މިނިވަންކަމުގެ ވާހަކަ ދައްކަން ޕީޕީއެމް/ޕީއެންސީ ރަނގަޅެއް ނޫން: ރޮޒެއިނާ
9 ސެޕްޓެމްބަރު 2020 | ބުދަ 08:34"މިނިވަންކަން ނެތުމުގެ އިހްސާސް އެންމެ ބޮޑަށް ކުރެއްވުނީ ކުރީގެ ރައީސް އަބްދުﷲ ޔާމީންގެ ސަރުކާރުގެ ދުވަސްވަރު"
އައްޑޫ މީދޫ ދާއިރާގެ މެންބަރު ރޮޒެއިނާ އާދަމް ރައްޔިތުންގެ މަޖިލީހުގެ ކޮމިޓީއެއްގައި
ދިވެހިންގެ މިނިވަންކަމުގެ ވާހަކަ ދައްކަން ޕީޕީއެމް/ޕީއެންސީ އަކީ ރަނގަޅު ބައެއް ނޫން ކަމަށް ވިދާޅުވެ ރައްޔިތުންގެ މަޖިލީހުގެ އައްޑޫ މީދޫ ދާއިރާގެ އެމްޑީޕީގެ މެންބަރު ރޮޒެއިނާ އާދަމް ފާޑު ވިދާޅުވެއްޖެއެވެ.
އަންގާރަ ދުވަހު ރޮޒެއިނާ ކުރެއްވި ޓްވީޓެއްގައި ވިދާޅުވީ، އޭނާގެ ހަޔާތުގައި މިނިވަންކަން ނެތުމުގެ އިހްސާސް އެންމެ ބޮޑަށް ކުރެއްވުނީ ކުރީގެ ރައީސް އަބްދުﷲ ޔާމީންގެ ސަރުކާރުގެ ދުވަސްވަރު ކަމަށެވެ.
އިދިކޮޅަށް އިޝާރާތް ކުރައްވާ ރޮޒެއިނާ ވިދާޅުވީ، އިންޑިއާ އަކީ ރާއްޖޭގެ މިނިވަންކަމަށް އޮތް ނުރައްކަލެއް ކަމަށް ބުނަމުންދަނީ އޭރުގައި މިނިވަންކަން ނަގާލި މީހުން ކަމަށެވެ. އަދި ވިދާޅުވީ، ރާއްޖެއަށް މިނިވަންކަން ލިބުނު ދުވަހުން ފެށިގެން އިންޑިއާއިން އަންނަނީ ރާއްޖެއަށް އެހީތެރިކަން ފޯރުކޮށްދެމުން ކަަމަށެވެ.
ދިވެހިންގެ މިނިވަންކަން ނަގާލީ އިދިކޮޅު ކޯލިޝަނުން ކަމަށް ވިދާޅުވެ ރޮޒެއިނާ ޓްވީޓް ކުރައްވާފައިވާއިރު، އިިދިކޮޅުން ދަނީ އިންޑިއާ ދެކޮޅަށް ޝޯޝަލް މީޑިއާގައި ބޮޑު ކެމްޕޭނެއް ހިންގަމުންނެވެ. މި ކެމްޕޭނާއެކު ސަރުކާރުގެ ބައެއް ފަރާތްތަކުން ވަނީ އިންޑިއާއެކު މި ސަރުކާރު އޮތްކަން ހާމަކުރުމުގެ ގޮތުން އިތުރު ކެމްޕޭނެއް ފަށާފައެވެ. އަދި ޗައިނާއިން ޕީޕީއެމް/ޕީއެންސީއަށް ފަންޑުކުރާކަމުގެ ތުހުމަތުތައްވެސް ސަރުކާރުގެ މައި ޕާޓީ އެމްޑީޕީގެ މެންބަރުން ދަނީ ކުރަމުންނެވެ. ނަމަވެސް މި ސަރުކާރުން ދަނީ ދެ ގައުމާއިވެސް ގާތް ގުޅުން ބާއްވަމުންނެވެ.
