އިންޑިއާ އާއި ޖަޕާނުގެ އަސްކަރިއްޔާ ގުޅިގެން އަސްކަރީ ތަމްރީނުތައް ކުރިއަށް ގެންދިޔުމާއި ގުޅޭ ގޮތުން އެއްބަސްވުމެއްގައި ސޮއިކޮށްފިއެވެ.
އިންޑިއާގެ ''އާމްޑް ފޯސަސް'' އާއި ޖަޕާނުގެ ''ސެލްފް ޑިފެންސް ފޯސް'' އާ ދެމެދު އެކުލަވާލާފައިވާ އެއްބަސްވުމުގައި ސޮއިކޮށްފައިވަނީ ބުރާސްފަތި ދުވަހުއެވެ. އިންޑިއާގައި ބޭއްވި ރަސްމިއްޔާތެއްގައި އިންޑިއާގެ ފަރާތުން ސޮއި ކުރެއްވީ އިންޑިއާގެ ޑިފެންސް ސެެކްރެޓަރީ ޑރ އަޖޭ ކުމާރް އެެވެ. އަދި ޖަޕާނުގެ ފަރާތުން މި އެއްބަސްވުމުގައި ސޮއި ކުރެއްވީ ޖަޕާނު ސަފީރު ސުޒުކީ ސަތޯޝީ އެވެ.
މި އެއްބަސްވުމުގެ ދަށުން ދެ ގައުމުގެ އަސްކަރިއްޔާގެ ދެމެދުގައި އޮންނަ ގުޅުން މިހާރަށްވުރެ އިތުރަށް ބަދަހި ކުރުމަށް މަސައްކަތްތަކެއް ކުރެވިގެން ދާނެއެވެ.
އަދި އޭގެ އިތުރުން ޖަޕާނާއި އިންޑިއާގެ އަސްކަރިއްޔާ ގުޅިގެން އދ.ގެ ޕީސް ކީޕިން އޮޕަރޭޝަންތަކާއި އިންސާނިޔަތަށްޓަކައި ހިންގާ އެކި ކަހަލަ އޮޕަރޭޝަންތަކުގައި ދެ ގައުމުގެ ގުޅިގެން ބައިވެރިވާނެއެވެ.
ދެ ގައުމުގެ ބޯޑަރަށް އިހްތިރާމް ކުުރުމުގެ ގޮތުން އަޅަން ޖެހޭ ފިޔަވަޅުތައް ދެ ގައުމުން ވެސް އަޅައި އެއް ގައުމު އަނެއް ގައުމުގެ ބޯޑަރު ބެލެހެއްޓުމުގައި އެހީތެރިވާން މި ތަމްރީނު ތެރެއިން މަސައްކަތް ކުރާނެ ކަމަށް އިންޑިއާ އިން ބުންޏެވެ.
އިންޑިއާ ޖަޕާންއާ ދެ ގައުމަކީ އަބަދުވެސް ގާތް ގުޅުމެއް ބާއްވަމުން އަންނަ ދެ ގައުމެވެ.
