ޕްރިންސިޕަލަކަށް އެންމެ ގިނަވެގެން އެއްސްކޫލެއްގައި ހުރެވޭނީ 4 އަހަރުގެ ދެ ދައުރު
ޕްރިންސިޕަލަކަށް އެއް ސްކޫލެއްގައި އެންމެ ގިނަވެގެން ހުރެވޭނީ 8 އަހަރު
ދާދިފަހުން ހުޅުވި އިއްޒުއްދީން ސްކޫލް ހުޅުވުމުގެ ރަސްމިއްޔާތުގައި ރައީސް ޞާލިހުއާއި ނައިބް ރައީސް ފައިސަލް އަދި އެޑިއެކޭޝަން މިނިސްޓަރ ޢާއިޝަތު އަދި ސްކޫލްގެ އިސްބޭފުޅުން
ޕްރިންސިޕަލަކަށް އެއް ސްކޫލެއްގައި އެމަގާމުގައި ހުރެވޭނީ، އެންމެ ގިނަވެގެން ވިދިވިދިގެން 8 އަހަރު ކަމަށް ހަމަޖައްސައި، ސަރުކާރު ސްކޫލްތަކުގެ ޕްރިންސިޕަލުން ވަޒީފާ އަދާކުރާ ސްކޫލް ކަނޑައެޅުމުގެ އުސޫލު އާންމުކޮށްފިއެވެ.
ސިވިލް ސަރވިސް ކޮމިޝަން (ސީއެސްސީ)އިން އެކުލަވާލާފައިވާ މިއުސޫލުގައިވާ ގޮތުން، ޕްރިންސިޕަލުންގެ ޓެނުއަރޝިޕްއަކީ ޕްރިންސިޕަލްގެ މަސްއޫލިއްޔަތާއި ޒިންމާތައް އަދާކުރުމަށް ސަރުކާރުގެ ވަކި ސްކޫލަކަށް އައްޔަން ކުރެވޭ މުއްދަތެވެ. މިގޮތުން ސަރުކާރު ސްކޫލެއްގައި ޕްރިންސިޕަލް މަގާމުގައި ތިބޭ މުވައްޒަފުންގެ ޓެނުއަރޝިޕް މުއްދަތަކީ މީލާދީ 4 ހަތަރު އަހަރުކަމަށް ބުނެފައި ވެއެވެ. އަދި އެއް ސްކޫލެއްގައި ޕްރިންސިޕަލްގެ މަގާމުގައި އެއްފަރާތަކަށް އެންމެ ގިނަވެގެން މަސައްކަތް ކުރެވޭނީ ވިދިވިދިގެން ޖުމްލަ 8 އަަހރު ކަމަށް ވެސް އެ އުސޫލުގައި ބުނެފައި ވެއެވެ.
ސްކޫލްތަކުގެ ޕްރިންސިޕަލުން ވަޒީފާ އަދާކުރާ ސްކޫލް ކަނޑައެޅުމުގެ މި އުސޫލަކީ ސަރުކާރުގެ ސްކޫލްތަކުގެ ހިންގުމުގެ ނިޒާމު ހަރުދަނާ ކުރުމުގެ ގޮތުން ސްކޫލްތަކަށް އެންމެ އެކަށީގެންވާ ޤާބިލު ޕްރިންސިޕަލުން އައްޔަން ކުރުމުގެ މަޤްޞަދުގައި އެކުލަވާލާފައިވާ އުސޫލެއް ކަމަށް ބުނެފައި ވެއެވެ. އަދި ދިގު މުއްދަތަކަށް އެއް ސްކޫލެއްގައި ޕްރިންސިޕަލުން ތިބުމުން ދިމާވާ ބައެއް ނޭދެވޭ މައްސަލަތަކަށް ޙައްލު ހޯދުމާއެކު، އައު ޚިޔާލުތަކާއި އައު ވިސްނުންތަކަށް ބިނާކޮށް ސްކޫލްތަކުގެ ހިންގުން ހަރުދަނާ ކުރުމަކީ ވެސް މި އުސޫލު އެކުލަވާލުމުގެ މަޤްޞަދު ކަމަށް ބަޔާންކޮށްފައި ވެއެވެ.
މި އުސޫލުގައި ވާގޮތުން ސްކޫލްތަކަށް ބޭނުންވާ ޕްރިންސިޕަލުން ހޯދުމަށް އިއުލާން ކުރަންވާނީ ސިވިލް ސަރވިސްގެ ވަޒީފާތަކަށް މީހުން ހޮވުމާއި އައްޔަން ކުރުމުގެ މިންގަނޑުތަކާއި އުޞޫލުތަކާ އެއްގޮތަށެވެ. އަދި ޕްރިންސިޕަލުންގެ މަޤާމަށް ހޮވާ ފަރާތެއް ކަނޑައަޅާނީ "ތަޢުލީމީ ދާއިރާގެ ފަންނީ މަގާމުތަކަށް މީހުން ހޮވުމުގައި މާކުސް ދިނުމުގެ އުޞޫލު"ގައި ބަޔާންކުރާ މިންގަނޑާ އެއްގޮތަށް ކަމަށާއި، ޕްރިންސިޕަލުންގެ މަޤާމަކީ ސިވިލް ސަރވިސްގެ "ދާއިމީ" ގިންތީގައި ހިމެނޭ މަގާމަކަށްވާތީ، އެ މުވައްޒަފުންނާމެދު އަމަލު ކުރެވޭނީ ސިވިލް ސަރވިސް ގަވާއިދުގެ ތެރެއިން ދާއިމީ ގިންތީގެ މުވައްޒަފުންނާމެދު ޢަމަލު ކުރާ އުސޫލުން ކަމަށް މި އުސޫލުގައި ބުނެފައިވެއެވެ.
ޕްރިންސިޕަލުން ވަޒީފާ އަދާކުރާނެ ސްކޫލެއް ކަނޑައަޅާނީ ކޮމިޓީއަކުން ކަމަށް ވެސް އުސޫލުގައި ބުނެފައިވެއެވެ. އެގޮތުން ޕްރިންސިޕަލުންގެ ޓެނުއަރޝިޕްގެ މުއްދަތުގައި ވަޒީފާ އަދާ ކުރާނެ ސްކޫލެއް ކަނޑައެޅުމަށްޓަކައި މިނިސްޓަރ އޮފް އެޑިއުކޭޝަންގެ ލަފާގެ މަތިން ޕަރމަނަންޓް ސެކްރެޓަރީ ހިމެނޭ ގޮތަށް 5 މެންބަރުންގެ ދާއިމީ ކޮމެޓީއެއް ޕަރމަނަންޓް ސެކްރެޓަރީ އެކުލަވާލަންވާނެ ކަމަށް ވެސް މި އުސޫލުގައި ބަޔާން ކޮށްފައިވެއެވެ.
