ރަޖިސްޓްރޭޝަން ކެންސަލް ކުރަމުން ދިއުމާއި ގުޅިގެން ވެމްކޯ އަށް ލިބޭ އާމްދަނީގެ 50 އިންސައްތަ ދަށްވެއްޖެ
10 ސެޕްޓެމްބަރު 2020 | ބުރާސްފަތި 12:16ގޭބީސީތަކުން ރެޖިސްޓްރޭޝަން ކެންސަލް ނުކުރުމަށް ވަނީ އެދިފައި
ވެމްކޯއިން ބޭއްވި ނޫސްވެރިންގެ ބައްދަލުވުން ކުރިއަށްދަނީ
ގޭބީސީތަކުން ރަޖިސްޓްރޭޝަން ކެންސަލް ކުރުމާއި ގުޅިގެން ވޭސްޓް މެނޭޖްމަންޓް ކޯޕަރޭޝަން (ވެމްކޯ) އަށް ލިބޭ އާމްދަނީ 50 އިން ސައްތަ ދަށަށް ގޮސްފައިވާ ކަމަށް އެ ކުންފުނިން ބުނެފިއެވެ.
ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ވެމްކޯގެ މެނޭޖިން ޑިރެކްޓަރ އާދަމް މުހައްމަދު ވިދާޅުވީ މިދިޔަ މާރަޗް މަހާ އަޅާބަލާއިރު ފާއިތުވި މަސްތަކުގައި ވެމްކޯ އަށް ލިބޭ ހައުސްހޯލްޑް އިންކަމްގެ 50 އިންސައްތަ ދަށަށް ގޮސްފައިވާ ކަމަށެވެ.
މީގެ މައިގަނޑު އެއް ސަބަބަކީ ގިނަ ފަރާތްތަކުން ބިލްތައް ކެންސަލް ކުރުމާއި ބިލަށް ދައްކަން ޖެހޭ އުޖޫރަ ނުދައްކާތީ ކަމަށް އާދަމް މުހައްމަދު ވިދާޅުވިއެވެ.
އާދަމް މުހައްމަދު އިތުރަށް ވިދާޅުވީ ސިއްޚީ ކުއްލި ނުރައްކަލުގެ ހާލަތުގައި ރަޖިސްޓްރީ ނުކޮށް ހުރި ގޭބީސީ ތަކާއި ރަޖިސްޓްރީ ކޮށްފައި ހުރި ގޭބީސީތަކުގެ ވެސް ކުނި އުކާލަމުންދާ ކަމަށާއި ނަމަވެސް ފަހަކަށް އައިސް ގިނަ ގޭބީސީތަކުން ރަޖިސްޓްރެޝަން ކެންސަލް ކުރަމުންދާކަން ފާހަގަ ކުރެވޭ ކަމަށެވެ.
ވެމްކޯ އަކީ 24 ގަޑިއިރު މަސައްކަތް ކުރަމުންދާ ކުންފުންޏެއްކަން ފާހަގަ ކުރައްވާ އާދަމް މުހައްމަދު ވިދާޅުވީ އެ ކުންފުނިން މަސައްކަތް ކުރަމުންދަނީ ރައްޔިތުންގެ އަތުން ވަރަށް ކުޑަ އުޖޫރައެއް ނަގައިގެން ކަމަށެވެ.
ކުންފުނީގެ 80 އިންސައްތަ އަކީ ދިވެހި މުވައްޒަފުން ކަމަށާއި، ދިވެހިންނަށް އިސްކަން ދީގެން މަސައްކަތް ކުރަމުންދާއިރު ރައްޔިތުންގެ އެއްބާރުލުން ވަރަށް ބޮޑަށް ބޭނުންވާ ކަމަށް ވެސް އޭނާ ވިދާޅުވިއެވެ.
