މުދާ ހިފައިގެން ކުޅުދުއްފުއްޓަށް ފުރި ދޯންޏެއް ދިޔަވާތީ ކޯސްޓްގާޑުން އެހީތެރިކަން ފޯރުކޮށްދީފި
9 ސެޕްޓެމްބަރު 2020 | ބުދަ 08:39ދޯނި ދިޔަވުން މިހާރު ވަނީ ކޮންޓްރޯލް ކޮށްފައި
މުދާ ހިފައިގެން ކުޅުދުއްފުއްޓަށް ފުރި ދޯނި: މިދުވަސްވަރު މޫސުމަށް ބަލައިގެން ދަތުރުކުރަން ކަމާ ބެހޭ ފަރާތްތަކުން ދަނީ އިލްތިމާސް ކުރަމުން
ހުޅުމާލެއިން ފުރައިގެން ހދ. ކުޅުދުއްފުއްޓަށް ދަތުރުކުރަމުން ދިޔަ މުދާ އުފުލާ ދޯންޏެއް ދިޔަވަމުންދާތީ އެމްއެންޑީއެފްގެ ކޯސްޓްގާޑުން އެހީތެރިކަން ފޯރުކޮށްދީފިއެވެ.
އެމްއެންޑީއެފުން ބުނީ، "އަސިއަމް" ނަމަކަށް ކިޔާ އެ ދޯނި ދިޔަވަމުންދާތީ ކޯސްޓްގާޑަށް ރިޕޯޓުކޮށްފައިވަނީ ބުދަ ދުވަހުގެ ފަތިހު 5:58 ހާއިރު ކަމަށެވެ. އަދި އެދޯނީގައި ތިބި ހަތަރު މީހުންނާއި، އެދޯނި ސަލާމަތްކުރުމުގެ މަސައްކަތް އެހިސާބުން ފެށި ކަމަށް އެމްއެންޑީއެފުން ބުނެފައިވެއެވެ.
އެމްއެންޑީއެފުން ބުނީ، އެދޯނި ދިޔަވާތީ، ރިޕޯޓްކުރިއިރު އޮތީ ކ. ޒިޔާރަތްފުށި ކައިރި ކަމަށާއި، މިހާރު އެބޯޓު ދިޔަވުން ކޮންޓްރޯލް ކުރެވިފައިވާ ކަމަށެވެ.
މިދުވަސްވަރަކީ ހުޅަނގު މޫސުމުގެ ވިއްސާރަ އާއި، ވައިގަދަ ވުމާއި އަދި ކަނޑުތައް ގަދަވުމުންދާ ދުވަސްވަރެއް ކަމަށްވާތީ، ކަނޑުމަތީގައި ބައެއް ހާދިސާތައް ވަނީ ހިނގާފައެވެ.
މޫސުން ގޯސްވުމާއެކު ދަތުރުވެރިން މޫސުމަށް ބަލައިގެން ދަތުރު ކުރުމަށާއި، އުޅަނދުފަހަރުގެ ސަލާމަތީ އާލާތްތައް ފުރިހަމަ ކުރުމަށް އެމްއެންޑީއެފުން އަންނަނީ ތަކުރާރުކޮށް އިލްތިމާސް ކުރަމުންނެވެ.
