އެމްޑަބްލިއުއެސްސީގެ ފްލެޓްތައް 72 ފަރާތަކަށް

މާލެ ވޯޓަރ އެންޑް ސްވަރޭޖް ކޮމްޕެނީ، އެމްޑަބްލިއުއެސްސީގެ ހިޔާ ފްލެޓްތަކަށް ކުރިމަތިލި ހުރިހާ ފާރާތްތަކަށްވެސް ފްލެޓް ލިބޭނެ ކަމަށް އެކުންފުނިން ބުނެފިއެވެ.

ބުރާސްފަތި ދުވަހު އެމްޑަބްލިއުއެސްސީ އިން ކުރިއަށް ގެންދިޔަ ނޫސްވެރިންގެ ބައްދަލުވުމުގައި ވާހަކަދައްކަވަމުން އެކުންފުނީގެ މެނޭޖިން ޑިރެކްޓަރު ހަސަން ޝާހް ވިދާޅުވީ، ފްލެޓަށް ކުރިމަތިލާފައިވާ 72 ފަރާތައްވެސް ފްލެޓް ލިބިފައިވާ ކަމަށެވެ.

Advertisement

ފްލެޓަށްއެދި ހުށައެޅި ހުރިހާ ފަރާތަކަށް ފްލެޓް ލިބިފައިވާ އިރު، އެހުރިހާ ފަރާތްތަކަކީވެސް ޝަރުތުހަމަވާ ފަރާތްތައް ކަމަށާއި، ބާކީ ހުރި ފްލެޓްތަކަށް ކުރިމަތި ލުމުގެ ފުރުސަތުވެސް ލިބިގެންދާނީ ހަމަ އެމްޑަބްލިއެސްސީގެ މުވައްޒަފުންނަށް ކަމަށް ޝާހް ފާހަގަކުރެއްވިއެވެ. ޝާހް ވަނީ އެކުންފުނިން ފްލެޓަށް ކުރިމަތިލި ފަރާތްތަކުގެ ތެރެއިން ގިނަ ފަރާތްތަކުން ކުރިމަތިލާފައި ވަނީ ދެ ކޮޓަރި އަދި ތިން ކޮޓަރީގެ އެޕާޓްމަންޓްތަކަށް ކަމަށް ފާހަގަކުރައްވާފައެވެ.

އެގޮތުން، 15 ބުރީގެ ދެ ޓަވަރުގެ މަސައްކަތް އެމްޑަބްލިއުއެސްސީ އިން ކުރިއަށް ގެންގޮސްފައިވާ އިރު، އެކުންފުނިން ތަރައްގީކޮށްފައިވާ އެއް ކޮޓަރީގެ އެޕާޓްމަންޓް ތަކަކީ 393.95 އަކަފޫޓާއި 405.18 އަކަފޫޓާ ދެމެދުގެ އެޕާޓްމަންޓުތަކެކެވެ. އަދި ދެ ކޮޓަރީގެ އެޕާޓްމެންޓްތަކުގައި 692.63 އަކަފޫޓާއި 701.28 އަކަފޫޓު ހުންނަ އިރު، މި އެޕާޓްމަންޓް ތަކުގައި މެއިޑްރޫމެއް ވެސް ހުރެއެވެ. އެމްޑަބްލިއުއެސްސީ އިން ތަރައްގީކުރި ތިން ކޮޓަރީގެ އެޕާޓްމެންޓް ތަކަކީ 734 އަކަ ފޫޓާއި 720.08 އަކަފޫޓާ ދެމެދުގެ އެޕާޓްމަންޓުތަކެކެވެ.

ޝާހް ވިދާޅުވީ، މިޓަވަރުތަކުގެ ތެރެއިން އެ ކުންފުނިން އެންމެ ފުރަތަމަ މަސައްކަތް ފެށީ އެއް ޓަވަރު ނިންމަން ކަމަށާއި އެ ޓަވަރުގެ ސްޓްރަކްޗާ އެއްކޮށް ނިމި 55 އިންސައްތަ އާއި 60 އިންސައްތަ އާއި ދެމެދުގެ މަސައްކަތް މިހާރު ނިމިފައިވާ ކަމަށެވެ. އެހެންކަމުން 2021 ވަނަ އަހަރުގެ ޖޫން މަހުގެތެރޭގައި ފްލެޓަށް ވަދެވޭނެ ކަމަށް ޝާހް ފާހަގަކުރައްވައެވެ.

ޝާހް ވަނީ އެމްޑަބްލިއުއެސްސީ ގެ ފްލެޓްތައް ތަރައްގީކުރެވިގެން ދަނީ ހުޅުމާލޭ ދެވަނަ ފިޔަވަހީގެ މުހިންމު ސަރަހައްދެއްގައި ކަމަށް ވިދާޅުވެ، އެކުންފުނިން ތަރައްގީކުރާ އެޕާޓުމެންޓުތަކަކީ ސައިޒުގެ ގޮތުން ތަނަވަސް ތަންތަން ކަމަށް ފާހަގަކުރައްވާފައެވެ.