ޒުވާން ޑިފެންޑަރު މަލަންގް ސާ ޗެލްސީއަށް
27 އޯގަސްޓު 2020 | ބުރާސްފަތި 14:01މަލަންގް ސަރ ހޯދުމަށް ޔޫރަޕްގެ ބޮޑެތި ކްލަބްތަކުން އަންނަނީ ފާރަލަމުން
ޑިފެންޑަރ މަލަންގް ސަރ: އޭނާ ވަނީ ޗެލްސީއާއި އެކު ފަސް އަހަރު ދުވަހުގެ އެއްބަސްވުމެއްގައި ސޮއި ކޮށްފަ
ޗެލްސީން ފްރާންސްގެ ޒުވާން ޑިފެންޑަރު މަލަންގް ސާގެ ސޮއި ހޯދައިފިއެވެ.
އުމުރުން 21 އަހަރުގެ ސާ ޗެލްސީއަށް ބަދަލުވީ ހިލޭ ޓްރާންސްފާއެއްގެ ދަށުންނެވެ. އަދި އޭނާ ވަނީ ޗެލްސީއާއެކު ފަސް އަހަރުގެ އެއްބަސްވުމެއް ހަދާފައެވެ. ޗެލްސީއާއެކު ސާ ފަސް އަހަރުގެ އެއްބަސްވުމެއްގައި ސޮއިކުރި ނަމަވެސް، އޭނާ އަންނަ ސީޒަނުގައި ޗެލްސީގެ ސްކޮޑުން ނުފެންނާނެއެވެ. އަންނަ ސީޒަނަށް އޭނާ އެހެން ކުލަބަކަށް ލޯނު އެއްބަސްވުމެއްގެ ދަށުން ދޫކޮށްލުމަށް ޗެލްސީން ވަނީ ނިންމާފައެވެ.
މި ސީޒަނުގައި ނީސްއަށް ކުޅެދިން ސާގެ ސޮއި ޗެލްސީން ހޯދިއިރު، އޭނާއަށް ޔޫރަޕްގެ ބޮޑެތި ގިނަ ކުލަބުތަކުން އަންނަނީ ފާރަލަމުންނެވެ.
ސާ އަކީ މި ފަހަރުގެ ޓްރާންސްފާ ބާޒާރުގައި ޗެލްސީއަށް ބަދަލުވި ފަސްވަނަ ކުޅުންތެރިޔާއެވެ. މީގެ ކުރިން ޗެލްސީން ވަނީ ލެސްޓާ ސިޓީގެ ޑިފެންޑަރު ބެން ޗިލްވެލް އާއި، އާރްބީ ލެއިޕްޒީގްގެ ފޯވާޑް ޓިމޯ ވާނާ އާއި އަޔަކްސްގެ ހަކީމް ޒިޔެކްގެ އިތުރުން ނެދަލެންޑްސްގެ ޒުވާން ޑިފެންޑަރު ވިއޭ އެމްބުޔަމްބާ ގެނެސްފައެވެ.
އަދި ކުރިއަށް ދުވަސްތަކުގެ ތެރޭގައި ޕީއެސްޖީއަށް ކުޅެމުން އައި ބްރެޒިލްގެ ޑިފެންޑަރު ތިއާގޯ ސިލްވާވެސް ޗެލްސީއާ ގުޅޭނެ ކަމަށް ރިޕޯޓުތައް ބުނެއެވެ. ޕީއެސްޖީއާއެކު އެޓީމުގެ ކެޕްޓަން ހަދާފައިވާ އެއްބަސްވުން ހަމަވުމާއެކު، ޗެލްސީއަށް ބަދަލުވާން އުމުރުން 35 އަހަރުގެ ސިލްވާ ނިންމާފައިވާ ކަމަށް ރިޕޯޓުތައް ބުނެއެވެ. އަދި އޭނާ ޗެލްސީއާއެކު އެއް އަހަރުގެ އެއްބަސްވުމެއް ހަދާނެ ކަމަށާއި، އެ އެއްބަސްވުމުގެ ދަށުން ސިލްވާ ބޭނުންނަމަ އިތުރު އެއް އަހަރު ޗެލްސީގައި މަޑުކުރުމުގެ ފުރުސަތު ލިބިގެންދާނެ ކަމަށްވެސް ރިޕޯޓުތައް ބުނެއެވެ.
މީގެ އިތުރުން ޗެލްސީން މި ޓްރާންސްފާ ބާޒާރުގައި ބަޔާ ލެވަކޫސަންގެ އުންމީދީ ތަރި ކައި ހަވާޓްޒްގެ ސޮއި ހޯދާނެ ކަމަށްވެސް ވަނީ ރިޕޯޓުކޮށްފައެވެ.
