24 ގަޑިއިރު ނުވަނީސް ތިނަދޫގައި ކޮވިޑް ފެސިލިޓީއެއް ގާއިމްކުރަން ނިންމުމަކީ މި ސަރުކާރުން ރައްޔިތުންނަށް ދެރަ ގޮތެއް ވިޔަނުދޭނެކަމުގެ ހެއްކެއް: ފިރުޝާން

24 ގަޑިއިރު ނުވަނީސް ތިނަދޫގައި ކޮވިޑް ފެސިލިޓީއެއް ގާއިމްކުރަން ނިންމުމަކީ މި ސަރުކާރުން ރައްޔިތުންނަށް ދެރަ ގޮތެއް ވިޔަނުދޭނެކަމުގެ ހެއްކެއް ކަމަށް މަޑަވެލި ދާއިރާގެ މެމްބަރު ހުސައިން ފިރުޝާން ވިދާޅުވެއްޖެއެވެ.

ގދ. ތިނަދޫއިން ކޮވިޑް-19 އަށް ޕޮޒިޓިވްވި މީހާ ގއ. ވިލިނގިއްޔަ އެރުވިޔަ ނުދީ މުޒާހަރާ ކުރުމާއި ގުޅިގެން މެމްބަރު ފިރުޝަން ވަނީ ނުރުހުން ފާޅުކޮށްފައެވެ. އަދި އެ މައްސަލައިގައި، ރައްޔިތުންގެ މަޖިލީހުގައި ވިލިނގިލީ ދާއިރާގެ މެމްބަރާއި ހޫނު ޒުވާބެއް ކުރާ މަންޒަރު ދައްކުވައިދޭ ވީޑިއޯއެއްވެސް މީސް މީޑިއާގައި ވަނީ އާންމުވެފައެވެ.

ވީޑިއޯގައި ވެސް ފިރުޝާންވަނީ، އެއީ ހުރިހާ ރައްޔިތުންނަށް މި ދަނޑިވަޅުގައި ފަރުވާދިނުމަށް ގާއިކޮށްފައިވާ ތަނެއްކަން ތަކުރާރުކޮށް ފާހަގަކުރައްވައި އެކަން އެހެން ނުކުރެވޭނެ ކަމަށް ވިދާޅުވެފައެވެ. އަދި އެ އަމަލު ދިފާއުކުރުމުގެ މޭރުމަކުން މެމްބަރު ސަޢުދު ޙުސައިން ވާހަކަ ދެއްކެވުމުން ފިރުޝާން ވަނީ ކަން އޮތް ގޮތް ވިދާޅުވެ ބަލި މީހާ ރަށަށް އެރުވުމަށް ދެކޮޅު ހެދި ފަރާތްތަކުގެ އަމަލު ކުށްވެރި ކުރައްވާފައެވެ.

މިކަމާއި ގުޅިގެން ކުރި ޓުވީޓެއްގައި ފިރުޝާން ވަނީ، މުޅި ހުވަދު އަތޮޅު ރައްޔިތުންގެ ނަމުގައި އެޗްޕީއޭ އަށާއި ހެލްތު މިނިސްޓްރީ އަށާއި އަދި ނެޝަނަލް ޓާސްކު ފޯހަށް ވިލިނގިލީގައި ގާއިމުކޮށްފައި ހުރި ކޮވިޑް ފެސިލިޓީ އެހެން ރަށަކަށް ބަދަލު ކޮށްދިނުމަށް ގޮވާލާފައެވެ. އަދި މި މައްސަލައިގައި، ތިނަދޫ ދެކުނު ދާއިރާގެ މެންބަރު ޢަބްދުﷲ ސަނީފު ވަނީ ތިނަދޫގައި ކޮވިޑް ފެސިލިޓީއެއް ގާއިމުކުރުމަށް ރައީސް ހުއްދަ ދެއްވާފައިވާ ކަމަށް ވިދާޅުވެ، އެކަން ހާމަކުރައްވާފައެވެ. އޭނާ ވިދާޅުވީ، ހޯމަ ދުވަހު ހިނގައިދިޔަ ކަންތައްތަކުގެ ސަބަބުން ކޮވިޑް ފެސިލިޓީއެއް ތިނަދޫގައި ގާއިމްކުރަން ނިންމާފައިވާކަން ރައީސުލްޖުމްހޫރިއްޔާގެ އޮފީހުން އަންގާފައިވާ ކަމަށެވެ. މި އުފާވެރި ހަބަރާއި ގުޅިގެން މެމްބަރު ފިރުޝާން ކުރެއްވި ޓުވީޓެއްގައި ވަނީ މި ސަރުކާރުން ރައްޔިތުންނަށް ދެރަ ގޮތެއް ވިޔަކަ ނުދޭނެ ކަމަށް ވިދާޅުވެ ރައީސް ސޯލިހަށް ޝުކުރު އަދާ ކުރައްވާފައެވެ.

ތިނަދޫ އިން ކޮވިޑް-19 އަށް ޕޮޒިޓިވްވި މީހާ ގއ. ވިލިނގިލީ ކޮވިޑް ފެސިލިޓީއަށް ގެންދިއުމަށް އެ ރަށުގެ އިދިކޮޅު ސިޔާސީ މީހުން ދެކޮޅު ހަދައި އިހުތިޖާޖު ކުރުމުން ހުވަދު އަތޮޅު އުތުރުބުރީ އަތޮޅު ކައުންސިލުން ވަނީ އަތޮޅުގެ ރައްޔިތުންގެ ނަމުގައި އެކަން ކުއްވެރިކޮށްފައެވެ.