އެއްގައުމަކުން 100،000އަށް ވުރެ ގިނަ ބިދޭސީންނަށް ރާއްޖެއިން ވަޒީފާ ނުދެވޭނެ ގޮތަށް ގާނޫނު އިސްލާހު ކުރަން ފާސްކޮށްފި
އެއްގައުމަކުން ގިނަ ވެގެން ވަޒީފާ ދެވޭނީ 100،000 ބިދޭސީންނަށް
ގަވާއިދާ ހިލާފަށް ރާއްޖޭގައި އުޅޭ ބިދޭސީންތަކެއް: ގިނަ އަދަދެއްގެ ބިދޭސީން ގަވާއިދާ ހިލާފަށް ރާއްޖޭގައި އުޅޭ
އެއްގައުމަކުން 100،000 އަށް ވުރެ ގިނައިން ބިދޭސީންނަށް ވަޒީފާ ހަމަޖައްސައިދީގެން ނުވާނެ ކަމަށް ބުނެ، ވަޒީފާއާބެހޭ ގާނޫނަށް އިސްލާހު ހުށަހަޅައި އެއިސްލާހު މަޖިލީހުން ފާސްކޮށްފި އެވެ.
ވަޒީފާއާބެހޭ ގާނޫނަށް ސަރުކާރުގެ ފަރާތުން ހުށަހަޅާފައިވާ އިސްލާހު ގެނައުމުގެ ބިލް، ރައްޔިތުންގެ މަޖިލީހުގެ އިޖުތިމާއީ ކޮމެޓީއާއި އިގްތިޞާދީ ކޮމެޓީން ދިރާސާކޮށް ނިންމި ގޮތުގެ ރިޕޯޓު މަޖިލީހަށް ހުށަހެޅުމުން އެރިޕޯޓަށް ވެސް ގިނަ އިސްލާހުތަކެއް ހުށަހެޅިގެން ދިޔަ އެވެ.
އެގޮތުން، ރައްޔިތުންގެ މަޖިލީހުން އާދިއްތަ ދުވަހު ބޭއްވި ޖަލްސާގައި ކޮމެޓީގެ އެރިޕޯޓާއެކު ހުށަހެޅުނު ގިނަ އިސްލާހުތަކާއެކު އެބިލް ވަނީ ފާސްކޮށްފަ އެވެ.
ކޮމެޓީ ރިޕޯޓަށް، އިހަވަންދޫ ދާއިރާގެ މެމްބަރު މުހައްމަދު ޝިފާއު ވަނީ، ބިދޭސީ މަސައްކަތްތެރިންނާ ގުޅޭ އިސްލާހެއް ހުށަހަޅުއްވާފަ އެވެ.
ޝިފާއު ހުށަހަޅުއްވާފައިވާ އިސްލާހަކީ، ބިލްގެ 19 ވަނަ މާއްދާގެ ފަހަތަށް 20 ވަނަ މާއްދާ އިތުރުކޮށް، ވަޒީފާއާބެހޭ ގާނޫނުގެ 1-65 ވަނަ މާއްދާއަށް އަކުރެއް އިތުރުކުރުމަށެވެ.
އެއްގައުމަކުން އެންމެ ގިނަ ބިދޭސީން ވަޒީފާ އަދާކުރުމަށް ރާއްޖެ ގެނެވޭނެ އަދަދު ކަނޑައެޅުން، ބަޔާންކުރާ މިމާއްދާގެ (ހ)ގައި ބުނަނީ، ދިވެހި ރާއްޖޭގައި ބިދޭސީން ވަޒީފާ އަދާކުރުމަށްޓަކައި އެއްގައުމަކުން އެންމެ ގިނައިން ދިވެހިރާއްޖެއަށް ގެނެވޭނެ އަދަދަކީ 100،000 މީހުންނެވެ.
މިމާއްދާގެ (ށ)ގައި ބުނަނީ، ދިވެހިރާއްޖޭގައި ވަޒީފާ އަދާކުރާ ބިދޭސީންގެ ތެރެއިން މިމާއްދާގައި (ހ)ގައި ބަޔާންކުރާ އަދަދަށްވުރެ އިތުރަށް އެއްވެސް ގައުމަކުން ބިދޭސީން ވަޒީފާ އަދާކުރުމަށް ހުއްދަދެވި ރާއްޖެ ނެގެސްފައިވާނަމަ، ވަޒީފާއާބެހޭ ގާނޫނަށް 6 ވަނަ އިސްލާހު ގެނައުމުގެ ގާނޫނަށް (މިގާނޫނަށް) އަމަލު ކުރަން ފަށާ ތާރީހުން ފެށިގެން 3 އަހަރުގެ ތެރޭގައި ދިވެހިރާއްޖޭގައި ވަޒީފާ އަދާކުރާ ބިދޭސީންގެ އަދަދު މިމާއްދާގެ (ހ)ގައި ބަޔާންކުރާ އަދަދަށް ހަމަޖައްސަން ވާނެ އެވެ.
ރާއްޖޭގައި 200،000 އަށް ވުރެ ގިނަ ބިދޭސީން އުޅެމުންދާއިރު، ގަވާއިދާ ހިލާފަށްވެސް ލައްކައަކާ ގާތްކުރާ އަދަދަށް ބިދޭސީން އުޅޭ ކަމަށް ވެއެވެ. ރާއްޖޭގައި އުޅޭ ބިދޭސީން އަދަދު ދައުލަތުގެ އެއްވެސް އިދާރާއަކަށް ނެނގޭއިރު، ބިދޭސީންގެ މައްސަލައަކީ ރާއްޖެއަށް ދިމާވެފައިވާ ގައުމީ ބޮޑު މައްސަލައަކަށް ވަނީ ވެފަ އެވެ.
