އެމްޓީޑީސީގެ ހިއްސާއަކަށް 50 ލާރި ބަހަން ނިންމައިފި
މިގޮތަށް ނިންމާފައި ވަނީ ހޮނިހިރު ދުވަހު ބޭއްވި އެކުންފުނީގެ 2019 ވަނަ އަހަރުގެ އަހަރީ އާންމު ޖަލްސަގައި
އެމްޓީޑީސީ އިން މީގެ ކުރިން ކުރިއަށް ގެންދިޔަ އޭޖީއެމް އެއްގެ ތެރެއިން
މޯލްޑިވްސް ޓޫރިޒަމް ޑިވަލޮޕްމެންޓް ކޯޕަރޭޝަން (އެމްޓީޑީސީ)ގެ ހިއްސާ އަކަށް 50 ލާރި ބަހަން ނިންމައިފިއެވެ.
މިގޮތަށް ނިންމާފައި ވަނީ ހޮނިހިރު ދުވަހު ބޭއްވި އެ ކުންފުނީގެ 2019 ވަނަ އަހަރުގެ އަހަރީ އާންމު ޖަލްސާގައެވެ. އެގޮތުން އޭޖީއެމް ގައި ބައިވެރިވި 1،234 ހިއްސާދާރުންގެ ތެރެއިން 899 ހިއްސާދާރުން ވަނީ މި އަދަދަށް ހިއްސާ ބެހުމަށް އެއްބަސްވެފައެވެ. އަދި 315 މީހުން ވޯޓުގައި ނޫނެކޭ ބުނެފައިވާއިރު، 20 ހިއްސާދާރުން ވޯޓުގައި ބައިވެރިއެއް ނުވެއެވެ.
އޭގެ އިތުރުން، ވާޗުއަލްކޮށް ކުރިއަށް ގެންދިޔަ މި އޭޖީއެމްގައި 2020 ވަނަ އަހަރަށް ކުންފުނީގެ އޮޑިޓަރުންގެ ގޮތުގައި ކޭޕީއެމްޖީ ކުންފުނި ހަމަޖައްސާފައިވާއިރު، ކުންފުނީގެ ހިންގާ ގަވާއިދަށް ބައެއް އިސްލާހު ގެނައުމަށް ހުށައެޅި ހުށައެޅުން ވެސް ވަނީ ފާސްކޮށްފައެވެ. އަދި 2019 ވަނަ އަހަރުގެ ޑިރެކްޓަރުންގެ ރިޕޯޓާއި އޮޑިޓް ކުރެވިފައިވާ މާލީ ހިސާބުތަކުގެ ރިޕޯޓް ވެސް ފާސްކޮށްފައިވާއިރު، 2018 ވަނަ އަހަރުގެ އަހަރީ އާންމު ޖަލްސާގެ ޔައުމިއްޔާ ވެސް ވަނީ ފާސްކޮށްފައެވެ.
މި އޭޖީއެމް ކުރިއަށް ގެންގޮސްފައި ވަނީ މޯލްޑިވްސް ސެކިއުރިޓީ ޑިޕޮޒިޓަރީ (އެމްއެސްޑީ)ގެ އޮންލައިން މީޓިން މެނޭޖްމެންޓް ސިސްޓަމް، ފަހިވޯޓް މެދުވެރިކޮށެވެ.
މިއީ 11 އަހަރަށް ފަހު އެމްޓީޑީސީ އިން ހިއްސާގެ ފައިދާ ބަހަން ހުށައެޅި ފުރަތަމަ ފަހަރެވެ.
