޒު ފޯރުވުން ކަމުގައި ނުދެކެން: ހަސަން ލަތީފް
ވަޒީރުންގެ މަޖިލީހުގެ މެންބަރުންނަށް ސިޔާސީ ނުހަމަ ނުފޫޒް ޕާޓީގެ ރައީސްގެ ހައިސިއްޔަތުން ކުރައްވަމުން ގެންދަވާ: ޝުއައިބު
އެމްޑީޕީގެ ރައީސް މުހައްމަދު ނަޝީދު (ކ) އަދި އެ ޕާޓީގެ ޗެއަރޕާސަން ހަސަން ލަތީފް (ވ)
އެމްޑީޕީގެ ރައީސްގެ ހައިސިއްޔަތުން މުހައްމަދު ނަޝީދު އެދިވަޑައިގެންފައިވާ ކަންކަމަކީ، ވަޒީރުންގެ މަޖިލީހުގެ މެންބަރުންނަށް ސިޔާސީ ނުފޫޒު ފޯރުވުން ކަމުގައި ދެކެވަޑައި ނުގަންނަވާ ކަމަށް އެ ޕާޓީގެ ޗެއަރޕާސަން ހަސަން ލަތީފް ވިދާޅުވެއްޖެއެވެ.
ހަސަން ލަތީފް މިހެން ވިދާޅުވީ ރައީސް ނަޝީދުގެ ވެރިކަމުގައި ޑެޕިއުޓީ އަންޑަރ ސެކްރެޓަރީކަމުގައި މަގާމާއި، އެމްޑީޕީގެ ގައުމީ ކައުންސިލް މެންބަރުކަން ކުރެއްވި ޝުއައިބު އަލީ ފޮނުއްވި ސިޓީއަކަށް ޖަވާބު ދެއްވަމުންނެވެ. ޝުއައިބު އެމްޑީޕީއަށް ފޮނުއްވި ސިޓީގައި ރައީސް ނަޝީދުގެ މައްޗަށް ބޮޑެތި ތުހުމަތުތަކެއް ކޮށްފައިވެއެވެ.
އެމްޑީޕީގެ ފިޔަވަޅު އަޅާ ކޮމިޓީގެ ނާއިބު މުޤައްރިރުގެ މަގާމު ވެސް އަދާ ކުރައްވަމުން ގެންދަވާ ޝުއައިބު ފޮނުއްވި ސިޓީގައި ބުނެފައިވަނީ އެމްޑީޕީގެ ރައީސް ރައީސް މުޙައްމަދު ނަޝީދު ޕާޓީގެ އަސާސީ ޤަވާއިދާ ޚިލާފަށް އަމަލުކުރެއްވުމާއި، ޕާޓީ ތަމްޞީލް ކުރެއްވުމުގެ ގޮތުން ރައްޔިތުންގެ މަޖިލީހުގެ ރައީސްގެ މަޤާމުގެ މަސްއޫލިއްޔަތުތަކާއި ވާޖިބުތައް އުފުއްލެވުމުގައި އަމިއްލަ މަސްލަހަތު އިސްކުރެއްވުމާއި، ޕާޓީގެ ރައީސްކަމުގެ މަޤާމުގައި ހުންނަވައިގެން ދިވެހި ޖުމްހޫރިއްޔާގެ ޤާނޫނު އަސާސީ އިން ރައީސުލްޖުމްހޫރިއްޔާ އަށް ލިބިދީފައިވާ ބާރުތަކުގެ ތެރެއިން ވަޒީރުންގެ މަޖިލީހުގެ މެންބަރުންނަށް ސިޔާސީ ނުހަމަ ނުފޫޒް ޕާޓީގެ ރައީސްގެ ހައިސިއްޔަތުން ކުރައްވަމުން ގެންދެވުން ތަކުރާރު ކުރައްވާތީ އެކަން ހުއްޓުވުމަށް ކުރެއްވެން ހުރި އެންމެހާ މަސައްކަތް ޕާޓީގެ ޗެއަރ ޕާސަންގެ ހައިސިއްޔަތުން ހަސަން ލަތީފް ކޮށްދެއްވުމަށް އެދި ގޮވާލައްވާ ކަމަށެވެ.
މި ސިޓީއަށް ރައްދު ދެއްވާ ހަސަން ލަތީފް ފޮނުއްވި ސިޓީގައި ވިދާޅުވެފައިވަނީ ޝުއައިބުގެ ސިޓީގައި އިޝާރާތް ކުރައްވާފައިވާ އެ ޕާޓީގެ ރައީސް، ރައީސް މުޙަންމަދު ނަޝީދު އޭނާއަށް ފޮނުއްވި ސިޓީފުޅުން، އޭނާގެ ކިބައިން އެދިވަޑައިގެންފައިވާ ކަންކަން ކުރުމުގައި، ޕާޓީގެ އުޞޫލުތަކާ ޚިލާފަށް ޕާޓީގެ ވަސީލަތްތައް ބޭނުންކުރަން ނުޖެހޭކަމާއި އަދި ބޭނުން ނުކުރާ ކަމުގައި ދަންނަވާ ކަމަށެވެ. އަދި މީގެ އިތުރުން، ޕާޓީގެ ރައީސް އެދިވަޑައިގެންފައިވާ ކަންކަމަކީ، ވަޒީރުންގެ މަޖިލީހުގެ މެންބަރުންނަށް ސިޔާސީ ނުހަމަ ނުފޫޒު ފޯރުވުން ކަމުގައި ނުދެކޭ ކަމުގައިވެސް ދަންނަވާ ކަމަށެވެ.
ހަމަ އެއާއެކު، ރައީސް މުޙަންމަދު ނަޝީދު ފޮނުއްވާފައިވާ ސިޓީފުޅަކީ، ޝުއައިބު ދެކިވަޑައިގަންނަވާ ގޮތާ ޚިލާފަށް، ރައީސް މުޙަންމަދު ނަޝީދުގެ އަމިއްލަފުޅު ހައިޘިއްޔަތުން އަދި އަމިއްލަ ޚިޔާލުފުޅުގެ މައްޗަށް ލިޔުއްވައި ފޮނުއްވާފައިވާ ސިޓީފުޅެއް ނޫންކަމާއި، އެސިޓީފުޅަކީ ޕާޓީގެ ރައީސްގެ ހައިޘިއްޔަތުން އަދި ޕާޓީގެ ރައީސްގެ ޚިޔާލުފުޅު ލިޔުއްވައި ފޮނުއްވާފައިވާ ޕާޓީގެ ރަސްމީ ސިޓީއެއް ކަމުގައެވެ.
މީގެ އިތުރުން ޕާޓީގެ ރައީސްގެ މަޤާމަކީ، ޕާޓީގެ އެންމެ އިސް މަޤާމް ކަމަށާއި، ސިޔާސީ ކަންކަމުގައި ޕާޓީ ތަމްޞީލުކުރާ އަދި ޕާޓީގެ ސިޔާސީ ޙަރަކާތްތައް ހިންގުމުގެ ވާޖިބު އަދާކުރާ އެންމެ އިސްފަރާތް ކަމަށެވެ. އެހެންކަމުން، ޕާޓީގެ ރައީސްގެ ހައިޘިއްޔަތުން ރައީސް މުޙަންމަދު ނަޝީދުގެ ވިސްނުންފުޅު ޕާޓީގެ އާންމު މެންބަރުންނާ ހިއްސާކުރެއްވުމާއި، އެވިސްނުންފުޅާ އެއްގޮތަށް ޕާޓީގެ ސިޔާސީ ޙަރަކާތްތައް ހިންގެވުމުގެ އިސް ދައުރު އަދާކުރެއްވުމަކީ ޕާޓީގެ ރައީސްގެ މަސައްކަތުގެ މަސްއޫލިއްޔަތެއް ކަމަށެވެ.
