ކ. ދިއްފުށީ ކައުންސިލްގެ ފައިނަލް ބަޖެޓުގެ ގޮތުގައި މާލީ ބަޔާނުގައި ހިމަނާފައިވާ އަދަދާއި ޕަބްލިކް އެކައުންޓިންގ ސިސްޓަމުން ދައްކާ އަދަދާ ދެމެދު ފަރަގު ހުރި ކަމަށް އޮޓިޑް ރިޕޯޓުގައި ބުނެފިއެވެ.
އޮޑިޓް ރިޕޯޓުގައި ބުނެފައިވަނީ ދައުލަތުގެ މާލީ ބަޔާން ތައްޔާރު ކުރަންވާނީ "އިންޓަނޭޝަނަލް ފެޑެރޭޝަން އޮފް އެކައުންޓެންޓްސް" އިން ނެރެ ޝާއިއުކުރާ "އިންޓަނޭޝަނަލް ޕަބްލިކް ސެކްޓަރ އެކައުންޓިންގ ސްޓޭންޑަރޑް (އިޕްސަސް): ފައިނޭންޝަލް ރިޕޯޓިންގ އަންޑަރ ދަ ކޭޝް ބޭސިސް އޮފް އެކައުންޓިންގ" އާ އެއްގޮތަށް ކަމަށް ދައުލަތުގެ މާލިއްޔަތުގެ ގަވާއިދުގައި ބަޔާންކޮށްފައިވާ ކަމަށެވެ.
ފާސްކުރި ބަޖެޓް އާންމުކޮށްފައިވާ މުއައްސަސާތަކުން އެ ތަނަކުން ޒިންމާވާން ޖެހޭ ފާސްކުރި ބަޖެޓާއި ހިނގި ޚަރަދު ގެ މައުލޫމާތު އަދި ފާސްކުރި ބަޖެޓާއި ފައިނަލް ބަޖެޓުގެ މައުލޫމާތު މާލީ ބަޔާންތަކުގައި ހިމަނަން ޖެހޭ ކަމަށް އޮޑިޓުން ބުނެއެވެ.
ނަމަވެސް، ދިއްފުށި ކައުންސިލުގެ އިދާރާގެ ފާސް ކުރެވުނު ބަޖެޓާއި އެ ބަޖެޓުން ހޭދަ ކުރެވުނު ގޮތުގެ ބަޔާނުގައި ފައިނަލް ބަޖެޓުގެ ގޮތުގައި ހިމަނާފައިވާ އަދަދުތަކާއި، ޕަބްލިކް އެކައުންޓިންގ ސިސްޓަމުން ފައިނަލް ބަޖެޓްގެ ގޮތުގައި ދައްކާ އަދަދުތަކާއި ދެމެދު ޖުމްލަ 100,979 (އެއް ސަތޭކަ ހާސް ނުވަ ސަތޭކަ ހަތްދިހަ ނުވައެއް) ރުފިޔާ ގެ ފަރަގު އެބަހުރި ކަމަށެވެ. އެހެންކަމުން އެ ބަޔާނުގައި ފައިނަލް ބަޖެޓުގެ ގޮތުގައި ހިމަނާފައިވާ އަދަދުގެ ސައްހަ ނޫން ކަމަށް އޮޑިޓުގެ ރިޕޯޓުގައި ބުނެފައިވެއެވެ.
އޮޑިޓުން ބުނީ ފާސްކުރެވުނު ބަޖެޓާއި އެބަޖެޓުން ހޭދަކުރި ގޮތުގެ ބަޔާނުގައި ފައިނަލް ބަޖެޓާއި ކުރި ޚަރަދުގެ ސައްހަ އަދަދު ނުހިމަނާނަމަ މާލީބަޔާނުގެ ސައްހަކަން ގެއްލިގެން ދާނެ ކަމަށެވެ.
އޮޑިޓަރ ޖެނެރަލްގެ އޮފީހުން މި މައްސަލައިގައި ލަފާދީފައިވަނީ "އިންޓަނޭޝަނަލް ޕަބްލިކް ސެކްޓަރ އެކައުންޓިންގ ސްޓޭންޑަރޑް (އިޕްސަސް): ފައިނޭންޝަލް ރިޕޯޓިންގ އަންޑަރ ދަ ކޭޝް ބޭސިސް އޮފް އެކައުންޓިންގ"ގައި ވާގޮތުގެ މަތިން ކައުންސިލުގެ އިދާރާގެ ފާސް ކުރި ބަޖެޓާއި، ހިނގި ހަރަދާއި، ފައިނަލް ބަޖެޓުގެ ގެ މައުލޫމާތު ފާސް ކުރެވުނު ބަޖެޓާއި އެ ބަޖެޓުން ހޭދަ ކުރެވުނު ގޮތް ބަޔާނުގައި ހިމެނުމަށެވެ.
