ބިދޭސީ ގާނޫނީ ވަކީލުންނަށް ވަކާލާތު ކުރުމުގެ ހުއްދަ ދިނުމާބެހޭ ގަވާއިދު ގެޒެޓްކޮށްފި
2 ސެޕްޓެމްބަރު 2020 | ބުދަ 10:19ދަށު ކޯޓުގައި ވަކާލާތު ކުރަންނަމަ، 2،000ރ
ދިވެހިރާއްޖޭގެ ބަރ ކައުންސިލްގެ މެމްބަރުން ރައްޔިތުންގެ މަޖިލީހުގެ ޖުޑީޝަރީ ކޮމެޓީގައި
ބިދޭސީ ގާނޫނީ ވަކީލުންނަށް ރާއްޖޭގައި ވަކާލާތު ކުރުމުގެ ހުއްދަ ދިނުމާބެހޭ ގަވައިދު ސަރުކާރުގެ ގެޒެޓްގައި ޝާއިއުކޮށްފިއެވެ.
މި ގަވާއިދަށް އަމަލު ކުރަން ފަށާފައިވަނީ ބުދަ ދުވަހުން (މިއަދު) ފެށިގެންނެވެ.
ބިދޭސީ ގާނޫނީ ވަކީލުންނަށް ވަކާލާތު ކުރުމުގެ ހުއްދަ ދިނުމާބެހޭ ގަވާއިދުގައި ބުނެފައިވާ ގޮތުން، ހުއްދައަށް އެދި ހުށަހަޅަން ޖެހެނީ ބަރ ކައުންސިލަށެވެ. ބަރ ކައުންސިލަށް ހުއްދައަށް ހުށަހަޅާއިރު، އެ ގާނޫނީ ވަކީލުގެ ޕާސްޕޯޓް ކޮޕީއާއި ތައުލީމާއި ޕޮލިސް ރިޕޯޓްފަދަ މުހިއްމު ލިޔުންތައް ހުށަހަޅަން ޖެހެއެވެ.
މީގެއިތުރުން، ބިދޭސީ ގާނޫނީ ވަކީލު ޝަރީއަތުގައި ވާހަކަދެއްކުމަށް ގަސްތު ކުރާ ބަހުން ވާހަކަދެއްކުމާމެދު މައްސަލަ ބައްލަވާ ފަނޑިޔާރުގެ އިއުތިރާޒެއް ނެތްކަން އެނގޭނެ ލިޔުމެއް ނުވަތަ ބިދޭސީ ގާނޫނީ ވަކީލަށް ޝަރީއަތުގެ މަޖިލީހުގައި ހިނގާ ކަންކަން ތަރުޖަމާކޮށްދިނުމާއި، ބިދޭސީ ގާނޫނީ ވަކީލު ދައްކާ ވާހަކަތައް ޝަރީއަތަށް ތަރުޖަމާ ކޮށްދިނުމަށްޓަކައި ތަރުޖަމާނެއް އައްޔަން ކޮށްފައިވާކަން އަންގައިދޭ ލިޔުމެއް ވެސް ހުއްދައަށް އެދޭއިރު ހުށަހަޅަން ޖެހެއެވެ.
މިގަވާއިދުގެ ދަށުން ބިދޭސީ ގާނޫނީ ވަކީލުންނަށް ހުއްދަ ދިނުުގައި އެވަކީލަކު ވަކާލާތުކުރަން އެދޭ މައްސަލަ ހިނގަމުންދާ ޝަރުއީ ކޯޓަކުން ބަލައި، ހުއްދަ ދިނުމަށް ފީ އެއް ނެގިދާނެ ކަމަށް ބުނެފައި ވެއެވެ.
އެގޮތުން، ދަށު ކޯޓުގައި ވަކާލާތު ކުރުމަށް ނަމަ، 2،000ރ، ހައިކޯޓުގައި ވަކާލާތު ކުރަންނަމަ، 5،000ރ އަދި ސުޕްރީމް ކޯޓުގައި ވަކާލާތު ކުރަންނަމަ، 10،000ރ ގެ ފީއެއް ނެގިދާނެ ކަމަށް ގަވާއިދުގައި ބުނެފައިވެއެވެ.
މީގެއިތުރުން، ބިދޭސީ ގާނޫނީ ވަކީލުންނަށް ވަކާލާތު ކުރުމުގެ ހުއްދަ ދެވޭނީ އެއް އަހަރު ދުވަހުގެ މުއްދަތައް ކަމަށާއި ނަމަވެސް މުއްދަތު އިތުރު ކުރަން ބޭނުންނަމަ، ބަރ ކައުންސިލަށް ހުށަހަޅައިގެން ހުއްދަ އިތުރު ކުރުމުގެ ފުރުސަތު ވެސް ލިބިގެންދެއެވެ.
