ރައްޔިތުންގެ މަޖިލީހުގެ ރައީސަށް މުސާރަ އާއި އިނާޔަތުގެ ގޮތުގައި އަހަރެއްގެ ތެރޭގައި 3 މިލިއަން ރުފިޔާ

ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދަށް އެއް އަހަރު ދުވަހުގެ ތެރޭގައި މުސާރަ އާއި އިނާޔާތުގެ ގޮތުގައި 3،185،036.39 (ތިން މިލިއަން އެއް ލައްކަ އަށްޑިހަ ފަސްހާސް ތިރީސް ހަ) ރުފިޔާ ލިބިވަޑައިގަންފައިވާ ކަމަށް އެމަނިކުފާނުގެ މާލީ ބަޔާނުން ހާމަވެއްޖެއެވެ.

މިކަން ހާމަވީ ރައްޔިތުންގެ މަޖިލީހުގެ މެމްބަރުންގެ މާލީ ބަޔާންތައް މަޖިލީހުގެ ވެބްސައިޓްގައި ޝާއިއު ކުރުމުންނެވެ. މިއީ މިދިޔަ އަހަރުގެ މެއި މަހު 27 އިން ފެށިގެން މިއަހަރުގެ މެއި މަހު 28ށް ރައީސް ނަޝީދަށް މުސާރަ އާއި އިނާޔަތުގައި ގޮތުގައި ލިބިވަޑައިގަންފައިވާ ފައިސާ އެވެ.

Advertisement

ރައްޔިތުންގެ މަޖިލީހުގެ ރައީސަށް މުސާރަ އާއި އިނާޔަތުގެ ގޮތުގައި ލިބިވަޑައިގަންނަވަނީ 73125 ރުފިޔާއެވެ. އަދި ކޮވިޑް-19 ގެ ހާލަތާއި ގުޅިގެން މަރޗް މަހުން ފެށިގެން މުސާރައިގެ 20 އިންސައްތަ އުނިކުރުމާއި ގުޅިގެން މިހާރު މަހެއްގެ މައްޗަށް ލިބިވަޑައިގަންނަވަނީ 62500 ރުފިޔާ އެވެ.

އޭގެ އިތުރުން ރައީސުލްޖުމްހޫރިއްޔާކަން ކޮށްފައިވާ ފަރާތްތަކަށް ރައްކާތެރިކަމާއި އިނާޔަތް ދިނުމުގެ ގާނޫނުގައިވާ ގޮތުން، ކުރީގެ ރައީސަކަށް ދޭ މާލީ އިނާޔަތާއި އެކޮމޮޑޭޝަން އެލަވަންސް އަދި އޮފީސް ހިންގުމުގެ ހަރަދުގެ ގޮތުގައި އެމަނިކުފާނަށް 172،000 ރުފިޔާ ލިބިވަޑައިގަންނަވާނެ އެވެ.

ކުރީގެ ރައީސުންނަށް އިނާޔަތުގެ ގޮތުގައި މާލީ އިނާޔަތުގެ ގޮތުގައި މަހަކު 75،000 ރުފިޔާ، އެކޮމޮޑޭޝަންގެ ގޮތުގައި 10،000 ރުފިޔާ އަދި އޮފީސް ހިންގުމަށް 87،000 ރުފިޔާ ލިބިވަޑައިގަންނަވައެވެ.

މަޖިލީހުގެ އިދާރާ އިން މީގެ ކުރިން ބުނެފައިވަނީ ކުރީ ރައީސުންގެ އިނާޔަތްތަކުގެ ގޮތުގައި ލިބިވަޑައިގަންނަވާ މާލީ އިނާޔަތްތަކާއި އެކޮމޮޑޭޝަން އުނިކުރުމަށް ރައީސް ނަޝީދު ވަނީ އެދިވަައިގެންފައެވެ. އެހެން ކަމުން މިހާރު އެމަނިކުފާނު ނަންގަވަނީ ހަމައެކަނި އޮފީސް ހިންގުމަށް 87،000 ރުފިޔާ އަދި ސެކިއުރިޓީ އެވެ.

ރައީސް ނަޝީދުގެ މާލީ ބަޔާނުގައިވާ ގޮތުން ބޭންކް އިންޓްރަސްޓްގެ ގޮތުގައި 36،029 ރުފިޔާ އެބަހުރި އެވެ.

މީގެ އިތުރުން އެމަނިކުފާނުގެ ނަމުގައި ތިން ބޭންކެއްގައި ވާ އެކައުންޓްތަކުގައި 1,715,224.78 (އެއް މިލިއަން ހަތް ލައްކަ ފަނަރަހާސް ދުއިސަތައް ސައްވީސް ހާސް) ރުފިޔާ އެބަހުއްޓެވެ. އެއީ ބީއެމްއެލްއާއި އިސްލާމިކް ބޭންކް އަދި ސްޓޭޓް ބޭންކް އޮފް އިންޑިޔާގައެވެ.

ރައީސް ނަޝިދުގެ ނަމުގައި ލޯނެއް އަދި އެހެން ކުންފުންޏެއްގެ ހިއްސާއެއް އޮތް ކަމަށް މާލީ ބަޔާނުގައި ނެތެވެ. ރައީސް ނަޝީދު ވަނީ ލ. ގަމުން ބިމެއް ބައްލަވައިގަންފައެވެ.

ރައްޔިތުންގެ މަޖިލީހުގެ މެމްބަރުންގެ މާލީ ބަޔާންތައް މީގެކުރިން މަޖިލީހުގެ ވެބްސައިޓްގައި ޝާއިއު ކުރަމުންނެއް ނުދެއެވެ. ނަމަވެސް މިފަހުން މަޖިލީހުގެ ގަވާއިދަށް ގެނައި ބަދަލާއެކު ވަނީ މެމްބަރުންގެ މާލީ ބަޔާން ޝާއިއު ކުރަން ފަށާފައެވެ.

އެގޮތުން ރައްޔިތުން މަޖިލީހުގެ ގަވާއިދުގެ 68 ވަނަ މާއްދާގައި ބަޔާން ކޮށްފައިވަނީ ރައްޔިތުން މަޖިލީހުގެ މެމްބަރުންގެ މުދަލާއި ފައިސާގެ ބަޔާން ނުވަތަ މާލީ ބަޔާން، (އަނބިން ނުވަތަ ފިރިން އަދި 18 އަހަރު ނުފުރޭ ދަރިން) ހިމެނޭހެން ކޮންމެ މީލާދީ އަހަރެއްގެ އޮގަސްޓް މަހުގެ 31 ވަނަ ދުވަހުގެ ކުރިން މަޖިލީހުގެ އަމީން އާންމަށް ހުށަހަޅަންވާނެ ކަމަށެވެ. އަދި މަޖިލީހުގެ ވެބްސަައިޓުގައި މެންބަރުންގެ މާލީ ބަޔާން ޝާއިއު ކުރާއިރު 18 އަހަރު ނުފުރޭ ދަރިންނާއި މެންބަރުންގެ އަނބިން ނުވަތަ ފިރިންގެ ބައި ނުހިމެނާ އެ ޝާއިއު ކުރަން ވާނެކަމަށް ބުނެފައިވެއެވެ.