ލޯނުތައް ދެއްކުން ފަސްކުރުމަށް އެމްއެމްއޭއިން ނިންމާފައިވާކަން ހާމަކޮށްފި
ބައެއް ބޭންކުތަކާއި ބައެއް މާލީ އިދާރާތަކުން ވަނީ މިއަހަރުގެ ނިޔަލަށް ލޯނު ދެއްކުން ފަސްކޮށް ދިނުމަށް ނިންމާފައި
ރާއްޖޭގެ މަރުކަޒީ ބޭންކް، އެމްއެމްއޭ: ލޯނުތައް ދެއްކުން ފަސްކޮށްދިނުމުގައި ބޭންކުތަކަށް ދަނީ އެހީތެރިކަން ފޯރުކޮށްދެމުން
ކޮވިޑް-19 އާގުޅިގެން މާލީ އިދާރާތަކުން ދީފައިވާ ލުއިތަކުގެ ތެރެއިން، ބޭންކުތަކުން ނަގާފައިވާ ލޯނުތައް އަނބުރާ ދެއްކުން ފަސްކޮށްފައިވާ މުއްދަތު އިތުރުކޮށްދިނުމަށް ރާއްޖޭގެ ސެންޓްރަލް ބޭންކު، މޯލްޑިވްސް މަނިޓަރީ އޮތޯރިޓީ (އެމްއެމްއޭ)އިން ނިންމައިފި އެވެ.
މިކަން ހާމަކޮށްފައިމިވަނީ، އެމްއެމްއޭގެ ޑެޕިއުޓީ ގަވަރުނަރުގެ މަގާމަށް އައްޔަންކުރުމަށް ނަން ފޮނުވާފައިވާ، އެމްއެމްއޭގެ މަނިޓަރީ ޕޮލިސީ ރިސާޗު އެންޑް ސްޓެޓިސްޓިކްސް ޑިވިޝަންގެ އެކްޒެކެޓިވް ޑިރެކްޓަރެއްގެ މަގާމުގައި ހުންނެވި އަހުމަދު އިމާދު، މަޖިލީހުގެ މާލިއްޔަތު ކޮމެޓީން އޭނާއާ ކުރި އިންޓަވިއުގެ ތެރެއިންނެވެ.
މަޖިލީހުގެ މާލިއްޔަތު ކޮމެޓީއަށް މައުލޫމާތު ދެއްވަމުން އިމާދު ވިދާޅުވީ، ކޮވިޑް-19 އާ ގުޅިގެން އާންމުންނާއި ވިޔަފާރިތަކަށް ކުރިމަތިވެފައިވާ ދަތިތަކުން އަރައިގަތުމުގައި އެހީތެރިވުމުގެ ގޮތުން ބޭންކުތަކުން ނަގާފައިވާ ލޯނާއި ފައިނޭންސިންގއަށް ފައިސާ ދެއްކުން ފަސްކޮށްދިނުމަށް ބޭންކުތަކަށް އަންގަން އެމްއެމްއޭއިން ނިންމާފައިވާ ކަމަށެވެ.
އިމާދު ވިދާޅުވެފައިވަނީ، ފަސްކުރެވުނު ލޯނުތަކުގެ މުއްދަތު މިފެށޭ ސެޕްޓެމްބަރު މަހަށް ހަމަވާތީ މުއްދަތު އިތުރުކުރުމަށް އެމްއެމްއޭއިން ނިންމާފައިވާ ކަމަށެވެ. ނަމަވެސް މުއްދަތު އިތުރުކޮށް ދޭން ނިންމާފައިވީ ނަމަވެސް، ފަސްކުރާނީ ކޮން މުއްދަތަކަށް ކަމެއް އޭނާ ހާމައެއް ނުކުރައްވަ އެވެ.
އިމާދު އިތުރަށް ވިދާޅުވެފައިވަނީ، މިހާލަތުގައި މޮރިޓޯރިޔަމްދީގެން ބޭންކުތަކާއި އެހެން އިދާރަތަކަށް ކުރިމަތިވާ ލިކުއިޑިޓީ އިޝޫސްގައި އެމްއެމްއޭއިން ދޭންޖެހޭ ސަޕޯޓް ދިނުމުގައި ބޭންކުތަކަށް ޔަގީންކަން އެމްއެމްއޭއިން ދީފައިވާ ކަމަށެވެ.
ކޮވިޑް-19 އާ ގުޅިގެން، ރާއްޖޭގެ އިގްތިޞާދު ވަރަށް ބޮޑަށް ދަށަށްގޮސް، ރައްޔިތުންނަށް ކުރިމަތިވެފައިވާ ދަތިތަކަށް ހައްލެއް ހޯދާދިނުމަށް ދިވެހި ސަރުކާރުން ކެނޑިނޭޅި ދަނީ މަސައްކަތް ކުރަމުންނެވެ. އެގޮތުން، މިބަލި، ރާއްޖޭގައި ފެތުރެން ފެށުމާއެކު، އާންމު ރައްޔިތުންނާއި ވިޔަފާރިތަކުން ނަގާފައިވާ ލޯނުތައް އަނބުރާ ދެއްކޭނެ ލުއި ފަސޭހަ ގޮތްތަކެއް ސަރުކާރާއި މާލީ އިދާރާތަކާ ގުޅިގެން ހަމަޖައްސާ ދީފައި ވެއެވެ.
އެގޮތުން މިހާރުވެސް ބައެއް ބޭންކުތަކުންނާއި ބައެއް މާލީ އިދާރާތަކުން ވަނީ ލޯނުތައް ދެއްކުން މިއަހަރުގެ ނިޔަލަށް ފަސްކުރުމަށް ނިންމާފައެވެ. އެހެންކަމުން ބޭންކުތަކުން ނަގާފައިވާ ލޯނުތަކުގެ ތެރެއިން 15 ހާހަށްވުރެ ގިނަ ލޯނު ދައްކަންޖެހޭ މުއްދަތު ވަނީ އިތުރު ކޮށްދެވިފަ އެވެ.
ކޮވިޑް-19ގެ ސަބަބުން ވަޒީފާ ގެއްލިފައިވާ މީހުންނާއި ލިބެމުންދިޔަ އާމްދަނީއަށް އަސަރުކުރި މީހުންނަށް ވަގުތީ އެހީތެރިކަމެއް ފޯރުކޮށްދެއްވުމަށް، ހާއްސަ ޕެކޭޖެއް ކަނޑައަޅައި އެމަސައްކަތް ސަރުކާރުން ދަނީ ކުރަމުންނެވެ.
