ރައީސްގެ ހަށިކޮޅުގައި ހުޅުޖަހަން ގޮވާލުމުން ޤާސިމްގެ ނުރުހުން!

ރައީސުލްޖުމްހޫރިއްޔާ އިބްރާޙިމް މުޙައްމަދު ސޯލިޙުގެ ހަށިކޮޅުގައި ހުޅުޖަހަން ގޮވާލުމުން ޖުމްހޫރީ ޕާޓީ (ޖޭޕީ) ގެ ލީޑަރު ޤާސިމް އިބްރާހިމް ނުރުހުން ފާޅު ކުރައްވައިފިއެވެ.

ރައީސް ސޯލިހުގެ ހަށިކޮޅުގައި އަލިފާން ޖަހަން ޕީޕީއެމްގެ ސަޕޯޓަރެއް ޗެނަލް13 ގެ ޕްރޮގްރާމެއްގައި ގޮވާލާފައިވާއިރު، އެކަމާ ގުޅިގެން ޤާސިމް ކުރެއްވި ޓްވީޓެއްގައި ވިދާޅުވީ، އެއްވެސް ބޭނުމެއްގައި ދިވެހި އެއްވެސް ރައްޔިތަކަށް ގެއްލުމެއް ދިނުމަށް ގޮވާލައި، އެކަމަށް ހިތްވަރު ދީގެން ނުވާނެ ކަމަށެވެ.

ޤާސިމް ވިދާޅުވީ، ރައީސްގެ ހަށިކޮޅުގައި ހުޅުޖަހަން އާންމު ޓީވީ ޗެނަލެއްގައި ގޮވާލި ގޮވުން ހަރުކަށި އިބާރާތުން ކުށްވެރި ކުރައްވާ ކަމަށެވެ.

މި މައްސަލަ ފުލުހުންވެސް ތަހުގީގު ކުރަން ފަށާފައިވާއިރު، ޗެނަލް13 އިން ބުނީ ބުރާސްފަތި ދުވަހުގެ މެންދުރު 13:00 ގައި ބްރޯޑްކާސްޓު ކުރި ރައްޔިތުންގެ އަޑު ޕްރޮގްރާމަށް ގުޅި ބައިވެރިޔަކު ރައީސް ސޯލިހަށް ނިސްބަތްކޮށް އޭނާ އަށް ފެންނަނީ އެމަނިކުފާނުގެ ހަށިކޮޅުގައި އަލިފާން ޖަހަން ކަމަށް ބުނި ބުނުމަކީ، އޭނާގެ އަމިއްލަ ހިޔާލުގެ މައްޗަށް ދެއްކި ވާހަކައެއް ކަމަށެވެ. ނަމަވެސް އޭނާ އެހެން ބުނާ އަޑު ބްރޯޑްކާސްޓް ކުރެވިފައިވާތީ އެކަމަށް ބެލުންތެރިންގެ ކިބައިން ޗެނަލް13 އިން ވަނީ މައާފަށް އެދިފައެވެ.