އައްޑޫ ސިޓީގެ ހުޅުދޫގެ ބަނދަރު ތަރައްގީ ކުރުމުގެ މަސައްކަތް ބާރު ސްޕީޑްގައި ކުރިއަށްދާ ކަމަށް މޯލްޑިވްސް ޓްރާންސްޕޯޓު އެންޑް ކޮންޓްރެކްޓިންގް ކޮމްޕެނީ (އެމްޓީސީސީ)ން ބުނެފިއެވެ.

އެމްޓީސީސީން ބުނީ ހުޅުދޫ ބަނދަރު ތަރައްގީ ކުރުމުގެ މަޝްރޫއުގެ މަސައްކަތުގެ 23 އިންސައްތަ މަސައްކަތް ނިމިފައިވާ ކަމަށެވެ. މި މަޝްރޫއުގެ ތެރެއިން މިހާރު ކުރިއަށް ދަނީ ބަނދަރު ފުންކުރުމުގެ މަސައްކަތް ކަމަށް އެމްޓީސީސީން ބުނެއެވެ.

މި މަޝްރޫއުގެ ދަށުން ބަނދަރުގައި ނެރުގެ ފައިކަށީގައި 114 މީޓަރުގެ ބޮޑު ހިލަ ޖެހުމާއި، 742 މީޓަރުގެ ދިގު އެއްގަމު ތޮއްޓެއް ލާނެ އެވެ. އަދި 624 މީޓަރުގެ ރިވެޓްމެންޓާއި 2250 ސްކެއާ މީޓަރުގެ ޕޭވްމަންޓަކާއި 36 ބަނދަރު ބައްތި ޖަހާނެއެވެ.

މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރގެ ފަރާތުން އެމްޓީސީސީއާ ހަވާލުކޮށްގެން ކުރިއަށްގެންދާ މި މަޝްރޫއަކީ 61.4 މިލިއަން ރުފިޔާއަށް ހަވާލުކޮށްފައިވާ މަޝްރޫއެކެވެ.

މި މަޝްރޫއު ހަވާލުކޮށްފައިވަނީ 01 މާރޗް 2020 ގައެވެ. އަމަލީ މަސައްކަތް ފަށާފައިވަނީ ޖުލައި މަހުގެ 28 ވަނަ ދުވަހު ކަމަށް އެމްޓީސީސީން ބުނެއެވެ.