ރިސޯޓްތަކުގެ މުވައްޒަފުން ވަޒީފާގެ މަސައްކަތު ގަޑި ނިމުމުން، ރަށަށް ދާން ބޭނުންވާ މުވައްޒަފުންނަށް ރަށަށް ދެވޭނެ ފުރުސަތު ފަހިވާ ގޮތަށް ރިސޯޓްތަކުގެ މެނޭޖްމަންޓުން އަމަލު ކުރުން ލާޒިމުވާ ގޮތަށް ވަޒީފާއާބެހޭ ގާނޫނަށް ހުށަހެޅި އިސްލާހު ރައްޔިތުންގެ މަޖިލީހުން ފާސްކޮށްފިއެވެ.

ރައްޔިތުންގެ މަޖިލީހުގެ ތުޅާދޫ ދާއިރާގެ މެމްބަރު ހިސާން ހުސައިން ހުށަހެޅުއްވި އިސްލާހާއެކު އޭނާ ކުރެއްވި ޓްވީޓެއްގައި ވިދާޅުވެފައި ވަނީ، ވަޒީފާ އަދާ ކުރާ ފަރާތް އޭނާ ވަޒީފާ އަދާ ކުރަން ޖެހޭ ގަޑި ނިމުމުން، ވަޒީފާ އަދާ ކުރާ ތަނުގައި ހުރުން މަޖުބޫރު ނުކުރެވޭނެ ކަމަށެވެ. އަދި އެތަނަށް އައިސް، ދިއުމަށް ފުރާ ދުއްވާ އުޅަނދަށް އެރުމުގެ ފުރުސަަތު ވެސް ދޭންޖެހޭ ކަމަށެވެ.

ހިސާން ވިދާޅުވީ އެ ހައްގަކީ ބައެއް ރިސޯޓްތަކުގެ މުވައްޒަފުންނަށް މިހާރު ވެސް ލިބެމުންދާ ހައްގެއް ނަމަވެސް، އެހައްގު ނުލިބޭ ގިނަ ރިސޯޓް މުވައްޒަފުން ތިބި ކަމަށެވެ.

މަސައްކަތު ގަޑި ނިމުމުން މަސައްކަތް ކުރާ ތަން ދޫކޮށް ދިއުމުގެ ހައްގު، ބަޔާން ކުރާ، ވަޒީފާއާބެހޭ ގާނޫނުގެ 1-34 ވަނަ މާއްދާގެ (ހ)އަށް ހިސާނު ހުށަހަޅުއްވާފައިވާ އިސްލާހުގައި ބުނަނީ، މުވައްޒަފަކު އޭނާ މަސައްކަތް ކުރުމަށް ކަނޑައަޅާފައިވާ ގަޑި ނިމުމުން، އޭނާ މަސައްކަތް ކުރާ ސައިޓްގައި ނުވަތަ ރަށުގައި ނުވަތަ އުޅަނދެއް ފަދަ ތަނެއްގައި ހުރުމަށް ވަޒީފާ ދޭ ފަރާތުން އޭނާ އަށް މަޖުބޫރު ކޮށްގެން ނުވާނެ ކަމަށެވެ. އަދި މުވައްޒަފަކު އޭނާ ވަޒީފާ އަދާ ކުރުމަށް ކަނޑައަޅާފައިވާ ގަޑި ނިމުމުން، އޭނާ ވަޒީފާ އަދާ ކުރާ ތަން ދޫކޮށް ދިއުމާއި ވަޒީފާއަށް ނުކުންނަން ޖެހޭ ގަނޑިއަށް އެތަނަށް އަނބުރާ އައުމަށް ވަޒީފާ ދޭ ފަރާތުން ނުވަތަ ތަނުގެ ވެރިފަރާތުން ހުރަސް އަޅައިގެން ނުވާނެ ކަމަށެވެ.

އެ މާއްދާގެ (ށ)ގެ ގޮތުގައި ހިސާން ހުށަހަޅާފައިވާ އިސްލާހުގައި ބުނެފައިވަނީ، މަސައްކަތު ގަޑި ނިމުމުން، މުވައްޒަފަކު އޭނާ ވަޒީފާ އަދާކުރާ ތަން ދޫކޮށް ދިއުމަށް އަދި ވަޒީފާއަށް ނުކުންނަން ޖެހޭ ގަޑިއަށް އެތަނަށް އަނބުރާ އައުމަށް ފުރާ ދުއްވާ އުޅަނދެއް ބޭނުންވެއްޖެނަމަ، އެ އުޅަނދަކަށް އެތަނަކަށް ކައިރި ކުރުމުގެ ހުއްދަ ވަޒީފާ ދޭފަރާތުން ނުވަތަ ތަނުގެ ވެރިފަރާތުން ދޭންވާނެ ކަމަށެވެ.

މީގެއިތުރުން ރައްޔިތުންގެ މަޖިލީހުގެ ފޮނަދޫ ދާއިރާގެ މެމްބަރު މޫސާ ސިރާޖު ވެސް ވަނީ ރަށްރަށުގައި ދިމާވާ ވަޒީފާއާބެހޭ މައްސަލަތައް، ވަޒީފާއާބެހޭ ޓްރަބިއުނަލަށް ހުށަހެޅުމަށްޓަކައި، ރަށު ކޯޓު މެދުވެރިކޮށް ވަޒީފާއާބެހޭ ޓްރައިބިއުނަލަށް ހުށަހެޅޭނެ ފުރުސަތު ލިބިގެންދާ ގޮތަށް ވަޒީފާއާބެހޭ ގާނޫނަށް އިސްލާހެއް ހުށަހަޅުއްވާފައެވެ.

ޓްރައިބިއުނަލަށް ހުށަހަޅާ މައްސަލަތައް ކޯޓު މެދުވެރިކޮށް ބެލުން، ބަޔާންކޮށް، ވަޒީފާއާބެހޭ ގާނޫނުގެ 1-87 ވަނަ މާއްދާގެ (ހ)އަށް، ސިރާޖު ހުށަހަޅުއްވާފައިވާ އިސްލާހުގައި ބުނެފައިވަނީ، މާލެ ފިޔަވައި އެހެން ރަށްރަށުގައި އުފެދޭ ވަޒީފާއާބެހޭ މައްސަލަތައް، އެ މައްސަލައެއް އުފެދުނު ރަށު ކޯޓު މެދުވެރިކޮށް ޓްރައިބިއުނަލަށް ހުށަހެޅިދާނެ ކަމަށެވެ.

މި މާއްދާގެ (ށ)އަށް ހުށަހަޅާފައިވާ އިސްލާހުގައި ބުނަނީ، ރަށްރަށުގެ މެޖިސްޓްރޭޓް ކޯޓުތަކަށް ހުށަހަޅާ ވަޒީފާއާބެހޭ މައްސަލަތައް، މައްސަލަ ހުށަހެޅުނު ކޯޓު މެދުވެރިކޮށް އަޑުއެހުންތައް ކުރިއަށް ގެންދެވިދާނެ ކަމަށެވެ. މިގޮތަށް ހުށަހަޅާ މައްސަލަތަކުގައި ވެސް ގޮތެއް ނިންމާނީ ވަޒީފާއާބެހޭ ޓްރައިބިއުނަލުންނެވެ. ހަމަ މި މާއްދާގެ (ނ)އަށް ހުށަހަޅާފައިވާ އިސްލާހުގައި ބުނަނީ، މިމާއްދާގެ ދަށުން ރަށު ކޯޓުތައް މެދުވެެރިކޮށް ވަޒީފާއާބެހޭ ޓްރައިބިއުނަލްއަށް ހުށަހެޅޭ މައްސަލަތައް ބަލާނެ އުސޫލު މި ގާނޫނަށް އަމަލު ކުރަން ފަށާތާ 6 މަސް ދުވަހުގެ ތެރޭގައި ވަޒީފާއާބެހޭ ޓްރައިބިއުނަލްއިން އެކުލަވާލައި އާންމު ކުރަންވާނެ ކަމަށް ވެސް ބުނެފައިވެއެވެ.

ވަޒީފާއާބެހޭ ގާނޫނަކީ 90 މާއްދާގެ މައްޗަށް 2008 ވަަނަ އަހަރު ވުޖޫދުވި ގާނޫނެކެވެ.

މި ގާނޫނަށް ސަރުކާރުގެ ފަރާތުންނާއި ރައްޔިތުންގެ މަޖިލީހުގެ ގިނަ މެމްބަރުންގެ ފަރާތުން ގިނަ އިސްލާހުތަކެއް ވަނީ ހުށަހެޅި، ފާސްކޮށްފައެވެ.