ބޯޑަރު ހުޅުވާލި ފަހުން އެންމެ ގިނަ އެއާޕޯޓް މޫވްމަންޓް އިއްޔެ!
29 އޯގަސްޓު 2020 | ހޮނިހިރު 04:39428 ފަސިންޖަރުން އެތެރެވެފައިވޭ
ފަތުރުވެރިން ރާއްޖެ އައުން
ހުކުރު ދުވަހަކީ ބޯޑަރު ހުޅުވާލި ފަހުން އެންމެ ގިނައިން މީހުން ބޭރުވި ދުވަސްކަމަށް ޓަރމިނަލް އޮޕަރޭޝަންސްގެ ޖެނެރަލް މެނޭޖަރ އިބްރާހިމް ހުސައިން ވިދާޅުވެއްޖެއެވެ.
ރާއްޖެޓީވީގެ ފަށާއިރު ޕްރޮގްރާމްގައި މިދިޔަ 24 ގަޑިއިރުތެރޭގެ ފްލައިޓް މޫވްމަންޓްއާއި ގުޅޭ ގޮތުން އެންމެ ފަހުގެ މައުލޫމާތު ހިއްސާކުރަމުން އިބްރާހިމް ވިދާޅުވީ ހުކުރު ދުވަހު ވެލާނާ އިންޓަރނޭޝަނަލް އެއާޕޯޓުން ނުވަ ފްލައިޓެއް ހުކުރު ދުވަހު އޮޕަރޭޓްކޮށްފައިވާ ކަމަށާއި 428 ފަސިންޖަރުން ރާއްޖެ އެތެރެވެފައިވާ ކަމަށެވެ.
އަދި 1127 މީހަކު ހުކުރު ދުވަހު ފުރާފައިވާއިރު މިއީ ބޯޑަރު ހުޅުވީއްސުރެ އެންމެ ގިނަ އަދަދަކަށް ދުވާލެއްގެ މައްޗަށް މީހުން ބޭރުވި ދުވަސް ކަމަށް އިބްރާހިމް ވިދާޅުވިއެވެ. އޭގެ ތެރޭގައި ބަންގްލަދޭޝްއަށް ދެ ފްލައިޓެއް އޮޕަރޭޓްކޮށް އެ ގައުމުގެ 323 ރައްޔިތެއް އަނބުރާ ގައުމަށް ފޮނުވާފައިވާ ކަމަށެވެ.
ޑޮމެސްޓިކް ވައިގެ ދަތުރުތަކުގެ މައުލޫމާތު ހިއްސާކުރައްވަމުން އިބްރާހިމް ވިދާޅުވީ، ހަތަރު ފްލައިޓެއް ކުޅުދުއްފުށީ، ގަން، ފުވައްމުލަކަށް ދަތުރު ކޮށްފައިވާ ކަމަށާއި އެއާޕޯޓްތަކުން 38 މީހުން މާލެ އައިސްފައިވާ ކަމަށެވެ. މީގެއިތުރުން މާލެއިން 72 ފަސިންޖަރުން ޑޮމެސްޓިކް އެއާޕޯޓްތަކަށް ބޭރުވެފައިވާކަން ވެސް އިބްރާހިމް ފާހަގަކުރެއްވިއެވެ.
ބޯޑަރު ހުޅުވި ފަހުން އެއާޕޯޓް މޫވްމަންޓް އެންމެ ގިނަ ދުވަހުގެ ގޮތުގައި ހުކުރު ދުވަސް ފާހަގޮށްފައިވާއިރު، އެ ދުވަހު އެކަނި 4 ޕްރައިވެޓް ޖެޓް ޖައްސާފައިވާއިރު ޝެޑިއުލް ކާގޯ ދަތުރުތަކުން 82.7 ޓަނުގެ މުދާ އެތެރެކޮށް 31.9 ޓަނުގެ މުދާ ބޭރުކޮށްފައިވާ ކަމަށް އިބްރާހިމް ވިދާޅުވިއެވެ.
