މިއަދު 137 މީހަކު ޕޮޒިޓިވްވެ، 73 މީހަކު ބަލިން ރަނގަޅުވި
2 ސެޕްޓެމްބަރު 2020 | ބުދަ 17:27129 މީހުންނަކީ މާލޭ ސަރަޙައްދުން ޕޮޒިޓިވްވި މީހުން
ކޮވިޑް-19 ރެންޑަމް ސާމްޕަލް ނެގުމުގެ ތެރެއިން
ރާއްޖެއިން އިތުރު 137 މީހަކު ކޮވިޑް-19 އަށް ޕޮޒިޓިވް ވެއްޖެއެވެ.
ބުދަ ދުވަހު ހެލްތް ޕްރޮޓެކްޝަން އޭޖެންސީ (އެޗްޕީއޭ) އިން ބުނީ، އިތުރު 137 މީހަކު ކޮވިޑް-19 އަށް ޕޮޒިޓިވްވެފައިވާއިރު، އޭގެ ތެރޭގައި ހިމެނެނީ 96 ދިވެހިންނާއި، 41 ބިދޭސީން ކަމަށެވެ. އަދި އޭގެ ތެރެއިން 129 މީހުންނަކީ މާލޭ ސަރަޙައްދުން ޕޮޒިޓިވްވި މީހުން ކަމަށާއި، 8 މީހުންނަކީ އަތޮޅު ތެރެއިން ޕޮޒިޓިވްވި މީހުން ކަމަށް އެޗްޕީއޭ އިން މައުލޫމާތު ދެއެވެ.
އެއާއެކު ރާއްޖެއިން ކޮވިޑް-19 އަށް ޕޮޒިޓިވްވި މީހުންގެ ޖުމުލަ އަދަދު ވަނީ 8140ށް އަރާފައެވެ.
އޭގެ އިތުރުން، އިތުރު 73 މީހަކު ބަލިން ރަނގަޅު ވެފައިވާއިރު، ރާއްޖެއިން ކޮވިޑް-19 ޖެހިގެން ރަނގަޅުވި މީހުންގެ ޖުމުލަ އަދަދު ވެސް ވަނީ 5338ށް އަރާފައެވެ. އަދި މި ވަގުތުގެ އެކްޓިވް ކޭސްތަކުގެ އަދަދަކީ 2767 އެވެ.
އެޗްޕީއޭއިން ބުނީ، މި ވަގުތު ވެސް 1365 މީހަކަށްް އައިސޮލޭޝަން ފެސިލިޓީތަކުގައި ފަރުވާދެމުންދާ ކަމަށެވެ. އަދި 166 މީހަކަށް ހޮސްޕިޓަލުތަކުގައި ފަރުވާދެމުންދާ ކަމަށް އެޗްޕީއޭ އިން މައުލޫމާތުދެއެވެ.
ފާއިތުވި ދުވަސްތަކުގައި ގިނަ ކޭސްތަކެއް ރިޕޯޓް ކުރެވެމުންދާއިރު، ބުދަ ދުވަހު ހެލްތް އިމަރޖެންސީ އޮޕަރޭޝަންސް ސެންޓަރުން ބޭއްވި ނޫސްވެރިންގެ ބައްދަލުވުމުގައި އެ ސެންޓަރުގެ ތަރުޖަމާނު ޑރ ނަޒްލާ ރަފީޤު ވިދާޅުވީ، މިހާރު އަޅާފައިވާ ފިޔަވަޅުތަކުގެ ނަތީޖާ ފެންނަން އަދި 2 ހަފްތާއެއްވަރު ނަގާނެ ކަމަށެވެ. އަދި މިހާރު ފެންނަމުންދާ ކޭސްތަކާއި، ރާއްޖޭގެ ޙާލަތަށް ބަލައި، ފިޔަވަޅުތައް އިތުރަށް ވަރުގަދަ ކުރުމާއި، ލުއި ދިނުމާމެދު ގޮތެއް ނިންމަވާނެ ކަމަށް ޑޮކްޓަރ ވިދާޅުވިއެވެ.
