ސިންގަލް ވިންޑޯ މަޝްރޫގައި އޭ.ޑީ.ބީގެ އެންޓި ކޮރަޕްޝަން ޕޮލިސީއާއި ޚިލާފުކަމެއް ހިނގާފައެއް ނެތް!
މަޝްރޫއު އޭރު އެވާރޑް ކޮށްފައިވަނީ އޭޑީބީގެ ކޮންސަލްޓަންޓުންގެ ލަފަޔާވެސް އެކު
ފިނޭންސް މިނިސްޓްރީގެ އޮފިޝަލުން ހޯމަ ދުވަހު ނޫސްވެރިންނަށް މައުލޫމާތު ދެނީ- ފިނޭންސް މިނިސްޓްރީން ވަނީ ސިންގަލް ވިންޑޯ މަޝްރޫއުގެ ކަންކަން ހިނގި ގޮތް ނޫސްވެރިންނަށް ސާފުކޮށްދީފައި
"ނެޝަނަލް ސިންގަލް ވިންޑޯ" މަޝްރޫގައި ކޮރަޕްޝަން އެކުލެވިގެންވާތީ މަޝްރޫއަށް ފަންޑުކުރާ އޭޝިއަން ޑިވެލޮޕްމެންޓް ބޭންކް (އޭޑީބީ)ން އެ މަޝްރޫއު ހުއްޓުވާފައިވާކަމަށް މީޑިއާތަކުގައި ފަތުރަމުންދާ ޚަބަރަކީ ދޮގު ހަބަރެއްކަން ހާމަވެއްޖެއެވެ.
ހޯމަ ދުވަހު ހަވީރު ފިނޭންސް މިނިސްޓްރީގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން މިނިސްޓްރީގެ ސީނިއަރ ޕޮލިސީ ޑިރެކްޓަރ ހުސައިން ހަމީމް ވިދާޅުވީ، މި މަޝްރޫޢުގެ ބީލަމުގެ މަރުހަލާއާ ގުޅޭގޮތުން ހުރި ކަންބޮޑުވުންތަކެއް 2020 މާރިޗު 3 ގައި މިނިސްޓްރީގެ ސަމާލުކަމަށް އައި ކަމަށެވެ. އަދި އެކަން ސަމާލުކަމަށް އައުމުން އެ ދުވަހުން ދުވަހަށް އޭޑީބީގެ ސަމާލުކަމަށް އެކަން ގެނެސް، މި މަޝްރޫޢުގެ ބީލަމުގެ މަރުހަލާގެ ރިވިއު އެސެސްމަންޓެއް ހެދުމަށްފަހު އޭޑީބީއަށް ހުށައަޅާނެކަން އޭރު އަންގާފައިވާނެ ކަމަށް މިނިސްޓްރީން މައުލޫމާތު ދެއެވެ.
މިނިސްޓްރީން ވަނީ ރިވިއު އެސެސްމަންޓުގައި ފާހަގަވި ބައެއް ކަންކަން ހިއްސާ ކޮށްފައެވެ. އެގޮތުން މަޝްރޫޢުގެ ބީލަން ކާމިޔާބުކުރި ވެބް ފޮންޓެއިން އޭޝިއާ އިންކް އަކީ ފިލިޕީންސް ގައި ރަޖިސްޓަރީކޮށްފައިވާ ކުންފުންޏެއްކަމާއި، ފިލިޕީންސްއަކީ އޭޝިއަން ޑިވެލޮޕްމަންޓް ބޭންކްގެ "ލިސްޓް އޮފް މެމްބަރ ކަންޓްރީސް" ގެ ތެރޭގައި ހިމެނޭ އަސްލު ކުންފުންޏެއްކަން ކުންފުންޏެއްކަން މިނިސްޓްރީން ވަނީ ފާހަގަ ކޮށްފައެވެ. އެހެން ނަމަވެސް، އެ ކުންފުނިން މި މަޝްރޫޢުއަށް ބީލަން ހުށަހެޅި އިރު މަސައްކަތުގެ ތަޖުރިބާ ލިޔުންތަކުގެ ގޮތުގައި ހުށަހަޅާފައިވަނީ ވެބް ފޮންޓެއިން އެފް.ޒެޑް.އެލް.އެލް.ސީ (ޔޫ.އޭ.އީ) ގެ ލިޔުންތައް ކަމަށާއި، އޭރު އިވެލުއޭޝަން ޓީމަށް އެކަން ފާހަގަވެފައި ނުވާކަމަށް މިނިސްޓްރީން މައުލޫމާތު ދެއެވެ. އެހެން ނަމަވެސް އެއީ ފިލިޕީންސްގައި އުފައްދާފައިވާ "ޕޭޕަރ ކޮމްޕެނީ" އެއް ކަމަށް ބައެއް މީޑިއާ ތަކުން ރިޕޯޓް ކޮށްފައި އޮތް ނަމަވެސް އޭޑީބީގެ ވެންޑަރެއްގެ ގޮތުގައި ރަޖިސްޓްރީ ވެފައި އޮތް ކުންފުންޏެއް އެއީ "ޕޭޕަރ ކޮމްޕެނީ" އެއް ނޫންކަން ފިނޭންސް މިނިސްޓްރީން ހާމަ ކުރި މައުލޫމާތުން ސާފުވެއެވެ.
މިނިސްޓްރީން ބުނީ، މަސައްކަތުގެ ތަޖުރިބާ ދެއްކުމުގެ ގޮތުން ބިޑް ކާމިޔާބު ކުރި ވެބް ފޮންޓެއިން އޭޝިއާ އިންކް (ފިލިޕީންސް) އިން ލިޔެކިޔުން އޮޅުވާލާފައި ނުވާކަންވެސް މިނިސްޓްރީއަށް ފާހަގަވެފައިވާ ކަމަށެވެ.
އޭގެ އިތުރުން، މަޝްރޫއު އޭރު އެވާރޑް ކޮށްފައިވަނީ އޭޑީބީގެ ކޮންސަލްޓަންޓުންގެ ލަފަޔާވެސް އެކު ކަމަށާއި، އޭޑީބީގެ "ނޯ އޮބްޖެކްޝަން" ލިބި މަޝްރޫއު ކުރިއަށް ގެންދިއުމަށް އޭޑީބީން އިއުތިރާޒެއް ނެތްކަންވެސް އަންގާފައިވަނިކޮށް ކަމަށް މިނިސްޓްރީން މައުލޫމާތު ދެއެވެ. އަދި އޭރު ކުންފުންޏާ ގުޅޭ ހުރިހާ މައުލޫމާތުތަކެއްވެސް އޭޑީބީއާ ހިއްސާ ކޮށްފައިވާނެ ކަމަށް މިނިސްޓްރީން ބުނެއެވެ. އަދި މި މަޝްރޫޢަށް ހުއްދަ ދިން އިރު އެބޭންކަށްވެސް ވެބް ފޮންޓެއިން އޭޝިއާ އިންކް (ފިލިޕީންސް)ގެ ތަޖުރިބާގެ ލިޔުންތަކުގެ ގޮތުގައި ހުރީ ވެބް ފޮންޓެއިން އެފް.ޒެޑް.އެލް.އެލް.ސީ (ޔޫ.އޭ.އީ) ގެ ލިޔުންތައް ކަން ފާހަގަވެފައިނުވާކަމަށް މައުލޫމާތު ދީފައިވާކަމަށް މިނިސްޓްރީން ބުނެއެވެ.
މިނިސްޓްރީން އިތުރަށް ބުނީ، މި ކަމުގައި އޭ.ޑީ.ބީގެ އެންޓި ކޮރަޕްޝަން ޕޮލިސީއާއި ޚިލާފުކަމެއް ކޮށްފައިވާކަން އެ ބޭންކަށް ނުބެލެވޭތީ އާއި މި މަޝްރޫޢުގެ ބީލަމުގެ މަރުހަލާގައި ކޮރަޕްޝަނަށް ތުހުމަތު ކުރެވޭ އެއްވެސް ކަމެއް ނުވަތަ އަމަލެއް އެ ބޭންކަށް ފާހަގަކުރެވިފައިނުވާކަން ބޭންކުންވެސް އަންގާފައިވާ ކަމަށެވެ. އެއާއެކު އަލުން މި މަޝްރޫއަށް ހުޅުވާލާއިރު ވެބް ފޮންޓެއިން އޭޝިއާ އިންކް (ފިލިޕީންސް) އަށްވެސް ބިޑުކުރުމުގައި ބައިވެރި ވުމުގެ ފުރުސަތު އޮތްކަމަށް މިނިސްޓްރީން މައުލޫމާތު ދެއެވެ.
އޭގެ އިތުރުން، ޕްރޮޖެކްޓުގެ ބިޑިންގ މަރުޙަލާ އަލުން ކުރިއަށް ގެންދިއުމުން އޭޑީބީގެ ފަންޑު ލިބޭނެކަން ފާހަގަ ކުރައްވައި މިނިސްޓްރީން ބުނީ، މިމަސައްކަތް ރީ-ބިޑިންގއަކަށް ދިޔުމަށް ކުރަންޖެހޭ ކަންތައްތަކާއިމެދުވެސް އެ.ޑީ.ބީ އާއެކު މަޝްވަރާތައް މިހާރު ކުރިއަށްދާ ކަމަށެވެ.
