ތިނަދޫއިން ރެންޑަމްކޮށް ނެގި ސާމްޕަލްތަކުގެ ނަތީޖާ ނެގެޓިވް
8 ސެޕްޓެމްބަރު 2020 | އަންގާރަ 07:35އެ ރަށުން ރެންޑަމްކޮށް ޖުމްލަ 77 ސާމްޕަލް އެއް ނެގި
ގދ. ތިނަދޫ، މިހާތަނަށް ދެ މީހަކު ޕޮޒިޓިވްވެފައިވޭ
ގދ. ތިނަަަދޫ އިން ނެގި ރެންޑަމް ސާމްޕަލްތަކުގެ ނަތީޖާ ނެގެޓިވްވެފައިވާ ކަމަށް އެ ރަށު ކައުންސިލުން ބުނެފިއެވެ.
ރާއްޖެއެމްވީ އަށް މައުލޫމާތު ދެމުން ކައުންސިލްގެ ރައީސް އަހުމަދު އަމްޖަދު ވިދާޅުވީ އެ ރަށުން ރެންޑަމްކޮށް ޖުމްލަ 77 ސާމްޕަލެއް ނެގި ކަމަށާއި ހުރިހާ ސާމްޕަލެއް ވެސް ނެގެޓިވްވެފައިވާކަމަށެވެ.
އަމްޖަދު ވިދާޅުވީ ރެންޑަމްކޮށް ސާމްޕަލް ނަގާފައިވަނީ އެރަށުގައި އާއްމުން ގިނައިންދާ ތަންތަނުން ކަމަށެވެ. އެގޮތުން ފިހާރަތަކުންނާއި ސައި ހޮޓާ ފަދަ ތަންތަނުން ސާމްޕަލް ނެގި ކަމަށް އަމްޖަދު ވިދާޅުވިއެވެ.
ތިނަދޫއިން ރެންޑަމްކޮށް ޓެސްޓުކޮށްފައިވަނީ އެ ރަށުން ދެމީހަކު ކޮވިޑަށް ޕޮޒިޓިވްވުމާއި ގުޅިގެންނެވެ. ދެމީހުންގެ ތެރެއިން އެކަކު މާލެ ގެނެސްފައިވާއިރު، އަނެއް މީހާ ވަނީ ރަށުގައި ކަރަންޓީނުކުރެވިފައެވެ. ކައުންސިލުން ބުނީ އެމީހާގެ ހާލު ރަނގަޅު ކަމަށެވެ.
ތިނަދޫއަކީ އެ އަތޮޅުގެ ރައްޔިތުން އެކި ބޭނުންތަކުގައި ދަތުރުކުރާ ރަށަކަށްވާއިރު އެ އަތޮޅުގެ ހޯނޑެއްދޫ އިން ކޮވިޑުގެ ކޭސްތަކެއް ފެނުމާއި ގުޅިގެން އެރަށުން ސާމްޕަލް އިތުރު ސާމްޕަލް ނެގުމުގެ މަޝްވަރާއެއް ކުރެވިފައިނުވާކަމަށް އެ ރަށު ކައުންސިލްގެ ރައީސް ވިދާޅުވިއެވެ.
