އައިޖީއެމްއެޗްގެ ލެބޯޓަރީއަށް ކޮންޓްރެކްޓް އުސޫލުން 13 ލެބޯރެޓަރީ ޓެކްނޮލޮޖިސްޓުން ހޯދުމަށް އިއުލާން ކޮށްފި
5 ސެޕްޓެމްބަރު 2020 | ހޮނިހިރު 16:43ކޮވިޑް-19އާ ގުޅިގެން ސިއްހީ ހިދްމަތްތެރިންގެ ބޭނުން ޖެހިފައިވާލެއް ބޮޑު
އައިޖީއެމްއެޗްގެ ލެބޯޓަރީގެ ހިދްމަތުގައި އެތަނުގެ މުވައްޒަފެއް މަސައްކަތް ކުރަމުންދަނީ
އައިޖީއެމްއެޗްގެ ލެބޯޓަރީއަށް ކޮންޓްރެކްޓް އުސޫލުން މަސައްކަތް ކޮށްދޭނެ 13 ލެބޯރެޓަރީ ޓެކްނޮލޮޖިސްޓުން ހޯދުމަށް އިއުލާން ކޮށްފިއެވެ.
އައިޖީއެމްއެޗުން ހޮނިހިރު ދުވަހު ކޮށްފައިވާ އިއުލާނެއްގައި ވަނީ، ކޮންޓްރެކްޓް އުސޫލުން މަސައްކަތް ކުރާނެ 13 ލެބޯޓްރީ ޓެކްނޮލޮޖިސްޓުން މަސައްކަތް ކުރަން ޖެހޭނީ ދުވާލަކު 6 ގަޑިއިރު ހަފްތާއެކު 5 ދުވަހު ދަންފަޅި އުސޫލުން ކަމަށެވެ.
މުސާރައިގެ ގޮތުގައި މަހަކު 5،610ރ ދޭނެ ކަމަށާއި، ސަރވިސް އެލަވެންސްގެ ގޮތުގައި 2،500ރ އަދި ރިސްކް އެލަރވެންސްގެ ގޮތުގައި މަސައްކަތަށް ހާޒިރުވާ ކޮންމެ ދުވަހަކަށް 100ރ ލީބެނެ ކަމަށެވެ. އަދި އިތުރުގަޑީގައި މަސައްކަތް ކުރައްވާނަމަ ހަމަޖެހިފައިވާ އުސޫލާއި އެއްގޮތަށް އިތުރުގަޑީގެ ފައިސާ ދެވޭނެ ކަމަށް ވެސް ބުނެފައި ވެއެވެ.
މި މަގާމުގެ މަސްއޫލިއްޔަތުތަކުގެ ތެރޭގައި އޯޕީޑީއާއި އައިޕީޑީއަށް އަންނަ ބަލިމީހުންގެ ސާމްޕަލްތަކާއި، ހެލްތު މިނިސްޓްރީއާއި ޕަބްލިކް ހެލްތު މެދުވެރިވެގެން އަންނަ ސާމްޕަލްތައް ބަލައިގަތުމާއި އައިޑެންޓިފިކޭޝަންތައް ޗެކްކުރުން ހިމެނެއެވެ.
މި ދުވަސްވަރަކީ މުޅި ދުނިޔެއަށް ދިމާވެފައިވާ ކޮވިޑް-19ގެ ރޯގާއާ ގުޅިގެން، ސިއްހީ ދާއިރާގައި މަސައްކަތްކުރާ ފަރާތްތަކުން ވަރަށް ބުރަކޮށް މަސައްކަތް ކުރާ ދުވަސްވަރެކެވެ. އަދި ސިއްހީ ދާއިރާގެ ހިދުމަތަށް ގިނަ ބަޔަކު ބޭނުންޖެހިފައިވާ ދަނޑިވަޅެކެވެ.
މިފަހަކުން ރާއްޖެއިން ކޮވިޑް-19އަށް ޕޮޒިޓިވްވާ މީހުން ގިނަވެ، ކޮންޓެކްޓް ޓްރޭސިންގ ހަދަންޖެހޭލެއް ގިނަވެފައި، ޓެސްޓް ކުރަންޖެހޭ މީހުންގެ އަދަދުވެސް އިންތިހާ އަށް މިވަނީ އިތުރުވެފައެވެ.
ހުކުރު ދުވަހު ރާއްޖެއިން ކޮވިޑް-19ށް އިތުރު 80 މީހަކު ޕޮޒިޓިވްވެ، މިހާތަނަށް ޕޮޒިޓިވްވި މީހުންގެ އަދަދު 8361 އަށް ވަނީ އަރާފައެވެ.
ހުކުރު ދުވަހު 159 މީހަކު ބަލިން ރަނގަޅުވެފައިވާއިރު، މިހާތަނަށް ޖުމްލަ 5642 މީހަކު ވަނީ ބަލިން ރަނގަޅުވެފަ އެވެ. ހޮސްޕިޓަލުގައި އެޑްމިޓް ކޮށްގެން މި ވަގުތު ފަރުވާދެމުން ދަނީ 162 މީހަކަށެވެ. އަދި އައިސޮލޭޝަން ފެސިލިޓީތަކުގައި 1253 މީހުންނަށް ދަނީ ފަރުވާ ދެމުންނެވެ.
