ހިމަ ބިއްސަށް ޝައްކު ކުރެވުނު ކުއްޖާ، އެ ބައްޔަށް ނެގެޓިވް

ހިމަބިއްސަށް ޝައްކު ކުރެވުނު އުމުރުން 17 އަހަރުގެ ކުއްޖާ އެ ބައްޔަށް ޓެސްޓު ކުރި އިރު ނެގެޓިވްކަމަށް ހެލްތު މިނިސްޓްރީން ބުނެފިއެވެ.

މިނިސްޓްރީން މިހެން ބުނެފައިވާއިރު ހިމަބިހީގެ އިތުރު ކޭސްއަކާއި، ބައްޔަށް ޝައްކު ކުރެވޭ އިތުރު ފަރާތެއް ފެނިއްޖެކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ބުނެފައިވަނީ ހޯމަ ދުވަހުގެ ހެނދުނުގެ ވަގުތެއްގައެވެ. އެހެންނަމަވެސް، ހެލްތު މިނިސްޓްރީން މިއަދު ހަވީރު ބުނީ، އެ މިނިސްޓްރީން ބެލި ބެލުމުން ހިމަ ބިއްސަށް ޝައްކު ކުރެވުނު އެކުއްޖާއަކީ ހިމަ ބިހިން ރައްކާތެރިވުމަށް ޖަހާ މީސްލްސް ވެކްސިން ޖަހާފައިވާ ކުއްޖެއްކަމަށާއި، ކުރި ތަހުލީލުތަކުންވެސް އޭނާގެ ގައިގައި މީސްލްސްގެ ޢަލާމާތެއް ފެންނަން ނެތްކަމަށެވެ. އަދި މީސަލްއަށް ހެދި ޓެސްޓް ނެގެޓިވް ކަމަށެވެ.

2019 ވަނަ އަހަރު 66 ފަރާތެއް މީސްލްސް އަދި ރުބެއްލާއަށް ޓެސްޓް ކުރެވިފައިވާއިރު، ހިމަބިއްސަށް ޝައްކުކުރެވޭ ކޭސްއެއް 8 ޖެނުއަރީ 2020ގައި ރިޕޯރޓްކުރެވުމާއެކު، އެކަމާއި ގުޅިގެން ކުރަންޖެހޭ ތަހުޤީޤުތައް އެއޭޖެންސީއިން ފަށާފައިވާ ކަމަށް އެޗްޕީއޭއިން ބުނެއެވެ.

އެގޮތުން އެކުއްޖާގެ ފަރާތުން ބަލިފެތުރުމުގެ ފުރުޞަތު އޮތް ދުވަސްވަރު ދެނެގަނެ، އެދުވަސްތަކުގައި އެކުއްޖާއާއި އެކުގައި އުޅެފައިވާ ނުވަތަ ކައިރިވެފައިވާ ފަރާތްތައް ހޯދާ، އޭގެ ތެރެއިން މީސްލްސް ވެކްސިންގެ ދެޑޯޒް ހަމަކޮށްފައި ނުވާ ފަރާތްތަކަކަށް ވެކްސިން ޖެހޭނެ އިންތިޒާމު ހަމަޖެއްސުން ހިމެނޭ ކަމަށެވެ.

އެ އޭޖެންސީން ބުނީ ހިމަ ބިއްސަކީ ވައިގެ ޒަރީއާއިން ވަރަށް ހަލުވިކަމާއެކު ފެތުރޭ ބައްޔެއް ކަމުން، ވެކްސިންގެ ދެޑޯޒް ފުރިހަމަ ކޮށްފައި ނުވާ ފަރާތްތަކަށް، މި ބަލިޖެހިފައިވާ މީހެއްގެ ފަރާތުން ބަލި ފެތުރުމުގެ ފުރުޞަތު އޮންނާނެ ކަމަށެވެ.