27 ވޮލެންޓިއަރުން ހަރަކާތްތެރިވި، ހެލްޕްލައިނެއްވެސް ގާއިމްކުރެވުނު: އެމްއާރްސީ
29 އޯގަސްޓު 2020 | ހޮނިހިރު 08:28ފުރަތަމަ ޓީމް ދިޔައީ 22:10 ގައި
އެމްއާރްސީގެ ވޮލެންޓިއަރުން އަލިފާން ރޯވި އިމާރާތް ހުންނަ ސަރަހައްދުގައި ހަރަކާތްތެރިވަނީ
ހުކުރު ދުވަހުގެރޭ މާލޭގައި ހިނގި ބޮޑު އަލިފާނުގެ ހާދިސާގައި 27 އިމަރޖެންސީ ރެސްޕޯންސް ވޮލެންޓިއަރުން ހަރަކާތްތެރިވި ކަމަށް ހިލޭ ސާބަހަށް މަސައްކަތްކުރާ މޯލްޑިވްސް ރެޑް ކްރެސެންޓް (އެމްއާރްސީ) އިން ބުނެފިއެވެ.
އެމްއާރްސީން ބުނީ، ފުރަތަމަ ރެސްޕޮންސް ޓީމް އެ ސަރަހައްދަށް ގޮސްފައިވަނީ 22:10 ހާއިރު ކަމަށެވެ. އަލިފާން ހިފި ސަރަހައްދުގައި އެމްއާރްސީގެ ތިން ޓީމެއް ހަރަކާތްތެރިވިއެވެ. ސައިކޯސޯޝަލް ސަޕޯޓް ޓީމުތަކުން ދިޔައީ ރެސްޕޮންސް ޓީމްތަކާއި އެކު މަސައްކަތްކުރަމުންނެވެ.
އެމްއާރްސީން މަސައްކަތްކުރީ ފުލުހުންގެ އިތުރުން ނޭޝަނަލް ޑިޒާސްޓާ މެނޭޖްމެންޓް (އެންޑީއެމްއޭ) އާ ގުޅިގެންނެވެ. އެންޑީއެމްއޭ އިން ބުނެފައިވާ ގޮތުން ރޭ އަލިފާނުގެ ހާދިސާގައި ވަގުތީ ބޯހިޔާވަހިކަން ބޭނުންވެގެން އެއްވެސް ފަރާތެއް އެދިފައެއް ނުވެއެވެ.
އެމްއާރްސީން ބުނީ، ހާދިސާއާ ގުޅިގެން ނަފްސާނީ އެހީތެރިކަން ބޭނުންވާ ފަރާތްތަކަށް އެހީތެރިކަން ފޯރުކޮށް ދިނުމުގެ ގޮތުން ހެލްޕްލައިން އެއް ގާއިމް ކުރެވުނު ކަމަށެވެ. އެކަމަކު އެއްވެސް ފޯން ކޯލެއް އަދި މިހާތަނަށް ލިބިފައެއް ނުވާ ކަމަށެވެ.
''ކެފޭ ޓިއޯލޯ" ގައި އަލިފާން ރޯވެ އެ އަލިފާންގަނޑު ޖެހިގެން ހުރި އިމާރާތާ ދިމާލަށް ފެތުރެން ފެށިތަނާއިއެކު އެ ސަރަހައްދުތަކުގެ އިމާރާތުގައި ތިބި މީހުން ވަނީ އެތަނުން ނެރެފައެވެ. ކެފޭ ޓިއޯލޯ ވަނީ ބޭނުންނުކުރެވޭ ވަރަށް އަނދާ އަޅިއަށްވެފައެވެ. އަލިފާންގަނޑު ކޮންޓްރޯލް ނުކުރެވި ޖެހިގެން ހުރި ގަދަގެ މުހައްމަދުފުޅު ބިލްޑިންގެ ޓެރަސްއާ ހަމަޔަށް ފެތުރުނެވެ. އަދި އެ އިމާރާތުގައި ހިންގަމުންދާ ސްޓޭޓް ބޭންކް އޮފް އިންޑިއާގެ އޮފީހަށްވެސް ބޮޑެތި ގެއްލުންތަކެއް ވަނީ ވެފައެވެ. މި ހާދިސާ ހިނގަން މެދުވެރިވި ސަބަބު ފުލުހުން ދަނީ ބަލަމުންނެވެ.
