ޝިޔާމު ވެސް 1000ރ އިން ޖޫރިމަނާ ކޮށްފި، ފައިސާ ދައްކާނަން: ޝިޔާމް
31 އޯގަސްޓު 2020 | ހޯމަ 10:59ޝިޔާމު ވިދާޅުވަނީ ދަނޑިވަޅުގެ ބޭނުން ހިފައި އިންޑިއާއިން ރާއްޖެއަށް އަތްގަދަ ކުރަމުންދާ ކަމަށް
ރައްޔިތުންގެ މަޖިލީހުގެ ނައިފަރު ދާއިރާގެ މެމްބަރު އަދި ޕީޕީއެމްގެ ނާއިބު ރައީސް އަހުމަދު ޝިޔާމް މިއަދު އިންޓަވިއު ދެއްވަނީ: ޖޫރިމަނާ ފައިސާ ދައްކަވާނެ ކަމަށް ވިދާޅުވި
އިދިކޮޅު ޕީޕީއެމް-ޕީއެންސީ ކޯލިޝަންގެ ޕީޕީއެމްގެ ނާއިބު ރައީސް އަދި ރައްޔިތުންގެ މަޖިލީހުގެ ނައިފަރު ދާއިރާގެ މެމްބަރު އަހުމަދު ޝިޔާމް 1000ރ އިން ޖޫރިމަނާ ކޮށްފިއެވެ.
ޝިޔާމް ޖޫރިމަނާކޮށްފައިވަނީ ހޯމަ ދުވަހު ފުލުހުންގެ އިދާރާއަށް ހާޒިރު ކުރުމަށްފަހުގަ އެވެ. ޝިޔާމް ފުލުހަށް ހާޒިރު ކުރަން އަންގާފައިވަނީ، "ރާއްޖެ ވިއްކާލުމާ ދެކޮޅަށް" މި ނަމުގައި މިދިޔަ ހުކުރު ދުވަހު އިދިކޮޅު ކޯލިޝަނުން މާލޭގައި ބޭއްވި ސައިކަލު ބުރާއެކު ބޭއްވި އެއްވުމާ ގުޅިގެންނެވެ.
ފުލުހުންގެ އިދާރާއަށް ހާޒިރުވުމަށްފަހު، ނޫސްވެރިނަށް މައުލޫމާތު ދެއްވަމުން ޝިޔާމްގެ ގާނޫނީ ވަކީލުން ވިދާޅުވީ، ފުލުހުން ތަހުގީގު ހިންގީ ޖިނާއި ދައުވާ ކުރުމަށް ކަމަށެވެ. ނަމަވެސް ޖިނާއީ ދައުވާ ކުރާކަމަށް ބުނާ މާއްދާއާއި ކުރި އަމަލާ ދިމާނުވާ ކަމަށާއި، އަދި ކުރި އަމަލަކީ ކޮބައިކަން، ހެއްކާހެކު ފުލުހުންނަށް ބުނެދެވިފައި ނުވާކަމަށެވެ. އެހެންކަމުން ޖިނާއީ ދައުވާއެއް ޝިޔާމުގެ މައްޗަށް ކުރެވޭނެ ތަނެއް ނެތްކަމަށް ވެސް ޝިޔާމުގެ ގާނޫނީ ވަކީލުން ވިދާޅުވިއެވެ.
ނަމަވެސް ޝިޔާމް ވިދާޅުވީ، އޭނާ 1000ރ އިން ޖޫރިމަނާކުރި ލިޔުމެއް ފުލުހުން ދީފައިވާ ކަމަށެވެ. އަދި އެފައިސާ ދައްކާނެ ކަމަށް ވެސް ޝިޔާމް ވިދާޅުވި އެވެ.
ޝިޔާމު މައިގަނޑު ގޮތެއްގައި ވިދާޅުވީ، ރާއްޖޭގެ އިގްތިޞާދު ހަލާކުވެ، ބޮޑު އަނދަވަޅަކަށް ވެއްޓިފައި ވަނީ މިސަރުކާރުގެ ނާގާބިލްކަމުން ކަމަށެވެ. އަދި އިންޑިއާ ސަރުކާރުން ދަނޑިވަޅުގެ ބޭނުންހިފައި، ރާއްޖެއަށް އެމީހުންގެ އަތް ގަދަ ކުރަމުންދާ ކަމަށް ޝިޔާމު ވިދާޅުވި އެވެ. އަދި ދިވެހިން މިނިވަންކަން ގެއްލެމުންދާ ކަމަށާއި، މިއަދު ދިވެހި ރައްޔިތުންނަށް އެކަން އިހުސާސް ކުރެވެމުންދާ ކަމަށެވެ.
ޕީޕީއެމް-ޕީއެންސީ ކޯލިޝަނުން މީގެކުރިން މާލޭގެ މަގުތަކުގައި މުޒާހަރާކޮށް، ކަނޑުމަތީގައި އޮޑި ދޯނި ފަހަރުގައި ވެސް ވަނީ މުޒާހަރާ ކޮށްފައެވެ.
މާލެ ސަރަހައްދުގައި ފަސް މީހުންނަށް ވުރެ ގިނައިން އެއްވެ އުޅުމަކީ އާންމު ސިއްހަތުގެ ކުއްލި ނުރައްކަލުގެ ހާލަތުގައި ހެލްތް ޕްރޮޓެކްޝަން އެޖެންސީ (އެޗްޕީއޭ) އިން މަނާކޮށްފައިވާ ކަމެކެވެ.
ކޮވިޑް-19 ފެތުރުން ކޮންޓްރޯލް ކުރުމަށް އެޗްޕީއޭއިން އެކުލަވާލާފައިވާ ގައިޑްލައިންތަކާއި މިންގަނޑުތަކާއި ޚިލާފަށް އިދިކޮޅު ކޯލިޝަނުން ކުރިޔަށް ގެންދިޔަ އެއްވުމާއި ގުޅިގެން ކަމާބެހޭ ފަރާތްތަކުން ބުނެފައިވަނީ އެކަން ބަލަމުންދާ ކަމަށެވެ. އިދިކޮޅު އިސްފަރާތްތަކުން ފުލަހަށް ހާޒިރުވާން ޗިޓް ފޮނުވަމުންދާތީ އިދިކޮޅުން ބުނަމުން އަންނަނީ މިއީ ސަރުކާރު ބަލިކަށިވަމުންދާތީ ބާރުގެ ބޭނުންކޮށްގެން ކުރަމުންދާ ކަންތައްތަކެއް ކަމަށެވެ.
ޝިޔާމް ފުލުސް އޮފީހަށް ހާޒިރު ހާޒިރުކޮށްފައިވާއިރު، މި މައްސަލާގައި، ޕީއެންސީގެ ރައީސް އަބްދުއްރަހީމް އަބްދުﷲ (އަދުރޭ) އާއި ރައީސް ނަޝީދުގެ ވެރިކަން ވައްޓާލުމަށްފަހު، ވެރިކަމަށް އަރާވަޑައިގެންނެވި ޑރ. މުހައްމަދު ވަހީދު ހަސަން މަނިކާއި ޕީއެންސީގެ ނައިބު ރައީސް އަދި ބާރަށު ދާއިރާގެ ކުރީގެ މެންބަރު އިބްރާހިމް ޝުޖާއު ވެސް ފުލުހަށް ހާޒިރުކޮށްފައި ވެއެވެ. އެހުރިހާ ބޭފުޅުންވެސް 1000ރ އިން ޖޫރިމަނާ ކޮށްފައިވާއިރު، ވަހީދު ވަނީ ގާނޫނީ ވަކީލަކާއެކު ވަޑައިގެންނެވުމަށް އިތުރު ފުރުސަތެއް ދެއްވުމަށް އެދިވަޑައިގަންނަވާފައެވެ.
