ނޮވޭވެކްސް އިން ކޮވިޑް-19 އަށް އުފެއްދި ވެކްސިންގެ ކްލިނިކަލް ޓްރެއަލް ކާމިޔާބު

ނޮވޭވެކްސް އިން ކޮވިޑް-19 އަށް އުފައްދަމުންދާ ވެކްސިންގެ ކްލިނިކަލް ޓްރެއަލް ކާމިޔާބު ކަމަށާއި އެވެކްސިނަކީ ބޭނުންކުރުމަށް ރައްކާތެރި ވެކްސިނެއްކަމަށް އެކަމާ ގުޅޭގޮތުން ހަދާފައިވާ ދިރާސާއެއްގައި ބަޔާންކޮށްފި އެވެ.

ނިއު އިންގްލެންޑްގެ މެޑިސިން ޖާރނަލް އެއްގައި ޝާއިއުކޮށްފައިވާ މިދިރާސާގައި ބުނެފައިވަނީ މިވެކްސިންގެ ސަބަބުން ދިފާއީ ނިޒާމު ވަރުގަދަކޮށްދޭ ކަމަށެވެ. މިވެކްސިންގެ ކްލިނިކަލް ޓްރެއަލްގެ ނަތީޖާ އެ ކުންފުނިން ވަނީ އޮގަސްޓް މަހު އިއުލާންކޮށްފައެވެ.

ވެކްސިންގެ ކްލިނިކަލް ޓްރެއަލްގައި ސިއްހަތު ރަނގަޅު 131 މީހަކަށް ވަނީ ވެކްސިން ދީފައެވެ. އެއީ މެއި މަހުގެ ތެރޭގައެވެ. މީގެތެރެއިން 83 މީހުންގެ ހަށިގަނޑުގެ ދިފާއީ ނިޒާމު ވައިރަސް އާ ދެކޮޅަށް މަސައްކަތްކުރި އެވެ.

ކްލިނިކަލް ޓްރެއަލް ކުރިޔަށް ގެންގޮސްފައިވާ ވޮލަންޓިއަރުންނަކީ އޮސްޓްރޭލިއާގެ ދެ ސަރަހައްދަކުން އައިސްފައިވާ މީހުންނެވެ. އަދި އެއެންމެންނަކީވެސް އުމުރުން 60 އަހަރުން ދަށުގެ މީހުންނެވެ. މި ޓްރެއަލްގައި ކުރިން ކޮވިޑް-19 ޖެހި ރަނގަޅުވެފައިވާ މީހުން ނުހިމަނައެވެ.

ފޭސް 1 ގެ ޓްރެއަލް ގައި ޑޮކްޓަރުން ބަލާފައިވަނީ ވެކްސިން އަކީ ބޭނުންކުރަން ރައްކާތެރި ވެކްސިނެއްތޯ އެވެ. މީގެއިތުރުންވެސް ވެކްސިން ޖަހައިގެން ވައިރަސްއާ ދެކޮޅަށް ހަށިގަނޑުގެ ދިފާޢީ ނިޒާމު އިތުރަށް މަސައްކަތްކުރޭތޯ ވަނީ ބަލާފައެވެ.

ވެކްސިން ޖެހުމަށްފަހު 35 ދުވަސްވަންދެން އެމީހުންގެ ހަށިގަނޑުގައި އެއްވެސް ބައްޔެއްގެ ނިޝާނެއް ހުރިތޯ އާއި އިތުރު ގޯހެއް ހަށިގަނޑުގައި ހުރިތޯ ވަނީ ބަލާފައެވެ. 35 ވަނަ ދުވަހު އެފަދަ އެއްވެސް ކަމެއް ފާހަގަކުރެވިފައިނުވާ ކަމަށް މިދިރާސާއިން ދައްކައެވެ. ނަމަވެސް އެކެއްގެ ފުށުން ހުމުގެ އަސަރު ފެނުނު ކަމަށް ދިރާސާގައި ބުނެފައިވެއެވެ. އެހެންނޫނީ އެއްވެސް މީހެއްގެ ހަށިގަނޑުން ވެކްސިންގެ ސަބަބުން އިތުރު ބަދަލުތަކެއް ފެނިފައެއްނުވެ އެވެ.

ހުރިހާ ވޮލަންޓިއަރުންގެ ހަށިގަނޑުންވެސް ވެކްސިންގެ ދެ ވަނަ ޑޯޒް ޖެހުމާއެކު އެންޓިބޮޑީސް އުފައްދައިދިންކަމަށް ދިރާސާގައި ބުނެއެވެ.

އެމެރިކާގައި މިހާރުވެސް ފަސް ވެކްސިނެއް ކްލިނިކަލް ޓްރެއަލް ގައި އުޅޭއިރު މުޅި ދުނިޔޭގައި 33 ވެކްސިނެއް ކްލިނިކަލް ޓެރެއަލް ގައި އުޅޭކަމަށް ޑަބްލިޔުއެޗްއޯއިން ބުނެއެވެ.