މިއަދު ޕޮޒިޓިވްވީ 141 މީހުން

އިތުރު 141 މީހަކު ކޮވިޑް-19ށް ޕޮޒިޓިވް ވެއްޖެއެވެ.

ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ކޮށްފައިވާ ޓްވީޓެއްގައި ބުނީ، މި މީހުންގެ ތެރެއިން 98 މީހުންނަކީ ދިވެހިން ކަމަށެވެ. އަދި ބާކީ ތިބި 43 މީހުންނަކީ ބިދޭސީން ކަމަށެވެ. 141 ކޭސް ތެރެއިން 134 ކޭސްއެއް ރިޕޯޓް ކުރެވިފައިވަނީ މާލެ ސަރަހައްދުންނެވެ. އަދި 8 ކޭސް ރިޕޯޓް ކުރެވިފައިވަނީ އަތޮޅު ތެރެއިންނެވެ. މި އަދަދުތަކާއި އެކު ރާއްޖޭގައި ކޮވިޑަށް ޕޮޒިޓިވްވި މީހުންގެ އަދަދު އުޅެނީ 8281 ގައެވެ.

ބަލިން ފަސޭހަވި މީހުންގެ އަދަދު އުޅެނީ މިއަދު ރަނގަޅުވި 145 މީހުންނާ އެކު 5483 ގައެވެ. ހޮސްޕިޓަލުގައި އެޑްމިޓް ކޮށްގެން މި ވަގުތު ފަރުވާދެމުން ދަނީ 157 މީހަކަށެވެ. މި ފަހަކަށް އައިސް ރަށްރަށުން ވެސް ކޮވިޑް-19 ކޭސްތައް ރިޕޯޓް ކުރެވޭ މިންވަރު އަންނަނީ އިތުރު ވަމުންނެވެ. އެގޮތުން ބުރާސްފަތި ދުވަހުގެރޭ ހައެއްގެ ނިޔަލަށް 39 ރަށަކުން ކޮވިޑުގެ ކޭސްތައް ރިޕޯޓް ކުރެވިފައިވާއިރު 20 ރިސޯޓަކުން ވެސް ވަނީ ކޭސްތައް ފެނިފައެވެ. މި ރިސޯޓުތަކުން 16 ފަތުރުވެރިންނާއި 45 މުވައްޒަފުން ވަނީ ޕޮޒިޓިވްވެފައެވެ.

މި މަހަށް އެކަނި ބަލާލިޔަސް ރާއްޖޭގައި ރިޕޯޓް ކުރެވޭ ކޭސްތަކުގެ އަދަދު އުޅެނީ 100 އިން މަތީގައެވެ. ބަލި ކޮންޓްރޯލް ކުރުމަށް މިހާރު ވެސް ވަނީ ގިނަ ފިޔަވަޅުތަކެއް އަޅާފައެވެ. ނަމަވެސް އާއްމުންގެ ފަރާތުން އެކަށީގެންވާ ވަރަށް އެއްބާރުލުން ނުލިބޭނަމަ ކޭސްތަކުގެ އަދަދު މައްޗަށް ގޮސް ދެވަނަ ލޮކްޑައުން އަކަށް ހިނގައިދާނެ ކަމުގެ އިންޒާރު ސިއްހީ މާހިރުން ދަނީ ތަކުރާރުކޮށް ދެމުންނެވެ.