އަލިފާނުގެ ހާދިސާއާއި ގުޅިގެން އުރީދޫގެ ހިދުމަތްތަކަށް ބުރުލެއް ނާރާނެ

ހުކުރު ދުވަހުގެރޭ އުރީދޫގެ ހެޑް ކުއާޓާ ކަމަށްވާ ހ. ސަންލީޓް ބިލްޑިންގ އާއި އިންވެގެން ހުންނަ ކެފޭގައި ހިނގި އަލިފާނުގެ ހާދިސާ އާއި ގުޅިގެން އުރީދޫގެ ހިދުމަތަށް ބުރުލެއް ނާރާނެ ކަމަށް އުރީދޫއިން ބުނެފިއެވެ.

މި އަލިފާނުގެ ހާދިސާގައި ހ. ސަންލީޓް ބިލްޑިންގ އަށްވެސް ވަނީ ބޮޑެތި ގެއްލުންތަކެއް ލިބިފަ އެވެ. އެ އިމާރާތަކީ ގިނަ ވިޔަފާރިތަކެއް ހިންގަމުން އަންނަ އިމާރާތެކެވެ.

އުރީދޫއިން ބުނީ އުރީދޫގެ އެޗްކިއު ބިލްޑިންގގައި މި އަލިފާނުގެ ހާދިސާ އާއި ގުޅިގެން އެ ކުންފުންޏަށް ބޮޑު ގެއްލުމަކާއި ކުރިމަތިލާން ޖެހިފައިވާ ކަމަށެވެ. އުރީދޫއިން އިތުރަށް ބުނީ އަލިފާނުގެ ހާދިސާއާއި ގުޅިގެން އުރީދޫގެ އެޗްކިއު ބިލްޑިންގ އިމާރާތުން ދެމުން އައި ހިދުމަތް ދުވަސް ކޮޅަކަށް އެ ބިލްޑިންގ އިން ނުލިބޭނެ ކަމަށާއި، އެކަމަކު އުރީދޫގެ ރީޖަނަލް އޮފީސް ތަކުންނާއި އޮޕަރޭޝަން ސެންޓަރުން ހިދުމަތް ލިބޭނެ ކަމަށެވެ.

އުރީދޫއިން އިތުރަށް އެ ކުންފުނީގެ ސްޓާފުން މި ހިތާމަވެރި ދަނޑިވަޅުގައި ދައްކަމުން ގެންދާ ނަމޫނާއަށް ޝުކުރު އަދާ ކޮށްފައެވެ. އަދި އިތުރަށް ބުނީ ކުންފުނިން ދެމުން އައި އެއްވެސް ހިދުމަތަކަށް އަލިފާނުގެ ހާދިސާގެ ސަބަބުން ބުރޫއެރިޔަ ނުދޭނެ ކަމަށާއި، އުރީދޫއިން މަސައްކަތް ކުރަނީ ކޮންމެ ހާލަތެއްގައި ވެސް ކަސްޓަމަރުންނަށް އެންމެ ފެންވަރު ރަނގަޅު ހިދުމަތް ދިނުމަށް ކަމަށެވެ.