އިންޑިޔާއަށް ފާއިތުވި 44 އަހަރުތެރޭ އެންމެ ގިނައިން ވާރޭ ވެހުނީ އޮގަސްޓް މަހު

އިންޑިޔާއަށް ފާއިތުވި 44 އަހަރު ދުވަހުގެ ތެރޭ އެންމެ ގިނައިން ވާރޭ ވެހުނީ އޮގަސްޓް މަހު ކަމަށް އެ ގައުމުގެ މީޓިއޮރޮލަޖިކަލް ޑިޕާޓްމަންޓުން ހާމަކޮށްފި އެވެ.

އޮގަސްޓްމަހުގެ 28 ވަނަ ދުވަހާ ހަމައަށް އޮގަސްޓް މަސް ތެރޭ 25 އިންސައްތަ އިތުރަށް ވަނީ ވާރޭ ވެހިފައެވެ. މިއަދަދާއެކު އެންމެ ފަހުން އޮގަސްޓަމަހު އެންމެ ގިނައިން ވާރޭވެހުނު އަހަރުކަމުގައިވާ 1983 ވަނަ އަހަރުގެ އަދަދުވެސް މިވަނީ ފަހަނަ އަޅާ ގޮސްފައެވެ. އެ އަހަރުގެ އޮގަސްޓް މަހު އިތުރަށް 23.8 އިންސައްތަ ވާރޭ ވަނީ ވެހިފައެވެ.

އިންޑިޔާގެ މީޓިއޮރޮލަޖިކަލް ޑިޕާޓްމަންޓްގެ ޑޭޓާތަކުން ދައްކާ ގޮތުގައި 1976 ވަނަ އަހަރުގެ އޮގަސްޓް މަހު 28.4 އިންސައްތަ އިތުރަށް ވާރޭ ވެހިފައެވެ. މިހާރު ވެސް އިންޑިޔާއަށް އާންމުކޮށް ވާރޭވެހޭ ނިސްބަތަށްވުރެ ނުވަ އިންސައްތަ އިތުރަށް ވަނީ ވާރޭވެހިފައެވެ. ބިހާރު، އަންދްރަ ޕްރެދޭޝް، ތެލަންގަނާ، ތަމިލް ނާޑޫ، ގުޖުރާތު އަދި ގޯއާ އަކީ އެންމެ ގިނައިން ވާރޭ ވެހިގެން ރިޕޯޓްކޮށްފައިވާ ތަންތަނެވެ. މިއާއެކު ގިނަ ސްޓޭޓްތަކެއްގައި ވަނީ ފެންބޮޑުވުމުގެ ހާދިސާތައް ހިނގާފައެވެ.

އިންޑިޔާއަށް އާންމު ގޮތެއްގައި ވާރޭވެހެނީ ޖޫން މަހުގެ 1ން ފެށިގެން ސެޕްޓެމްބަރ މަހުގެ 30 އާ ހަމައަށެވެ. ޖޫން މަހު 17 އިންސައްތަ އިތުރަށް ވާރޭވެހިފައިވާއިރު ޖުލައި މަހު ވަނީ 10 އިންސައްތަ މަދުން ވާރޭވެހިފައެވެ.

އެންމެ ގިނައިން ވާރޭ ވެހެނީ އޮގަސްޓް މަހާއި ސެޕްޓެމްބަރ މަހުއެވެ. އިންޑިޔާގެ މީޓިއޮރޮލަޖިކަލް ޑިޕާޓްމަންޓުން ހާމަ ކުރާ ގޮތުގައި އޮގަސްޓްމަހު 97 އިންސައްތަ ވާރޭ މި މުއްދަތުގެ ތެރޭގައި ވެހޭނެއެވެ. އާންމު ގޮތެއްގައި ގައުމަކަށް ވާރޭ ވެހޭ މޫސުމުގެ ދެ ވަނަ ހާފްގެ މުއްދަތުގައި ވާރޭވެހޭނީ 104 އިންސައްތައަށެވެ.

އިންޑިޔާއަށް 1961 ވަނަ އަހަރުން ފެށިގެން 2010 ވަނަ އަހަރާ ދެމެދު ވާރޭވެހިފައިވަނީ 88 ސެންޓި މީޓަރުގައެވެ. އާންމު މިންގަނޑެއްގެ ގޮތުގައި ފާހަގަކުރަނީ 96 އިންސައްތަ އާއި 104 އިންސައްތައާ ދެމެދެވެ.