ޤާސިމް އާއި ގުޅުންހުރި 3 ތަނެއް ވަނީ ބަލައި ފާސްކޮށްފަ
ވިލާ ޝިޕިންގ އެންޑް ޓްރޭޑިން ކުންފުނި ހިންގާ ވިލާ ބިލްޑިންގ ބަލައި ފާސްކުރަމުންދާ ސަޙައްދަށް ޤާސިމް އިބްރާހިމް ވަޑައިގަތުން
ޖުމްހޫރީ ޕާޓީގެ ލީޑަރު، ޤާސިމް އިބްރާހިމް ދިރިއުޅުއްވާ ގެކޮޅާއި، އެމަނިކުފާނާއި ގުޅުންހުރި ބައެއް އެހެން ތަންތަން އެއްވަގުތެއްގައި ޗެކު ކުރުމަކީ ފުލުހުން ހިންގަމުންދާ ދަށު ދަރަޖައިގެ ޖަރީމާއެއް ކަމަށް ޖުމްހޫރީ ޕާޓީން ބުނެފިއެވެ.
ޤާސިމް އިބްރާހިމް އާއި ގުޅުންހުރި 3 ތަނެއް އެކުގައި ބަލައި ފާސްކުރަން ފުލުހުން ފެށުމާއި ގުޅިގެން، ޖުމްހޫރީ ޕާޓީން ކުރި ޓްވީޓްތަކެއްގައި ބުނެފައިވަނީ، އެ ޕާޓީގެ ލީޑަރު، ޤާސިމް އިބްރާހިމް ދިރިއުޅުއްވާ ގެކޮޅު، މ. މާފަންނުވިލާ އާއި އެމަނިކުފާނުގެ ވިޔަފާރި ހިނގާ އިމާރާތްތައް ކަމުގައިވާ ވިލާ ހައުސް އަދި ވިލާ ބިލްޑިންގަށް ފުލުހުން ވަދެ، އެއްވަގުތެއްގައި އެތަންތަން ޗެކު ކުރުމަކީ ހިންގަމުންދާ ޖަރީމާއެއް ކަމަށެވެ.
އަދި މިފަދަ ދަށުދަރަޖައިގެ އަމަލުތައް އެންމެ ހަރުކަށި އިބާރާތުން ކުށްވެރި ކުރާ ކަމަށްވެސް އެ ޕާޓީން ވަނީ ބުނެފައެވެ.
ޖުމްހޫރީ ޕާޓީން ހާމަކޮށްފައިވާ ގޮތުގައި ޤާސިމް ދިރިއުޅުއްވާ މ. މާފަންނު ވިލާ ބަލައި ފާސްކުރުން ކުރިއަށް ދިޔައިރު، އެ ގޭގައި ދިރިއުޅޭ ފަރާތްތަކަށްވެސް އެގެއަށް ވަދެ ނުކުމެ ހެދުމުގެ ފުރުޞަތު ފުލުހުން ދީފައެއް ނުވެއެވެ.
އާދިއްތަ ދުވަހުގެ މެންދުރުފަހު، ޤާސިމް އިބްރާހިމް ދިރިއުޅުއްވާ ގެކޮޅާއި، އެމަނިކުފާނާއި ގުޅުންހުރި ބައެއް އެހެންތަންތަން ބަލައި ފާސްކުރަން ފުލުހުން ފަށާފައިވަނީ ކޯޓު އަމުރެއްގެ ދަށުންނެވެ.
ކްރިމިނަލް ކޯޓްގެ އިސް ގާޒީ އަބްދުލް ބާރީ ޔޫސުފް ސޮއިކުރައްވާ، މ. ވިލާ ބިލްޑިންގ ބަލައި ފާސްކުރުމަށް ނެރެފައިވާ ކޯޓް އަމުރުގައި ވަނީ، ރައްޔިތުންގެ މަޖިލީހުގެ މާމިގިލީ ދާއިރާގެ މެމްބަރު ގާސިމް އިބްރާހިމް ބޭނުންވާ ވަކި ގޮތަކަށް ރައްޔިތުންގެ މަޖިލީހުގައި ނަގާ ވޯޓްތައް އަނބުރާލުމަށްޓަކައި މަޖިލީހުގެ މެމްބަރުންނަށް ރިޝްވަތު ދީ، ވޯޓަށް ނުފޫޒު ފޯރުވަން މަސައްކަތްކުރާ ކަމަށް ތުޙުމަތު ކުރެވޭ ކަމަށާ، އަދި ރާއްޖޭގައި ގާނޫނީ ގޮތުން އުފެދިފައިވާ ސަރުކާރު ގާނޫނާ ހިލާފަށް ބަދަލުކުރުމަށް ހިތްވަރު ލިބޭ ފަދަ އަމަލުތަކެއް ކުރަމުންދާ ކަމަށް ތުޙުމަތު ކުރެވިފައިވާ ކަމަށްވެސް އަމުރުކުރެވޭ ކަމަށާ، އަދި ސަލާމާތި ބާރުތަކުގެ ތެރޭގައި ފިތުނަ ފަސާދަ އުފައްދައި ޤައުމުގެ ސުލްޙަ މަސަލަސްކަމާއި އަމާންކަން ގެއްލުވާލުމަށް މަސައްކަތްކުރަމުންދާ ކަމަށެވެ.
އާދީއްތަ ދުވަހު ފުލުހުން ހެކި ހޯދުމަށް ކްރިމިނަލް ކޯޓުގެ އަމުރަކާއި އެކު 3 ތަނެއް ބަލައި ފާސްކޮށްފައިވާއިރު، އެ ތަންތަން ބަލައި ފާސްކުރި ތުޙުމަތުތައް ތަޙުޤީޤުކޮށް، މި މައްސަލައިގައި ދައުލަތުން ދައުވާކޮށް، މިހާރު ވަނީ މި މައްސަލައިގެ ޝަރީޢަތްވެސް ފަށާފައެވެ.
