ކޮރޯނާވައިރަސް އަށް ޓެސްޓު ކުރެވުނު 7 މީހުންގެ ޓެސްޓު ނަތީޖާ ނެގެޓިވް ކަމަށް އެޗްޕީއޭ އިން ބުނެފިއެވެ.
"ނޮވެލް ކޮރޯނާ ވައިރަސް" އަށް ޓެސްޓް ކުރެވުނު ފަރާތްތަކުގެ ޓެސްޓް ނަތީޖާ ނެގަޓިވް ވުމާ ބެހޭ ނޮވެލް ކޮރޯނާވައިރަސް ޖެހިފައި ހުރެދާނެކަމަށް ބެލެވޭ ފަރާތްތައް ދެނެގަތުމަށް ކުރިއަށްގެންދެވޭ ސަރވެއިލަންސްގެ ދަށުންބަލިހުރެދާނެކަމަށް ބެލެވޭ މިންގަނޑަށް ފެތޭ 20 އަހަރުގެ ޒުވާނެއް ފާހަގަކުރެވިގެން އައިސޮލޭޝަން ފެސިލިޓީއެއް ކަމަށްވާ ފުނަދޫގައި އެކަހެރިކޮށް ބަހައްޓައިގެން ފަރުވާދެވިފައިވެއެވެ. އަދި ނޮވެލް ކޮރޯނާވައިރަސް އަށް މި ފަރާތްތައް ޓެސްޓްކުރެވިފައިވާ ކަމަށާއި ޓެސްޓުގެ ނަތީޖާ ދައްކަނީ ނޮވެލްކޮރޯނާވައިރަސް އަށް ނެގެޓިވް ކަމަށް އެޗްޕީއޭ އިން ބުނެއެވެ.
މީގެ އިތުރުން، ބަލިހުރެދާނެކަމަށް ޝައްކުކުރެވޭ ފަރާތްތައް ދެނެގަތުމަށް ކަނޑައެޅިފައިވާ މިންގަޑުތަކަށް ނުފެތުނު ނަމަވެސް އިތުރު 6 ފަރާތެއްވަނީ ސާމްޕަލް ނަގާ ޓެސްޓު ކުރެވިފައިކަމަށް އެ އޭޖެންސީން ބުނެއެވެ. އެގޮތުން އެ ފަރާތްތަކުގެ ޓެސްޓުގެ ނަތީޖާ ވެސް ދައްކަނީ ނެގެޓިވް ކޮށްކަމަށެވެ.
މިހާތަނަށް ބަލިހުރެދާނެކަމަށް ބެލެވޭ ފަރާތްތައް ދެނެގަތުމަށް ކަނޑައެޅިފައިވާ މިންގަޑުތަކަށް ފެތިގެން އެކަހެރި ކުރެވި ޚިދުމަތްދީފައިވަނީ އެންމެ މީހަކަށެވެ. އަދި ޗައިނާއިން ދަތުރުކޮށްފައިވާ ދިވެހިންގެ ތެރެއިން ބަލީގެ އަލާމާތްތައް ހުރިކަމަށް ރިޕޯޓުކޮށްފައިވާ ނަމަވެސް ބަލިހުރެދާނެކަމަށް ޝައްކު ނުކުރެވޭ 4 މީހުންނާއި ބަލީގެ އަލާމާތެއް ނުފެންނަ، އެހެން ނަމަވެސް ޗައިނާއިން ދަތުރުކޮށްފައިވާ 2 ދިވެހިން ޓެސްޓުކުރެވުނު މީހުންގެ ތެރޭގައި ހިމެނެއެވެ.
މި ހުރިހާ ފަރާތްތަކަކަށްވެސް ނަތީޖާ މިހާރުވަނީ އެނގިފައިވާ ކަމަށާއި މި ނަތީޖާ ލިބިފައިވާތީ މިހުރިހާ ފަރާތްތައްވެސް މިހާރުވަނީ އެ އޭޖެންސީގެ މޮނިޓަރިންގެ ދަށުން ދޫކޮށްލެވިފައިކަމަށެވެ. މިއާއެކު މި ބައްޔަށް ޝައްކުކުރެވިގެން އެކަހެރިކޮށްފައިވާ އަދި މޮނިޓަރިންގައި ބެހެއްޓިފައިވާ އެއްވެސް ފަރާތެއް މިވަގުތު ނެތް ކަމަށް އެއޭޖެންސީން ބުނެއެވެ.
