"ސިންގަލް ވިންޑޯ މަޝްރޫއު އޭޑީބީން ހުއްޓުވައެއް ނުލާ، މަޝްރޫއު ސަސްޕެންޑް ކުރަން ނިންމީ ފިނޭންސް މިނިސްޓްރީން"
މަޝްރޫއު އޭރު އެވާރޑް ކޮށްފައިވަނީ އޭޑީބީގެ ކޮންސަލްޓަންޓުންގެ ލަފަޔާވެސް އެކު
ސިންގަލް ވިންޑޯ މަޝްރޫއުގެ ދަށުން އިކޮނޮމިކް މިނިސްޓްރީއާއި ގުޅުންހުރި އިދާރާތަކުގެ ޚިދުމަތްތައް އެއް ވިއުގައަކުން ގުޅާލެވޭނެ
ބޯޑަރުގައި ހަރަކާތްތެރިވާ މުހިއްމު 7 މުއައްސަސާއެއް އެއް ވިއުގައަކުން ގުޅާލުމަށް މި ސަރުކާރުން ފަށާފައިވާ "ނެޝަނަލް ސިންގަލް ވިންޑޯ" މަޝްރޫއަށް ފަންޑުކުރާ އޭޝިއަން ޑިވެލޮޕްމެންޓް ބޭންކް (އޭޑީބީ)ން އެ މަޝްރޫއު ހުއްޓުވާފައިވާ ކަމަށް ބައެއް މީޑިއާތަކުން ރިޕޯޓު ކޮށްފައިވިޔަސް އެއީ ހަގީގަތެއް ނޫންކަން ރާއްޖެއެމްވީއަށް ކަށަވަރު ކުރެވިއްޖެއެވެ.
އޭޑީބީގެ އެންގުމާ އެއްގޮތަށް އެ މަޝްރޫއު ނެޝަނަލް ޓެންޑަރ ބޯޑުން މިހާރު ކެންސަލް ކޮށްފައިވާ ކަމަށާއި، މިއީ މާލީ އެހީތެރިކަން ފޯރުކޮށްދޭ ބޭރުގެ ބޮޑު ޖަމާއަތަކުން މިފަދަ ގޮތަކަށް ރާއްޖޭގެ މަޝްރޫއުއެއް ހުއްޓުވި ފުރަތަމަ ފަހަރު ކަމަށް އޮންލައިން ނޫހެއް ކަމަށްވާ "މިހާރު" އިން ވަނީ ރިޕޯޓް ކޮށްފައެވެ.
"މިހާރު" ނޫހުން މި ގޮތައް ރިޕޯޓް ކޮށްފައިވާއިރު، ޓެންޑަރ ބޯޑަކީ މަޝްރޫއުތައް ކެންސަލް ކުރުމުގެ މެންޑޭޓް އޮންނަ ބޯޑެއް ނޫންކަން ފާހަގަ ކުރެވެއެވެ.
އިތުބާރު ހުރި މަސްދަރަކުން "ރާއްޖެއެމްވީ"އަށް މައުލޫމާތު ދެއްވަމުން ވިދާޅުވީ، މި މަޝްރޫއު އެވާރޑް ކުރުމުގައި އިވެލުއޭޝަންގައި ބަލަންޖެހޭ ކަންކަން ފުރިހަމައަށް ނުބަލައި ހުރިކަން ފާހަގަވި ހިސާބުން ފިނޭންސް މިނިސްޓްރީން އޭޑީބީގެ ލަފަޔާއެކު އެ މަޝްރޫއު ވަގުތީ ގޮތުން ސަސްޕެންޑް ކުރި ކަމަށެވެ.
އޭގެ އިތުރުން، މަޝްރޫއު އޭރު އެވާރޑް ކޮށްފައިވަނީ އޭޑީބީގެ ކޮންސަލްޓަންޓުންގެ ލަފަޔާވެސް އެކު ކަމަށާއި، އޭޑީބީގެ "ނޯ އޮބްޖެކްޝަން" ލިބި މަޝްރޫއު ކުރިއަށް ގެންދިއުމަށް އޭޑީބީން އިއުތިރާޒެއް ނެތްކަންވެސް އަންގާފައިވަނިކޮށް ކަމަށް އޭނާ ވިދާޅުވިއެވެ. އެހެން ނަަމަވެސް، ޕްރޮޖެކްޓުގެ އިވެލުއޭޝަނާ ގުޅިގެން ފެންމަތިވި މައްސަލަތަކާއެކު، އޭޑީބީއާ މަޝްވަރާ ކުރެވި، އަލުން ރިވިއު ކުރުމަށްފަހު، މަޝްރޫއު އެވޯޑް ކުރިފަރާތާއެކު މަސައްކަތް ކުރިއަށް ނުގެންދަން ނިންމުމުގައި ފިނޭންސް މިނިސްޓްރީންވެސް އޭޑީބީއަށް ލަފާދިން ކަމަށް އޭނާ ވިދާޅުވިއެވެ.
އެކަމާ ގުޅޭގޮތުން މައުލޫމާތު ދެއްވަމުން ފިނޭންސް މިނިސްޓްރީގެ އޮފިޝަލަކު ވިދާޅުވީ، ޕްރޮކިއުމަންޓް އެސަސްމަންޓް ރިޕޯޓްގެ ހޯދުންތަކަށް ބަލައި، މިހާރު އެވޯޑް ކުރެވިފައިވާ ކޮންޓްރެކްޓާއި ގުޅޭގޮތުން ގޮތެއް އޭ.ޑީ.ބީގެ މަޝްވަރާގެ މަތިން ދިވެހި ސަރުކާރުން ހުސްވި އޯގަސްޓް މަހު ގޮތެއް ނިންމާފައިވާ ކަމަށެވެ. އެގޮތުން ނިންމާފައިވަނީ މިހާރު ސޮއިކުރެވިފައިވާ އެއްބަސްވުން ނިމުމަކަށް ގެނައުން ކަމަށާއި، އެއްބަސްވުން ނިމުމަކަށް ގެނައުމަށްޓަކައި ކުރަންޖެހޭ މަސައްކަތްތައް އޭ.ޑީ.ބީ އާއެކު ކުރެވެމުންދާކަމަށް އޭނާ ވިދާޅުވިއެވެ. އަދި އިތުރު ބަޔަކާއެކު، އެ މަޝްރޫއު ކުރިއަށް ގެންދިއުމަށް އޭޑީބީއާއެކު މަޝްވަރާ ކުރެވެމުންދާކަމަށްވެސް އޭނާ ވިދާޅުވިއެވެ.
ފިނޭންސް މިނިސްޓްރީގެ އޮފިޝަލު ވިދާޅުވީ، އެކަމާ ގުޅޭގޮތުން މިނިސްޓްރީން ޚާއްސަ ސްޓޭޓްމަންޓެއް ނެރޭނެ ކަމަށެވެ.
ބޯޑަރުގައި ހަރަކާތްތެރިވާ ސަރުކާރުގެ އިދާރާތަކުގެ މަސައްކަތް އެއް ވިއުގައަކުން ގުޅާލުމަށް ފެށި މި މަޝްރޫއުގެ ދަށުން މިނިސްޓްރީ އޮފް އިކޮނޮމިކް ޑިވެލޮޕްމަންޓް، މޯލްޑިވްސް ކަސްޓަމްސް ސަރވިސް، މޯލްޑިވްސް ޕޯޓްސް ލިމިޓެޑް، މޯލްޑިވްސް އެއަރޕޯޓްސް ކޮމްޕެނީ ލިމިޓެޑް، މޯލްޑިވްސް ފުޑް އެންޑް ޑްރަގް އޮތޯރިޓީ، މިނިސްޓްރީ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރ އަދި މިނިސްޓްރީގެ އޮފް ޑިފެންސްގެ އައިޓީ ނިޒާމުތައް ގުޅުވާލުމަށް ވަނީ ނިންމާފައެވެ.
