ހޯނޑެއްދޫ އިން ޕޮޒިޓިވްވި އެންމެންގެ ހާލު ރަނގަޅު
ހޯނޑެއްދޫ އިން މިހާތަނަށް 111 ކޮންޓެކްޓް ފެނިފައިވާ ކަށާއި އަދި މީގެތެރެއިން 60 މީހުން ގައިން ބަލީގެ އަލާމާތްތަށް ފެނިފައިވޭ
ގދ. ހޯޑެއްދޫ
ގދ. ހޯނޑެއްދޫ އިން ޕޮޒިޓިވްވި އެންމެންގެ ހާލު ރަނގަޅުކަމަށް އެ ރަށު ކައުންސިލްގެ ރައީސް މުހައްމަދު އަޔާޞް ވިދާޅުވެއްޖެއެވެ.
ރާއްޖެޓީވީއަށް ދިން ހާއްސަ އިންޓަވިޔުއެއްގައި އަޔާޞް ވިދާޅުވީ ހޯނޑެއްދޫ އިން 25 ޕޮޒިޓިވް ކޭސް ފެނިފައިވާއިރު މިއެންމެންގެ ހާލުވެސް އަދި ރަނގަޅު ކަމަށެވެ. މިއެންމެން ވެސް ތިބީ އެމީހެއް ކަރަންޓީނު ކުރެވިފައިވާ ގޭގައި ކަމަށާއި އަދި ފެސިލިޓީ އަކަށް ނުގެންދެވޭ ކަމަށްވެސް ވިދާޅުވިއެވެ.
ޕޮޒިޓިވް ކޭސްގެ އަދަދު 25 ކަމުގައިވީ ނަމަވެސް ހޯނޑެއްދޫ އިން މިހާތަނަށް 111 ކޮންޓެކްޓް ފެނިފައިވާ ކަށާއި އަދި މީގެތެރެއިން 60 މީހުން ގައިން ބަލީގެ އަލާމާތްތަށް ފެނިފައިވާ ކަމަށް ހެލްތު އިމަރޖެންސީ އޮޕަރޭޝަން ސެންޓަރ (އެޗްއީއޯސީ) އިން ހޯމަދުވަހުގެރޭ ބޭއްވި ނިއުސް ކޮންފަރެންސްގައި ހާމަކޮށްފައި ވެއެވެ.
އެގޮތުން އުމުރުން 50 އަހަރުން މަތީގެ ހަ ފަރާތަކާއި އެއް އަހަރުން ދަށުގެ ދެ ކުދިން ގައިން ބަލީގެ އަލާމާތް ހުރި މީހުންގެ ގޮތުގައި ފެނިފައިވާ ކަމަށް ޑރ. ނަޒްލާ ވިދާޅުވިއެވެ. އަދި ކޮންޓެކްޓްވި މީހުން ކަރަންޓީނުކުރެވި، ސާމްޕަލް ނަގާ ޓެސްޓްކުރުމުގެ މަސައްކަތް ކުރިއަށް ދާ ކަަމަށް ޑރ. ނަޒްލާ ވިދާޅުވިއެވެ.
ހޯނޑެއްދޫ އިން އެންމެ ފުރަތަމަ ކޮވިޑް ކޭހެއް ފެނިފައިވަނީ ސެޕްޓެމްބަރ 3 ވަނަ ދުވަހުއެވެ. އެއީ ހޯމް ކަރަންޓީނުގައި ހުއްޓާ ޕޮޒިޓިވްވި ހަތަރު މީހެކެވެ. އަދި 4 ވަނަ ދުވަހު އިތުރު ދެ ކޭސް ފެނުމަށްފަހު 5 ވަނަ ދުވަހު 19 ކޭސް ފެނިފައިވެއެވެ. އެއާއިއެކު މުޅި ޖުމުލަ އެ ރަށުން 25 ޕޮޒިޓިވް ކޭސް މިހާތަނަށް ވަނީ ފެނިފައެވެ.
