"މާފުށީ ޖަލުގައި ޝަރީއަތް ނިމެންދެން ބަންދުކޮށްފައި ތިބި މީހުން ބަންދުގައި ތިބޭތާ އެވްރެޖްކޮށް 26 މަސް"
މާލޭ ޖަލުގައިވެސް މިވަގުތު 140 މީހުން ޝަރީއަތް ނިމެންދެން ބަންދުގައި އެބަތިބި
ޕީޖީ ހުސައިން ޝަމީމް- ޕީޖީ ވަނީ އެ މައުލޫމާތުތަކުގެ މައްޗަށް އެކުލެވޭ ތަފްސީލީ ރިޕޯޓް މަޖިލީހާ ހިއްސާ ކުރައްވާފައި
މާފުށީ ޖަލުގައި ޝަރީއަތް ނިމެންދެން ބަންދުކޮށްފައި ތިބި މީހުން ބަންދުގައި ތިބޭތާ އެވްރެޖްކޮށް 26 މަސް ވެފައިވާކަމަށް ޕްރޮސެކިއުޓަރ ޖެނެރަލް (ޕީޖީ) އޮފީހުން ބުނެފިއެވެ.
ޤާނޫނު އަސާސީގެ 133 ވަނަ މާއްދާގެ ދަށުން ބަންޑާރަނައިބު އެކުލަވާލާފައިވާ "ޖިނާއީ މައްސަލަތަކުގައި އަމަލުކުރާނެ މައިގަނޑު ސިޔާސަތު" ގެ ދަށުން ތަހުޤީޤު ކުރުމާއި ބަންދުގައި މީހުން ބެހެއްޓުމާ ގުޅޭގޮތުން ޕީޖީ އޮފީހުގެ މަސައްކަތްތަކުގެ މައްޗަށް ހިމެނޭ ޚާއްސަ ރިޕޯޓެއް އެކުލަވާލައި އަހަރަކު ދެފަހަރު މަޖިލީހާ ހިއްސާ ކުރަންޖެހޭނެ ކަމަށް ބަޔާން ކޮށްފައިވެއެވެ. އެގޮތުން މި ރިޕޯޓް މިހާރު ޕީޖީ އޮފީހުން ވަނީ އެކުލަވާލައި މަޖިލީހާ ހިއްސާކޮށްފައެވެ.
ރިޕޯޓްގައި ބަޔާން ކޮށްފައިވާ ގޮތުން، ޝަރީއަތް ނިމެންދެން ބަންދުގައި ގިނަ ބަޔަކު ތިބުމަކީ ޖިނާއީ އަދުލުގެ ނިޒާމަށް މިވަގުތު ކުރިމަތިވެފައިވާ އެންމެ ބޮޑު ގޮންޖެހުމެވެ. އެގޮތުން ޕީޖީ އޮފީހުން ވަނީ ކްރިމިނަލް ކޯޓާ މަޝްވަރާކޮށް، ޝަރީއަތް ނިމެންދެން ބަންދުގައި ތިބި މީހުންގެ މައްސަލަތައް އަވަސް ކުރުމާ ބެހޭގޮތުން ތާވަލެއް އެކުލަވާލައި، މަސައްކަތް ފައްޓަވާފައެވެ. އެހެން ނަމަވެސް، ކޮވިޑް-19 ބަލިމަޑުކަމުގެ ސަބަބުން އެކަމަށް ލަސްތަކެއް އައިސްފައިވާކަން ރިޕޯޓްގައި ފާހަގަ ކޮށްފައިވެއެވެ.
ރިޕޯޓްގައި އިތުރަށް ބުނީ، މާލޭ ޖަލުގައިވެސް މިވަގުތު 140 މީހުން ތިބިއިރު، އެމީހުން ޝަރީއަތް ނިމެންދެން ބަންދުގައި ތިބޭތާ އެވްރެޖްކޮށް 8 މަހާ ބައި ވެފައިވާ ކަމަށެވެ. ހަމަ އެގޮތަށް މާފުށީ ޖަލުގައިވެސް 110 މީހުން ބަންދުގައި ތިބިއިރު، އެމީހުން ޝަރީއަތް ނިމެންދެން ބަންދުގައި ތިބޭތާ އެވްރެޖްކޮށް 26 މަސް ވާން ކައިރިވެފައިވާކަމަށް ޕީޖީ އޮފީހުގެ ރިޕޯޓްގައި ބަޔާން ކޮށްފައިވެއެވެ.
މި ތަފްސީލުތައް ހިއްސާ ކުރައްވައި ޕީޖީ ހުސައިން ޝަމީމް ވަނީ މި ތަފާސް ހިސާބުތަކަށް ބަލައިގެން ދައުލަތުގެ ސިޔާސަތުތައް ބައްޓަން ކުރެވޭނަމަ ޖިނާއީ އަދުލުގެ ނިޒާމު އިތުރަށް ހަރުދަނާ ކުރުމަށް ހަދާ ސިޔާސަތުތަކުން ކާމިޔާބު ހޯދޭ މިންވަރު އިތުރުވާނެ ކަމަށް ފެންނަކަަމަށް ވިދާޅުވެފައެވެ.
ޕީޖީ ޝަމީމް ވިދާޅުވީ، ޝަރީއަތް ނިމެންދެން ބަންދުގައި ތިބި މީހުންގެ މައްސަލަތައް އަވަހަށް ނިމިގެން ނޫނީ މި ނިޒާމަަށް ލުއެއް ލިބެން ނެތް ކަމަށެވެ. އަދި އެކަން ކުރުމުގެ މަސައްކަތް ޝަރުއީ ކޯޓުތަކާ ގުޅިގެން ކުރައްވަމުން ގެންދަވާކަމަށްވެސް ޕީޖީ ވަނީ ވިދާޅުވެފައެވެ.
2019 ވަނަ އަހަރާ އަޅާބަލާއިރު މި އަހަރު އެވްރެޖްކޮށް ދައުވާކުރާ މުއްދަތު އަވަސްވެފައިވާކަން ޕީޖީ އޮފީހުން ފާހަގަ ކޮށްފައިވެއެވެ. އެގޮތުން 2019 ވަނަ އަހަރު 81 ދައުވާއެއް ކުރުމަށް އެވްރެޖްކޮށް ނަގާފައިވަނީ 113 ދުވަސް ކަމަށާއި، 2020 ވަނަ އަހަރު 70 ދައުވާއެއް ކުރުމަށް އެވްރެޖްކޮށް ނަގާފައިވަނީ 56 ދުވަސްކަމަށް ޕީޖީ އޮފީހުން ހުށައަޅާފައިވާ ރިޕޯޓްގައި ބަޔާން ކޮށްފައިވެއެވެ.
