ސިންގަޕޫރުގައި ހުންނަ ސަފީރަކަށް ޝަހީބު އައްޔަނުކުރަން ފާސްކޮށްފި
ޝަހީބު އެމަގާމަށް އައްޔަނުކުރަނީ ކުރިން އެމަގާމުގައި ހުންނެވި ޑރ މައުސޫމް ޓޫރިޒަމް މިނިސްޓަރުކަމަށް އައްޔަނުކުރެއްވުމުން
ސިންގަޕޫރުގައި ހުންނަ ސަފީރުކަމަށް އައްޔަނުކުރެއްވި އިބްރާހީމް ޝަހީބު
ރާއްޖެ އިން ސިންގަޕޫރަށް ކަނޑައަޅާފައި ހުންނަ ސަފީރަކަށް އިބްރާހީމް ޝަހީބު އައްޔަނުކުރުމަށް ރައްޔިތުންގެ މަޖިލީހުން ރުހުންދީފި އެވެ.
އާދިއްތަ ދުވަހުގެ ޖަލްސާގައި ޝަހީބު އައްޔަނުކުރުމަށް ނެގުނު ވޯޓުގައި ބައިވެރިވެވަޑައިގެންނެވި 58 މެމްބަރުންގެ ވޯޓުން ވަނީ ޝަހީބަށް ރުހުންދިނުމަށް ފާސްކޮށްފައެވެ.
ޝަހީބު ސިންގަޕޫރުގެ ސަފީރުކަމަށް އައްޔަނުކުރުމުގެ މައްސަލަ ދިރާސާކޮށްފައިވަނީ ޤައުމީ ސަލާމަތާއި ޚާރިޖީ ގުޅުންތަކުގެ ކޮމިޓީންނެވެ. ކޮމިޓީންވެސް ވަނީ ޝަހީބު އެމަގާމަށް އައްޔަނުކުރަން ފެންނަ ކަމަށް ނިންމާފަ އެވެ. ޝަހީބު ސިންގަޕޫރަށް ރާއްޖެއިން ކަނޑައަޅުއްވާ ސަފީރުކަމަށް އައްޔަނު ކޮށްފައިމިވަނީ ކުރިން އެމަގާމުގައި ހުންނެވި ޑރ އަބްދުﷲ މައުސޫމް ޓޫރިޒަމް މިނިސްޓަރުކަމަށް އައްޔަނު ކުރައްވާފައިވާތީ އެވެ.
ޝަހީބު ހުންނެވި ފޮރިން މިނިސްޓްރީގެ ޗީފް އޮފް ޕްރޮޓޮކޯލްގެ މަގާމުގައެވެ. މީގެއިތުރުން ޝަހީބަކީ ހާރިޖީ ދާއިރާގައި ގިނަ އަހަރުތަކެއް ވަންދެން ހިދުމަތް ކުރެއްވި ބޭފުޅެކެވެ. އެގޮތުން، ފޮރިން މިނިސްޓްރީއާ ޝަހީބް އެންމެ ފުރަތަމަ ގުޅިވަޑައިގެންނެވީ 1991 ވަނަ އަހަރެވެ. އޭނާ ވަނީ ސަރުކާރުގެ ބައެއް އޮފީސްތަކުގައި ވެސް އިސް މަގާމުތަކެއް ފުރުއްވައިފައެވެ. އެގޮތުން ހޯމް މިނިސްޓްރީގެ ޕާމަނަންޓް ސެކްރެޓަރީއަކަށް ވެސް ޝަހީބު ވަނީ މަސައްކަތް ކުރައްވައިފައެވެ.
