ރޭގެ އަލިފާނުގެ ހާދިސާގައި ހަރަކާތްތެރިވި ފުލުހުންނަށް އިމްރާންގެ ތައުރީފް!
10 އެޕްރީލު 2019 | ބުދަ 13:34ފުލުހުންގެ މަަސައްކަތާ މެދު ފަޚުރުވެރިވޭ: އިމްރާން
ގ. ރެޑް ޕާރލްގައި ހިނގި އަލިފާނުގެ ހާދިސާއާ ގުޅޭ ބައެއް މަންޒަރުތައް
އަންގާރަ ދުވަހުގެރޭ ގ. ރެޑް ޕާރލްގައި ހިނގި އަލިފާނުގެ ހާދިސާގައި ހަރަކާތްތެރިވި ފުލުހުންނަށް މިނިސްޓަރ އޮފް ހޯމް އެފެއާޒް ޝެއިހް އިމްރާން އަބްދުﷲ ތައުރީފް ކުރައްވައިފިއެވެ.
އެ ހާދިސާގައި ފުލުހުން ހަރަކާތްތެރިވި މަންޒަރު ދައްކުވައިދޭ ވީޑިއޯއެއް ޓްވިޓަރގައި ހިއްސާ ކުރައްވަމުން އިމްރާން ވިދާޅުވީ، ފުލުހުންގެ އަހުލާޤުގައި ހުންނަންވާ އެންމެ އަސާސީ ސިފައަކީ އަމިއްލަ ނަފްސާއި މަސްލަހަތަށް ވުރެ ރައްޔިތުންނަށް ޚިދުމަތް ކުރުމުގެ ރޫހު ގަދަވުން ކަމަށާއި، އަލިފާނުގެ ހާދިސާގައި ހަރަކާތްތެރިވި ފުލުހުންގެ ފަރާތުން ފެނުނު ހިތްވަރާ މެދު ފަޚުރުވެރިވެވަޑައިގަންނަވާ ކަަމަށެވެ.
އަންގާރަ ދުވަހުގެ މެންދަމު 03:45 ހާއިރު ހިނގި އެ ހާދިސާގައި އަލިފާން ރޯވެފައި ވަނީ އެ ގޭ ދެވަނަ ފަންގިފިލާ އަށް އަރަން ހުންނަ ލަކުޑިން ހަދާފައިވާ ސިޑިއެއްގައެވެ. މި ހާދިސާގައި ރޯވި އަލިފާން އެއްކޮށް ނިއްވާލެވިފައި ވަނީ ރޭ 04:30 ހާއިރު ކަމަށް އެމްއެންޑީއެފް އިން ބުނެފައިވެއެވެ. އަދި އެހާދިސާއާ ގުޅިގެން އެ ގެއަށް ބޮޑެތި ގެއްލުންތަކެއް ލިބިފައިވާއިރު، ހަތް ފަރާތަކަށް ދުމުގެ އަސަރުކުރުމުގެ ސަބަބުން ހޮސްޕިޓަލުގައި ވަނީ ފަރުވާވެސް ދީފައެވެ.
ފުލުހުންގެ މަސައްކަތް ފާހަގަކުރައްވައި މިނިސްޓަރ ފުލުހުންނަށް ތައުރީފް ކުރައްވާފައިވާއިރު، ބުދަ ދުވަހުވެސް އަރިޔަދޫ ނަމަކަށް ކިޔާ ފަޅު ރަށެއްގައި އަލިފާން ރޯވެގެން ފުލުހުން ވަނީ ހަރަކާތްތެރިވެފައެވެ.
