މިފްކޯގެ ސްޓޯރޭޖް ކެޕޭސިޓީ އިތުރު ކުރުމަށް 30 މިލިއަން ޑޮލަރުގެ މަޝްރޫއެއް

މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) އަށް ދިމާވެފައިވާ ސްޓޯރޭޖްގެ މައްސަލަ ހައްލު ކުރުމަށް 30 މިލިއަން ޑޮލަރުގެ މަޝްރޫއެއް ކުރިއަށް ގެންދިއުމަށް ތައްޔާރުވެފައިވާ ކަމަށް ސްޓޭޓް ޓްރޭޑިން އޯގަނައިޒޭޝަންގެ މެނޭޖިން ޑިރެކްޓަރު ހުސެއިން އަމްރު ވިދާޅުވެއްޖެއެވެ.

އެސްޓީއޯގެ ވާޗުއަލް އޭޖީއެމްގައި ވާހަކަދައްކަވަމުން އަމްރު ވިދާޅުވީ، އެސްޓީއޯ އަށް އެންމެ ބޮޑު ގެއްލުމެއް މާލީ ގޮތުން ލިބެމުން އަންނީ މިފްކޯގެ ސަބަބުން ކަމަށާއި މިފްކޯ އިން މިހާ ބޮޑު ގެއްލުމެއް މި ލިބެނީ މިފްކޯގެ ބިޒްނަސް މޮޑެލްގެ ސަބަބުން ލިބޭ ގެއްލުންތަކެއް ކަމަށެވެ.

އެގޮތުން މިފްކޯގެ ސްޓޯރޭޖް ކުޑަވުމުގެ ސަބަބުން، މަސްވެރިން ބާނާ މަސް، ބޮޑު އަގުގައި ގަނެ އެ ސްޓޯރ ނުކުރެވި، އަދި އެކަށީގެންވާ ވަރަށް އަވަހަށް ބަންދު ނުކުރެވުމުގެ ސަބަބުން ގަންނަ މަސްތައް މިފްކޯ އިން ގަންނަ އަގަށް ވުރެ ހެޔޮ އަގުގައި ބޭރުގެ ވިއްކާލަން ޖެހޭ ކަމަށް އަމްރު ފާހަގަކުރިއެވެ. އަދި މިގޮތަށް ބޭރުގެ މާކެޓަށް ގިނަ އަދަދަކަށް ރާއްޖޭގެ މަސް އެކްސްޕޯޓް ކުރުމުން ރާއްޖޭގެ މަހުގެ ވެލިއު ދަށްވެ އަގު ވެއްޓޭ ކަމަށް ވެސް އަމްރު ވަނީ ފާހަގަކޮށްފައެވެ.

އެހެން ކަމުން، މިފްކޯ އަކީ ފައިދާވާ ކުންފުންޏަކަށް ހެދުމަށްޓަކައި ގިނަ މަސައްކަތްތަކެއް މިހާރު ކުރަމުން އަންނަ ކަމަށާއި އެމަސައްކަތުގެ ތެރެއިން މިފްކޯގެ ބިޒްނަސް މޮޑަލަށް ދާއިމީ ހައްލެއް ހޯދުމަށް ސަރުކާރާއެކު މަޝްވަރާތައް ކުރެވި އެދެވޭ ކުރިއެރުމެއް ލިބިފައިވާ ކަމަށް އަމްރު ވިދާޅުވިއެވެ.

އަމްރު ވިދާޅުވީ، މިފްކޯގެ ސްޓޯރޭޖް ކެޕޭސިޓީ އިތުރުކުރުމަށް، މިިހާރު 3،000 ޓަން ސްޓޯރ ކުރެވޭ ކެޕޭސިޓީ 10،000 ޓަން ސްޓޯރ ކުރެވޭ ކެޕޭސިޓީއަކަށް ހެދުމަށް 30 މިލިއަން ރުފިޔާގެ މަޝްރޫއެއް ފެއްޓުމަށް މިހާރު ހަމަޖެހިފައިވާ ކަމަށް އަމްރު ވިދާޅުވިއެވެ. މި ޕްރޮޖެކްޓުގެ ދަށުން ސްޓޯރޭޖް އިތުރު ކުރުމުގެ އިތުރުން، ކޫއްޑޫ އާއި ފެލިވަރުގެ ބަނދަރު ތަރައްގީ ކުރެވިގެންދާނެ ކަމަށާއި ކޯލްޑް ސްޓޯރޭޖާއި ކޭނިން ކެޕޭސިޓީ ވެސް އިތުރު ކުރެވޭނެ ކަމަށް އަމްރު ފާހަގަކުރެއްވިއެވެ.

މީގެ ސަބަބުން މިފްކޯ އިން ގަންނަ މަހުގެ ވެލިއު އެޑްކުރުމަށްފަހު އެކްސްޕޯޓް ކުރުމަށް މަގުފަހިވާނެ ކަމަށާއި މަސްވެރިކަން އިތުރުވާ ދުވަސްވަރު ބޮޑެތި އަދަދުތަކުން ނުއަގުގައި މަސް ވިއްކަން ޖެހުމުގެ މައްސަލަ އަށް ހައްލު ލިބިގެންދާނެ ކަމަށް އަމްރު ފާހަގަ ކުރެއްވިއެވެ. އަމްރު ވިދާޅުވީ މީގެ ސަބަބުން ދިވެހި މަސް ކޮންޓްރޯލްކޮށް މާކެޓަށް ނެރުމުގެ ފުރުސަތު ލިބިގެންދާނެ ކަމަށެވެ.

މީގެ އިތުރުން، މިފްކޯގެ ހިންގުން ހަރުދަނާކޮށް އިންޓަނޭޝަނަލް މާކެޓުގައި މިފްކޯގެ ބްރޭންޑް ކުރިއެރުވުމުގެ މުހިންމުކަން ފާހަގަކޮށް އެކަމަށް މަސައްކަތް ކުރަމުންދާ ކަަމަށްވެސް އަމްރު ވިދާޅުވިއެވެ.

މިދިޔަ އަހަރު އެކަނިވެސް މިފްކޯ އިން 116 މިލިއަން ރުފިޔާގެ ގެއްލުމެއް އެސްޓީއޯ އަށް ލިބިފައިވާއިރު، އޭގެ ކުރީ އަހަރު، 2018 ވަނަ އަހަރު 199 މިލިއަން ރުފިޔާގެ ގެއްލުމެއް އެސްޓީއޯ އަށް ވަނީ ލިބިފައެވެ.