ތިނަދޫ އިޖުތިމާޢީ މަރުކަޒުގެ މަސައްކަތް ނިންމާލައިފި

ގދ. ތިނަދޫގައި ގާއިމުކުރި އިޖުތިމާޢީ މަރުކަޒުގެ މަސައްކަތް ނިންމާލައިފިއެވެ.

ތިނަދޫ އިޖުތިމާޢީ މަރުކަޒުގެ މަސައްކަތް ނިންމާލިކަން އިއުލާން ކުރައްވާ ކުޅިވަރާ ބެހޭ ވަޒީރު އަޙްމަދު މަޙްލޫފް ބުދަ ދުވަހު ކުރެއްވި ޓްވީޓެއްގައި ވިދާޅުވީ ތިނަދޫ އިޖުތިމާޢީ މަރުކަޒަކީ މިދިޔަ ސަރުކާރުން ފެށި މަސައްކަތެއް ކަމަށެވެ. އަދި މި މަސައްކަތް ނިންމާލުމަށް ތިނަދޫ ކައުންސިލާއި، ތިނަދޫ އުތުރު ދާއިރާގެ މެންބަރު އަބްދުލް މުޣުނީ އާއި، ތިނަދޫ ދެކުނު ދާއިރާގެ މެންބަރު އަބްދުﷲ ސަނީފްގެ އިތުރުން ކުޅިވަރާ ބެހޭ ވުޒާރާގެ ޔޫތު އެގްޒެކުޓިވް މުޙައްމަދު ވިފާގް ދެއްވި އެއްބާރުލެއްވުމަށް ވަޒީރު ވަނީ ޝުކުރުއަދާކުރައްވާފައެވެ.

ތިނަދޫގައި ސަރުކާރުން ގާއިމުކުރި އިޖުތިމާޢީ މަރުކަޒަކީ ފެންވަރު ރަނގަޅު މަރުކަޒެކެވެ. އެގޮތުން އެ މަރުކަޒުގައި ގިނަ ކުޅިވަރުތަކެއް ކުޅެވޭނެ މަގުފަހިކޮށްދީފައިވާއިރު، ދުޅަހެޔޮ ސިއްހަތެއްގައި ހުރުމަށް ޖިމް ފެސިލިޓީއެއްވެސް ވަނީ ގާއިމުކޮށްފައެވެ.

ތިނަދޫގައި ގާއިމުކުރި އިޖުތިމާޢީ މަރުކަޒުގެ މަސައްކަތް ނިންމާލިއިރު، މީގެ ކުރިން ކުޅިވަރާ ބެހޭ ވުޒާރާއިން ވަނީ ލ. މާބައިދޫ އާއި ހއ. ފިއްލަދޫގައި ގާއިމުކުރި އިޖުތިމާޢީ މަރުކަޒުގެ މަސައްކަތް ނިންމާލިކަން އިއުލާން ކޮށްފައެވެ.

ކުޅިވަރާ ބެހޭ ވުޒާރާގެ ފަރާތުން އަންނަނީ ޒުވާނުން މުނިފޫހިފިލުވައި ކުޅިވަރު ކުޅެ ހުނަރު އިތުރުކުރުމަށް މަގުފަހި ކުރުމުގެ ގޮތުން ރާއްޖޭގެ އެކި ކަންކޮޅުތަކުގައި އިޖުތިމާޢީ މަރުކަޒުތައް ގާއިމުކުރުމުގެ މަސައްކަތް ކުރަމުންނެވެ. މިއީ ދެ ޖިންސްގެ ޒުވާނުންވެސް ހަމަހަމަކަމާއެކު ބޭނުންކުރުމުގެ ފުރުސަތު އޮންނަ ގޮތަށް ގާއިމުކުރެވެމުންދާ މަރުކަޒުތަކެއް ކަމަށް ކުޅިވަރާ ބެހޭ ވުޒާރާއިން މައުލޫމާތުދެއެވެ.