ޑރ. ނަޒްލާ ކޮވިޑަށް ނެގެޓިވް
31 އޯގަސްޓު 2020 | ހޯމަ 20:17ނަތީޖާ ލިބިފައިވަނީ ހޯމަ ދުވަހު
ޑރ. ނަޒްލާ ރަފީގު
ހެލްތް އިމަރޖެންސީ އޮޕަރޭޝަން ސެންޓަރ (އެޗްއީއޯސީ) ގެ ތަރުޖަމާނު ޑރ. ނަޒްލާ ރަފީގު ކޮވިޑް-19 އަށް ނެގެޓިވްވިކަން ހާމަކުރައްވައިފިއެވެ.
ހޯމަ ދުވަހުގެ ރޭ އެޗްއީއޯސީން ބޭއްވި ނޫސްވެރިންގެ ބައްދަލުވުމުގައި ބައިވެރިވެވަޑައިގެން ވާހަކަ ދައްކަވަމުން ޑރ. ނަޒްލާ ވިދާޅުވީ ރިލީޒް ސާމްޕަލްގެ ނަތީޖާ ލިބިވަޑައިގެންނެވީ ހޯމަ ދުވަހު ހެނދުނު ކަމަށެވެ.
ނަތީޖާ ނެގެޓިވްވުމާއި ގުޅިގެން ހޯމަ ދުވަހުގެ ރޭ ހެލްތް އިމަރޖެންސީ އޮޕަރޭޝަން ސެންޓަރުގައި ބޭއްވި ނޫސްވެރިންގެ ބައްދަލުމުގައި ވަނީ ބައިވެރިވެވަޑައިގެންފައެވެ.
އާއިލާ މެމްބަރެއް ކޮވިޑް-19 އަށް ޕޮޒިޓިވްވުމާ ގުޅިގެން މިދިޔަ މަހުގެ 14 އިން ފެށިގެން ހުންނެވީ ހޯމް ކަރަންޓީންގައެވެ.
ހޯމް ކަރަންޓީނުގައި ހުންނެވިއިރު ވެސް ޑރ. ނަޒްލާ ގެންދެވީ ގޭގައި ހުންނަވައިގެން އެޗްއީއޯސީގެ ނޫސްވެރިންގެ ބައްދަލުވުމުގައި ބައިވެރިވެވަޑައިގެން، ރައްޔިތުންނަށް މައުލޫމާތު ފޯރުކޮށްދެމުންނެވެ.
ޑރ. ނަޒްލާ އެޗްއީއޯސީގެ ތަރުޖަމާނަކަށް ހަމަޖައްސާފައިވަނީ ޖުލައި މަހުގެ 5 ވަނަ ދުވަހުއެވެ.
