ވަގުތީ ބޯހިޔާވަހިކަން ފޯރުކޮށްދޭން ޖެހިއްޖެ ހާލަތެއްގައި ކަލާފާނު ސްކޫލު ހަމަޖެއްސުމުގެ މަސައްކަތް ދަނީ ކުރަމުން: މާރިޔާ
28 އޯގަސްޓު 2020 | ހުކުރު 18:23ވަގުތީ ބޯހިޔާވަހިކަމެއްގެ ގޮތުގައި ކަލާފާނު ސްކޫލް ހަމަޖެއްސުމަށް ދަނީ މަސައްކަތް ކުރަމުން
ޑިފެންސް މިނިސްޓަރ މާރިޔަ އަހުމަދު ދީދީ
ބޮޑުތަކުރުފާނުމަގުގައި ހުންނަ ސްޓޭޓް ބޭންކް އޮފް އިންޑިއާ އިމާރާތުގައި ހިނގާ ދިޔަ އަލިފާނުގެ ހާދިސާގައި އަސަރު ކުރި ފަރާތްތަކަށް ވަގުތީ ބޯހިޔާވަހިކަން ފޯރުކޮށްދޭން ޖެހިއްޖެ ހާލަތެއްގައި އެ މަސައްކަތް ކުރަމުންދާ ކަމަށް ޑިފެންސް މިނިސްޓަރ މާރިޔާ އަހުމަދު ދީދީ ވިދާޅުވެއްޖެއެވެ.
ރާއްޖެއެމްވީ އަށް ދެއްވި އިންޓަރވިއުއެއްގައި މާރިޔާ ވިދާޅުވީ އަލިފާންގަނޑު ކޮންޓްރޯލް ކުރުމަށްޓަކައި އެމްއެންޑީއެފްގެ ފަޔަރ ފައިޓަރުން ވަރަށް ބުރަކޮށް މަސައްކަތް ކުރަމުންދާ ކަމަށެވެ.
އެމްއެންޑީއެފުން ބުނީ މިހާރު އަލިފާންގަނޑު ކޮންޓްރޯލް ކުރެވިފައިވާ ކަމަށެވެ.
މާރިޔާ އިތުރަށް ވިދާޅުވީ މިއީ ކޮވިޑްގެ ހާލަތު ކަމަށްވުމުން އުއްމީދުކުރައްވަނީ އަލިފާނުގެ އަސަރުކޮށްފައިވާ ފަރާތްތަކަށް އެފަރާތްތަކުގެ ގޭގެއަށް ހުކުރު ދުވަހުގެ ރޭ ވަދެވޭނެ ގޮތަކަށް އަލިފާންގަނޑު ކޮންޓްރޯލް ކުރެވުން ކަމަށެވެ. އެހެންނަމަވެސް ކޮންމެގެން ވަގުތީ ބޯހިޔާވަހިކަން ބޭނުންވާ ފަރާތްތަކަށް އެ އިންތިޒާމް ހަމަޖެހިގެންދާނެ ކަމަށެވެ.
ސްޓޭޓް ބޭންކް އޮފް އިންޑިއާ އިމާރާތުގައި ރޯވެފައިވަނީ ހުކުރު ދުވަހުގެ ރޭ 09:50 ހާއިރުއެވެ. މަންޒަރު ދުށް މީހުން ބުނާ ގޮތުން މި ސަރަހައްދުގައި އެންމެ ފުރަތަމަ އަލިފާން ރޯވީ އެ އިމާރާތާއި ޖެހިގެން ހުންނަ 'ކެފޭ ޓިއޯލޯ' ގައެވެ. އަދި އެ އަލިފާންގަނޑު ސްޓޭޓް ބޭންކް އޮފް އިންޑިއާ ހުންނަ އިމާރާތަށް ފެތުރުނީއެވެ.
