ކޮވިޑް-19ގެ ޕެންޑަމިކްއާ ގުޅިގެން ރައްޔިތުންނަށް ވަރަށް ފުރިހަމަ ނަމޫނާއެއް އެމެރިކާގެ ރައީސް ޑޮނަލްޑް ޓްރަމްޕް ދައްކާމުން ގެންދަވާ ކަމަށް ވިދާޅުވެ، އެމެރިކާގެ ރިޔާސީ އިންތިޚާބަށް ވާދަ ކުރައްވާ އެގައުމުގެ ކުރީގެ ނައިބް ރައީސް ޖޯ ބައިޑަން ފާޑު ވިދާޅުވެއްޖެއެވެ.

ޖޯ ބައިޑަން މިހެން ވާހަކަދެއްކެވީ، އިންތިޚާބު ކައިރިވެފައިވަނިކޮށް މިޕެންޑަމިކްގެ ތެރޭގައި ސަޕޯޓަރުންނާއި ބައްދަލު ކުރެއްވުން މަދު ކުރެއްވުމާ ގުޅިގެން ބައެއް ސަޕޯޓަރުންގެ އިތުރުން ޓްރަންޕް އެބޭފުޅާގެ ކެންޕެއިން ޝެޑިއުލްއާ ގުޅޭގޮތުން ސުވާލު ކުރެއްވުމުންނެވެ.

ބައިޑަން ވިދާޅުވީ މީހުންނާ ބައްދަލުކޮށް ބޭރަށް ނުކުމެ އުޅެން ބޭނުންވާ ކަމަށާއި، ކެންޕޭންގެ ހަރަކާތްތައް ކުރިއަށް ގެންދަން ބޭނުންވާ ކަމަށެވެ. ނަމަވެސް މިހާރުގެ ހާލަތު އެގޮތަށް ތަން ނުދޭ ކަމަށް ބައިޑަން ވިދާޅުވިއެވެ. އަދި ޓްރަންޕަށް މިސާލު ޖައްސަވާ ބައިޑަން ވިދާޅުވީ ޕެންކަމިކްގެ ހާލަތުގައި މީހުން އެއްކޮށް ރައީސް ޓްރަންޕް މިސާލު ދައްކަވަމުން ގެންދަވާ ކަމަށެވެ.

މީގެ އިތުރުން ބައިޑަން ވިދާޅުވީ ރައްކާތެރި ގޮތުގައި ކެންޕޭންގެ ހަރަކާތްތައް ކުރިއަށް ގެންދިއުމުގައި އަމަލު ކުރާނެ ގޮތާއި މެދު މެޑިކަލް އެކްސްޕާޓުންނާއި ބައްދަލުކުރައްވާ މަޝްވަރާ ކުރައްވާފައިވާ ކަމަށެވެ.

މިހާލަތުގައި ކެންޕޭން ކުރިއަށް ގެންދާނެ ގޮތުގައި ޚާއްސަ ޕްރޮޓޮކޯލެއް އެކުލަވާފައިވާކަން ފާހަގަކުރައްވައި ބައިޑަން ވިދާޅުވީ ދަތުރުކުރާނެ ފްލައިޓާއި، ފްލައިޓަށް އަރާނެ ގޮތާއި، އިވެންޓްތައް ކުރިއަށް ގެންދާނެ ގޮތާއި، ގައިދުރުކަން ބަހައްޓާނެ ގޮތާއި އަދި މީހުންނާއި ބައްދަލުކުރުމުގައި އަމަލު ކުރާނެ ގޮތްތައް ލިޔެފައިވާ ވަރަށް ފުރިހަމަ ޕްރޮޓޮކޯލެއް އެކުލަވާލާފައިވާ ކަމަށެވެ.

ބައިޑަން ވިދާޅުވީ ރައީސް ޓްރަންޕް ރައްޔިތުންނަށް ނުރަނގަޅު މިސާލު ދެއްކެވި ނަމަވެސް އެގޮތަށް އަމަލު ނުކުރާނެ ކަމަށެވެ. އެގޮތުން މާސްކް އެޅުމާއި، ގައިދުރުކަން ބެހެއްޓުމުގެ އިތުރުން ޕެންޑަމިކްގެ ގައިވާއިދާ އެއްގޮތަށް އަމަލު ކުރާނެ ކަމަށް ބައިޑަން ވިިދާޅުވިއެވެ.