ލިވަޕޫލަށް ކުޅެމުން އަންނަ ނެދަލެންޑްސްގެ މިޑްފީލްޑަރު ޖޯޖީނިއޯ ވައިނަލްޑަމް ބާސެލޯނާއަށް ވިއްކާނީ 15 މިލިޔަން ޕައުންޑަށް ކަމަށް ރިޕޯޓުތައް ބުނެފިއެވެ.

ބާސާއިން އެޓީމުގެ މެދުތެރޭގައި މޮޅު ކުޅުމެއް ދެއްކި ކްރޮއޭޝިއާގެ މިޑްފީލްޑަރު އިވާން ރަކިޓިޗް، އޭނާ ކުރީގެ ކުލަބު ސެއްވިޔާއަށް ވިއްކާލާފައިވާއިރު، މިހާރު އަންނަނީ ވައިނަލްޑަމް ގަތުމަށް މަސައްކަތް ކުރަމުންނެވެ. ވައިނަލްޑަމް އަކީ ބާސާގެ މިހާރުގެ ކޯޗު ރޮނާލްޑް ކޫމަން، ނެދަލެންޑްސްގެ ގައުމީ ފުޓްބޯޅަ ޓީމުގައި އިރުޝާދު ދީފައިވާ ކުޅުންތެރިއެކެވެ.

ބާސާއިން ވައިނަލްޑަމް ގަތުމަށް މަސައްކަތް ކުރި ނަމަވެސް، ލިވަޕޫލުން ވަނީ ވައިނަލްޑަމް އެ ކުލަބުގައި ބެހެއްޓުމަށް މަސައްކަތް ކޮށްފައެވެ. އެކަމަކު ރިޕޯޓުތައް ބުނާގޮތުން އެކަން ކާމިޔާބުނުވެ، ވައިނަލްޑަމް ވިއްކުމަށް އަގެއް ކަނޑައަޅާ، ލިވަޕޫލުން މިހާރު ވަނީ ބާސާއަށް އެކަން އަންގާފައެވެ. އެގޮތުން ލިވަޕޫލުން ވައިނަލްޑަމް ވިއްކާލާނީ 15 މިލިޔަން ޕައުންޑަށް ކަމަށް ރިޕޯޓުތައް ބުނެއެވެ. އެކަމަކު އުމުރުން 29 އަހަރުގެ މިޑްފީލްޑަރަށް ބާސާއިން ޚަރަދުކުރަން ބޭނުންވަނީ 10 މިލިޔަން ޕައުންޑް ކަމަށްވެސް ރިޕޯޓުތައް ބުނެއެވެ.

ވައިނަލްޑަމް ބާސާއަށް ބަދަލުވާނެ ކަމަށް ބެލެވޭއިރު، އޭނާ މިވަގުތު ލިވަޕޫލްގެ އެއްބަސްވުމުގައި ހުރީ އަންނަ އަހަރުގެ ހޫނު މޫސުމުގެ ނިޔަލަށެވެ. މީގެ ކުރިން ނިއުކާސަލް ޔުނައިޓެޑަށްވެސް ކުޅުނު ވައިނަލްޑަމް ލިވަޕޫލަށް ބަދަލުވީ 2016 ވަނަ އަހަރުއެވެ. އޭނާ ވަނީ މިހާތަނަށް ލިވަޕޫލަށް ކުޅެދިން 187 މެޗުގައި 19 ލަނޑު ކާމިޔާބުކޮށްފައެވެ. އަދި ލިވަޕޫލުން އިނގިރޭސި ޕްރިމިއާ ލީގާއި، ޔުއެފާ ޗެމްޕިއަންސް ލީގާއި، ޔުއެފާ ސުޕަ ކަޕްގެ އިތުރުން ފީފާ ކުލަބު ވޯލްޑް ކަޕް ކާމިޔާބުކުރިއިރު ވައިނަލްޑަމްގެ ހިއްސާ ބޮޑެވެ.

ބާސާއިން ވައިނަލްޑަމް ގަތުމަށް މަސައްކަތް ކުރަމުން އަންނައިރު، އެޓީމުން ވަނީ އައު ސީޒަނަށް ޔުވެންޓަސްއަށް ކުޅުނު ބޮސްނިއާގެ މިޑްފީލްޑަރު މިރަލެމް ޕިޔަނިޗް ގެނެސްފައެވެ. އަދި ބާސާއިން އަންނަނީ އެޓީމުގެ މެދުތެރެއަށް ކުޅެމުން އަންނަ ޗިލީގެ މިޑްފީލްޑަރު އާޓޫރޯ ވިޑާލް ވިއްކާލުމަށް މަސައްކަތް ކުރަމުންނެވެ.