ސިޓީ ކައުންސިލްގެ ވެހިކަލްތައް ދަނީ އަލިފާނުގެ ހާދިސާގައި އަސަރުކޮށްފައިވާ ފަރާތްތަށް އުފުލުމުގެ މަސައްކަތް ކުރަމުން
28 އޯގަސްޓު 2020 | ހުކުރު 18:39މިކަމަށް ހާއްސަ ޓާސްކްފޯސް ވެސް މިހާރު އޮތީ ތައްޔާރަށް ކަމަށް މޭޔަރު ފާހަގަކުރެއްވި
އަލިފާނުގެ ހާދިސާ ހިނގާފައިވާ ސަރަހައްދު
މާލޭގައި މިހާރު ހިނގަމުންދާ އަލިފާނުގެ ހާދިސާގައި އަސަރުކޮށްފައިވާ ފަރާތްތަކަށް އެހީވުމަށް މާލެ ސިޓީ ކައުންސިލުން ދަނީ ހަރަކާތްތެރިވަމުންނެވެ.
ރާއްޖެޓީވީ އަށް ދެއްވި އިންޓަވިއުއެއްގައި މާލެ ސިޓީ ކައުންސިލްގެ މޭޔަރު، ޝިފާ މުހައްމަދު ވިދާޅުވީ، އިމާރާތްތަކުން މީހުން ނެރެވިފައިވާ ކަމަށާއި ކައުންސިލްގެ ވެހިކަލްތަށް ވަނީ އަލިފާނުގެ އަސަރުކޮށްފައިވާ އިމާރާތްތަކުން ނެރެފައިވާ މީހުންނަށް އެހީތެރިވުމަށް ތައްޔާރުކުރެވިފައިކަމަށެވެ. އެގޮތުން އެމީހުން އުފުލުމުގެ މަސައްކަތް މިހާރު ފަށާފައިވާ ކަމަށް ޝިފާ ވިދާޅުވިއެވެ.
އެގޮތުން މިކަމަށް ހާއްސަ ޓާސްކްފޯސް ވެސް މިހާރު އޮތީ ތައްޔާރަށް ކަމަށް މޭޔަރު ފާހަގަކުރެއްވިއެވެ.
މޭޔަރ ޝިފާ ވަނީ މިފަދަ ހިތާމަވެރި ހާދިސާއެއް ހިނގާ ކޮންމެ ފަހަރަކު ވެސް ސިޓީ ކައުންސިލްގެ މަސައްކަތް ފެށެނީ ހާދިސާ ހިނގާ ނިމުމުން ކަމަށާއި ކައުންސިލުން އޮތީ މިކަމަށް ތައްޔާރަށް ކަމަށް ވިދާޅުވިއެވެ.
އޭގެ އިތުރުން ޑިފެންސް މިނިސްޓަރު މާރިޔާ އަހްމަދު ދީދީ ވަނީ މި ހާދިސާގައި އަސަރު ކޮށްފައިވާ އާއިލާތަކަށް ވަގުތީ ބޯހިޔާވަހިކަން ކަލާފާނު ސްކޫލްގައި ފޯރުކޮށްދިނުމުގެ މަސައްކަތް ކުރަމުންދާ ކަމަށް ވިދާޅުވެފައެވެ.
